Read Komrem JONAH 3 Bible Online

JONAH 3 - Komrem bible

JONAH 3

¹RŌNGPU’n Jonah hneng vōi khat ahri nôk.

²Ama’n ati, “Nineveh khōpuia se roh, ke’n kapek che ṭong kha vaphông roh.”

³RŌNGPU ṭong kha Jonah’n ajuia Nineveh khōpui akalen hêr, ni 3 kahlut a petan sik a khan kase jo.

⁴Jonah’n khōpui shung kha se aphut jo, ni khat katlung bit a ase pha, ahri manthang jo, “Ni 40 shunga Nineveh suk manhmang sik kae.”

⁵Nineveh mihe’n Pathen ṭong kha antaksen jo. Khava jâra mi rakip buhngōina sik a intluk jo hei, kasin-kalen ankhenga, borapōn ansia anmalung thleng malârna antlo jo.

⁶Nineveh rengpa khan ṭong hi athei pha, areng in-ongna inphut hong kaṭhōia, reng inretna ahliksōt a, borapōn asia, ravut kâra in-onga ka-om jo.

⁷Ama’n Nineveh mipuihei hneng ṭong aphôngsōt a: “Hivahi renga inphut leh ṭōnpui karôn heia inphut ṭong masō kae: Tûte inkhatbek innum thlaisâk yamak, mi rakip ranhring leh kemōng rakip heite sâk yamak ning.

⁸Mi rakip, ran rakip borapōn a’nsi sik hei kae. Mi rakip in Pathen hneng rahnaktak a antader sik kae, ṭhatmak omchen leh ṭōntlo antamasō sik kae.

⁹Pathen in amalung heithleng um aya, ahnuknat kha’m kahai thei, khan chu eini thimak min!”

¹⁰Pathen in heimo antatlo kha ahmu jo; an-omchen kaṭhamak kha andahlon jo ti hi ahmu jo. Khava jâra ama’n amalung athlenga karâk sik hei atina kha tlomak jo.