Read Komrem MIJAHEI 15 Bible Online

MIJAHEI 15 - Komrem bible

MIJAHEI 15

¹RŌNGPU’n Moses hneng

²hiva chôndânhei hi Israelhei apek sik hei ram shunga antanit sik a aleipek hei.

³Sehratche, kemōngche, a-emak leh keche inkhat romanvâm inthoina a-emak leh intepna huitlungna sik inthoina a-emak leh bing rachama tōksōtna a-emak leh beklanga angaia tōksōtna heia tōkthei hei kae. Hiva thlai inthoina marim hi RŌNGPU tlaina kae.

⁴Tu achang inum RŌNGPU hneng kemōng a-emak leh ke inkhat romanvâm inthoina tōksōt khan thlai inthoina sik olive thai leh inhei jâmdi kilograme inkhat leh vomhrui theitui litre inkhat ahei choisa sik kae.

⁶Kemōngche inkhat ahei tōk pha olive thai litre khat leh aher inhei jâmdi kilograme 2 thlai tōksōt sik

⁷vomhrui theitui litre inkhat leh aṭim leh inṭhōia atōk sik kae. Hiva inthoina marim hi RŌNGPU tlaina kae.

⁸Sehratche inkhat ro-inthoina a-emak leh intepna huitlungna inthoina a-emak leh inlôikhômna inthoina atōk pha

⁹thlai inthoina olive thai litre 2 leh inhei jâmdi kilograme 3,

¹⁰ju litre 2 leh atōk sik hei kae. Hiva inthoina marim hi RŌNGPU tlaina kae.

¹¹Khahei seng kha sehratche, kemōngche, kemōnghei a-emak leh kehei leh tōksa sik hei kae.

¹²Ran inkhat kakhea a’ntōk pha kahnung kajui tōksa hei kha’m in-anghrep a anṭhei sik hei.

¹³Ramsha Israel rakip in thlai inthoina antōk pha RŌNGPU tlaina marim hi, antatōksa sik kae.

¹⁴Khan chu phâkhat a nankâra ramlak mi pha bongkhat sik a-emak leh pha kasôttak sik a aka-om jo khan RŌNGPU tlaina marim, thlai inthoina atōk inchu hiva chôndân mama hi antajui sik kae.

¹⁵A’n-anghrep dân hin nangni leh nankâra aka-om ramlak mihei chunga aheitik a akhit sik chei kae! RŌNGPU hmit-hmua chu nangni leh anmani kha thakhat chei kae;

¹⁶dân leh chôndânhei kha nangni leh anmani chunga thakhat a hmang sik kae.

¹⁷RŌNGPU’n Moses hneng

¹⁸chôndânhei hi Israel mipui he’n apek sik hei ram shunga antajui sik a aleipek.

¹⁹Khana khan thlaisâk heikhat, ram shunga akasōk kha nansâk pha, ṭhahrep chu ahlopdet a RŌNGPU hneng pekna sik ṭhensōt sik kae.

²⁰Buhlom nansyem pha, sathera a’nsyem buhlom hma inkeipen kha, RŌNGPU hneng ahlopdet a pekna nei sik kae. Hivahi nangni’n ahma kakei sâng nanvōk pha ahlopdet pekna nantasyem kapōa tlosōt sik kae.

²¹Akahong sik pha rakip a, nanbuhlom syema inphut ahlopdet kutchoi hi RŌNGPU hneng pek ṭhak sik kae.

²²Tâk, tekhing inkhat a RŌNGPU’N Moses hneng dân aleipek hei kha tu mo inkhat in amahngia ṭhahrep asukṭhe jo.

²³Khan chu RŌNGPU’n Moses hneng ṭong aleipek rakip kha hnunga chu vaipui in tlotet mak jo hei.

²⁴Khava ṭhena kha vaipui manhret mak jâra achang inchu, RŌNGPU tlaina marim mankhut sik a seche inkhat romanvâm inthoina leh hmuchi leh vomhrui ju inthoina tōk sik kae. Hiva chunga, set-inthoina keche inkhat tōksa sik kae.

²⁵Thempu’n vaipui sik a suk manthengna ṭōn atlosōt sik, khan rangei mandam sik hei kae, ajârchu manhret loa sukṭhena achang jâra set-inthoina kha thlai inthoina inkhat a RŌNGPU hneng anta heichoi jo kae.

²⁶Israel pumpui leh ankâra ka-om ramlak mihei kha rangei mandam sik hei kae, ajârchu ankhenga ṭhena kha antlo et a kae.

²⁷Mi inkhat in manhret loa setna atlo’nchu, ama’n kum khat katluk jo ke rala inkhat set-inthoina atōk sik kae.

²⁸Maichâma thempu’n aset inthengna sik a beklanga rōi atlopek sik, khan ama rangei mandam sik kae.

²⁹Israel ram mi achanga, ramlak mi achanga, manhret loa setna katlo rakip chunga dân hi hmang sik kae.

³⁰Tâk-kha tu inkhat manhret pum a set katlo kha, ram mi achanga, ramlak mi achanga RŌNGPU kha heia asakmak jâra that sik kae,

³¹ajârchu ama’n RŌNGPU ṭongpek kha lomak khana amanhret pum a ṭongpek-hei kâra inkhat asuk khōia kae. Athina rahno kha ama’n a’nrôn kae.

³²Pha khat a, Israel he’n ram thōia anleiom lai, Châmhngat kani ning thing avakachom mipa inkhat anhmusōt jo.

³³Ama kha Moses, Aaron, khana vaipui hneng anheiṭhōia,

³⁴ama kha anhngâk a anda, ajârchu heimo manlo sik la’nchên mak a kae.

³⁵Khava sōa RŌNGPU’n Moses hneng ati, “Mipa hi that nger sik kae; mipui in rephōr kur vângting hlung vâng denghlon sik kae.”

³⁶Khava jâra mipui in RŌNGPU ṭongpek dungjuia, rephōr vângting anṭhōisōt a anvadeng hlon jo.

³⁷RŌNGPU’n Moses hneng ṭong aleipek,

³⁸Israel mipui hnenga ahri sik kha: “Nanpōn nander hmor heia tukpâr syem ruh, tukpâr rakip a rahmurei pat-hrui manton ruh. Hivahi pha rakip a nantatlo ṭhak sik kae.

³⁹Tukpâr hi mandonsōtna kachang sik, nanhmusōt pha leh kaṭong pek nanmandonsōt sik khana nanjui sik; keia inphut sesōt mak tin chei khana madu leh rangeina hlam kha juimak tin chei.

⁴⁰Tukpâr hei hin kaṭong pek rakip juina sik mandonsōtna apek sik chei.

⁴¹Kei RŌNGPU nan-Pathen eng kha kae; nan-Pathen changna sik Egypt ram a inphut kaheiṭhōisōt chei kae. Kei RŌNGPU eng kae.”