Read Komrem AMOS 9 Bible Online

AMOS 9 - Komrem bible

AMOS 9

¹Maichâm hnenga RŌNGPU kangir kha ke’n kahmu. Ama’n ṭong ahei pek: “Bek-inn innchunglêr kha rahnak a vōkrakhông ruh, sumpuk akhenga a’nnokna sik. Vōkkhōi una mihei luchunga tlâk hei rasoh. Alakseng hei kha rehmun a kathatsō sik hei. Tûte’num sōksōt tor mak hei ning; inkhatbek um tlânsōt tor mak hei ning.

²Anmani kathikhō katlunga khur an-incho inum, ke’n anmani kasur sik hei. Marvân katlunga anketou inum kakei mathlâk sik hei.

³Anmani Carmel tlânga an-inthup inum kajongsōt sik hei khana kasur sik hei. Keia inphut tui-ôngpui thōia an-inthup inum, tui-ôngpuia rihren ṭong kapek a kamanse sik hei.

⁴Anmani anka-en kada he’n khum sik a anṭhōi hei inum, ṭong kapek heia kamanthatpet sik hei. Anmani kha inthōpui loa thatpet sik a kamandon jo.”

⁵Akahratpen Chunghnung RŌNGPU’n raleichung hi atôn, khana innok a kae; khana aka-om seng he’n ṭajai ansui. Raleichung rakip Nile Tuidung kapōa kaketou khana katlasuk hei.

⁶RŌNGPU’n a-inn marvân heia asak, khana raleichunga chungvân amankhu. Ama’n tuipuia tui kha abek khahei kha raleichunga asun mathlak. Ama rahming kha RŌNGPU kae.

⁷RŌNGPU’n ati, “Israel mihei, ke’n nangni Ethiopia mihei kamandon hei kapōa kamandon jo chei. Ke’n nangni Egypt a inphut kaheiṭhōi chei kapōa, Philistihei kha Crete leh Syria heia inphut kaheiṭhōi hei.

⁸Chunghnung RŌNGPU ke’n hiva set kasip Israel rengram hi ka-en manther a kae, khana raleichunga inphut kamanhmang sik jo. Tâk-kha Jacob sōn leh pâr rakip manhmangsō mak hei ning.

⁹Sasep shunga sâng kapōa Israelhei kha karachi nengna sik ṭong kapek sik. Akahnem mak hei seng hlonsōtna sik jât-hlop hei kâra kakanok sik hei.

¹⁰Kamihei kâra set karônhei kha re shunga anthat sik hei, hinga akahri rakip, ‘Keini hnenga Pathen in bōina heite masō mak ning.’”

¹¹RŌNGPU’n ahri, “David rengram inn inset kapōa akatlu kha syem manṭhatna sik kani lakahong sik. Abanghei kasyem manther sik khana kamatung manther sik. Kasyem nôk sik, hmalaia kapōa kasyem nôk sik.

¹²Khana Israel mihe’n Edom ram a’nhleiseng khana pha khat a keita aleikachang hei seng kha anlo nôk sik,” hiva insōk sik RŌNGPU’n ati.

¹³RŌNGPU’n ati, “Kani kha kahong jo. Khava pha khômtorlo leoa inrangdet a hmuchi kakek sik, theiju eptorlo leoa inrangdet a vomhrui thei kakek sik; Tlâng heia vomhrui theitui katui kalōng sik, hmebung heia’m khanga kalōng sik.

¹⁴Kamihei anrama kaheiṭhōi male sik hei. Ankhōpui insetsō hei kha ansyem manther sik, khan ka-om sik hei; vomhrui rahōn ansyem sik a kha khava theiju kha an-in sik; Rahōn ansyem sik a kha antaling kha ansâk sik.

¹⁵Ke’n kapek hei ram a khan kamanhmông sik hei, anmani avea inphoisōt mak jo hei ning.” RŌNGPU nan-Pathen in ahri jo.