Read Komrem JONAH 1 Bible Online

JONAH 1 - Komrem bible

JONAH 1

¹Ni khat RŌNGPU’n Amittai sapa Jonah hneng aleihri.

²Ama’n ati, “Khōpui kalentak Nineveh a son vase roh, anmani chunga ṭong vaphôngsōt roh; anmihei heituk a akaṭhamak hei mo ti ke’n kamanhret jo.”

³Khannum, Rōngpu ṭongpek a inphut inphesōtna sik Jonah’n ram hlop inkhat ting kase jo. Ama’n Joppating kasea Spainting akase sik a a’ntluk tuipui rakōng inkhat ahmu jo. Ama’n rakōng chōngman apek a Spaina akase sik a rakōng katôrhei kâra kake jo, Rōngpua inphut tlânsōtna sik atlo jo.

⁴Tâk RŌNGPU’n thlipui kahrattak tuipui chunga amanhrânga, thlipui kha inhnak hêra rakōng kha inhmang nathei katlunga kōirong ati jo.

⁵Rakōng katôrhei kha anṭitrei jâra anbibing et a an-Pathen hnenga ka-ông jo hei. Rakōng kha ajing ayângdetna sik a inhukna rakōngtehei tuia anhlon mathlâk jo hei. Hiva pha, Jonah chu rakōng thōi intonga leikasea kahōitak a kajea leika-om.

⁶Rakōng katôr hlamkakei pa’n avahmua ahnenga ati. “Akajea aka-om che hi heimo natlo? Thōi ina nata-ôi pathen hneng der roh. Lungset a arôn me’nchu anibômthei sik me.”

⁷Rakōng katôrhei kha inbek heia, “Vâng in-en rih, tu taṭhea inphut mo hiva inhmangna hi ahei kasōk manhret sōtna sik tlo rih,” anti jo. Khanga antloa, Jonah rahming ankeisōt jo.

⁸Khava jâra ahnenga anti: “Tûnchu nang hri roh! Hiva omchen kasōk jâra tu mo themmô nipek sik? Hivahin heimo natlo? Khova ram a inphut mo akahong che? Heijât che mo?”

⁹Jonah’n amasôn, “Kei Hebrew eng kae. Ke’n ralei leh tuipui kasyem marvân Pathen kha kakamuk.”

¹⁰Jonah khan ama kha RŌNGPUa inphut ahong katlânsōt kae ti kha amanthei jo hei. Rakōng katôrhei kha kaṭi jo hei khana anti, “Khava tlo sik kha ṭit ka-om tak kae!”

¹¹Thlipui kha hong inhnak chet-chet ṭhak jo, khava jâra rakōng katôr he’n ander, “Thlipui hi mandaina sik a nahnenga heimo kantatlo sik?”

¹²Jonah’n amasôn hei, “Tuipui shunga ahlon mathla ruh, khan chu thlipui hi kaṭha sik jo. Nangni’n hiva thinathei thlipui n antaratō hi kei jâra kae ti hi kamanhret.”

¹³Khava tlo kanek a, rakōng katôr he’n rakōng kha tuipangting tôrna sik rahnak a anleitlo, anratha nei rakip leh anleitôr. Tâk-kha thlipui kha inhnak chet-chet joa tlungtor hêrmak jo hei.

¹⁴Khava jâra RŌNGPU hneng an-ôna, “O RŌNGPU, kander che, hiva mipa hringkhō lona sik natlona shunga keini chunga thina karâkna apek mak roh! O RŌNGPU, hiva katlo hi nang che kae.”

¹⁵Khana Jonah kha ankadoma tuipui shunga anhlon manhlut jo, khava phatak a kadai hnger jo.

¹⁶Hivahin rakōng katôrhei khan RŌNGPU kha anṭit hêr joa inthoina anneia ama kanrazen sik tia intepna annei jo.

¹⁷RŌNGPU ṭongpek dungjuia nga kalentak inkhat in Jonah kha amade jo, ama kha sûn 3 leh jân 3 ngavon shunga leika-om.