Read Komrem MIJAHEI 16 Bible Online

MIJAHEI 16 - Komrem bible

MIJAHEI 16

¹Levi phunga Kohath innshung, Izhar sapa Korah hin Moses hlamkeina chunga aleidōi jo. Reuben phunga mi 3 he’n an-inhlop pui, Eliab sapa Dathan leh Abiram, khana Peleth sapa On, khana vaipui talei kadei hei, kaṭha antamanhret jo hlamkakeihei, Israel mi 250 he’num anleijui.

³Anmani Moses leh Aaron hmaikunga intûp heia anti, “Nangni nankhe rei jo! Vaipui mi rakip hei hi RŌNGPU tahei kae, khana RŌNGPU’n nikhenga a’nṭhōipui me. Kha achang inchu heisa mo Moses nang in RŌNGPU mipui chunga nabinga aka-om inshâng che?”

⁴Moses’n hi athei pha, raleia inlet-hlona derna anei jo.

⁵Khana ama’n Korah leh akahnung kajuihei hneng ahri, “Ajînga jîngkâra RŌNGPU’n tu kha mo ama ta kachang amanhmu sik me; ama ta kachang, atakadei kha maichâma ahnenga amanhlut sik me.

⁶Ajîng jîngkâra nang leh nakajui he’n hmeithleng nanchoi sik, hmeira-ê leh bero achunga nanda sik, khana maichâm chunga nanvada sik. Khava sōa eini’n tu kha mo RŌNGPU’n akadei me nihmu sik jo. Akakhe rei kha Levi nangni chei kae!”

⁷

⁸Moses’n Korah hnenga ahrisa. “Rangei ruh, Levihei!

⁹Israel Pathen in vaipui heia inphut aṭhensōt cheia, ahnenga nansor tor jo, RŌNGPU Pōn-inn shunga nanṭōn nantlosōt tor jo, khana vaipuihei ṭōn nantloa nanrajena hei hi akasintek inkhat a nantamandon mo?

¹⁰Nangni leh Levi alakseng um hiva kajana hi amanchen chei, khana tûn thempu hmun kha’m chenna sik intluk chei!

¹¹Nangni’n Aaron kadōia nan-inphin pha, khavakha inchêntak a RŌNGPU kadōia nang leh nakajui he’n a’nphin chei kae.”

¹²Khava sōa ama’n Dathan leh Abiram ava manbek hei, tâk anmani’n anti, “Keini hongmak ning!

¹³Egypt ram thlai ṭhatna inphut hiva ram thōia that sik a naheiṭhōisōt ung hin latluk mak mo? Kanchunga rōngpu kha’m alakachang sik che mo?

¹⁴Nang in thlai ṭhatna ram a naṭhōi sik ung changmak khana hleipuk leh vomhrui rahōn napek sik ung changmak, khana tûnchu keini kahōn sik a a’ntluk che kae. Keini hongmak ning!”

¹⁵Moses kha ahnuk kana joa RŌNGPU hneng ahri, “Hiva mihei inthoina tōkna heite rahlâng mak roh. Anmani inkhatbek hneng ṭhena neimak eng; anmani shakōrtung inkhatbek lopek mak hei eng.”

¹⁶Moses’n Korah hneng ahri, “Ajînga nang leh nami 250 chei kha RŌNGPU omna Pōn-inna akahong nger sik chei kae; Aaron um khan kahong sik.

¹⁷Nangni inkhat et in hmeithleng nanchoi sik, achunga bero nanda sik, khana maichâma nantōk sik.”

¹⁸Khava jâra mi rakip in anhmei thleng antachoi et a, Pōn-inn hlutna kot kunga Moses khana Aaron leh kangir jo hei.

¹⁹Khana Korah khan vaipui alei mantûp jo hei, Moses leh Aaron kha anhnget heia Pōn-inn hlutna khan leikangir hei. Manhret manloa RŌNGPU omna vâr kadi rik-rak khan vaipuihei hnenga ajōngsat hei,

²⁰khana RŌNGPU’n Moses leh Aaron hneng aheiti,

²¹“Hiva miheia inphut kahnungting intet ruh, inrangtak a kasuk manhmang sik jo hei kae.”

²²Tâk Moses leh Aaron in raleia anhmai andima anti, “Eh Pathen, nang chu hringkhō rakip sōkna che kae. Mi inkhat in aset pha, vaipui chunga nahnuk akana sik mo?”

²³RŌNGPU’n Moses hneng ati,

²⁴“Korah, Dathan leh Abiram hei pōn-inn heia inphut mipuihei kha ansesōtna sik a manthei hei ruh.”

²⁵Khana Moses kha Israel hlamkakei he’n anjuia, Dathan leh Abiram hei hneng vakase.

²⁶Ama’n mipuihei hneng ati, “Hiva mikaṭhamak-hei pōn-inna inphut sesōt ruh, anmani neinâk heikhat bek tônmak ruh. Achangmak inchu anmani setna jâra nangni’m anmani leh a’nhmangsō sik chei kae.”

²⁷Khava jâra Korah, Dathan, leh Abiram hei pōn-inna inphut kasesōt jo hei. Dathan leh Abiram kha annuhmei ansahei leh anpōn-inn hlutna kot a leikangir hei.

²⁸Moses’n mipuihei hneng ati, “Hiva ṭōn rakip akatlo sik a RŌNGPU’n kei ahei tirna eng leh kalei tlosōt rakip hei kha kei bing maduna katlohei changmak ti hi hing’hin nanmanhret sik jo.

²⁹Hiva mihei hi Pathena inphut karâkna ṭhahrep pek loa thi ngaia anthi’nchu, RŌNGPU’n kei ahei tir mak a kae.

³⁰Tâk RŌNGPU’n nithei phungmak heikhat atloa, anhring pum a kathirama ansena sik ralei in ahong kik-khōi inchu hiva mihei hin RŌNGPU andahlon jo ti kha nanmanhret sik jo.”

³¹Ama’n ṭong kha ahrisō lim leh Dathan leh Abiram omna ralei thōi kha hong kakik khōia

³²anmani leh an-innshung hei khana Korah kajuihei seng leh anneinâk hei amade hlonsō jo.

³³Khang’khan anhring pum a kathirama katlasuk jo hei. Ralei khan akamkhum heia anmani inhmu mak jo hei.

³⁴Khava hmun a aleika-om Israel mi rakip ankapeng rasa antheia katlânsōt jo hei. Anmani ka-ông heia anti, “Tlân ruh! Ralei in eini’m amadehlon sik me!”

³⁵Khava sōa, RŌNGPU’n hmeimale kasuk ajōng tira bero aleikatōk mi 250 hei kha aro khum jo hei.

³⁶Khava sōa RŌNGPU’n Moses hneng ahri,

³⁷“Hmeia a’nrokhum mihei akakâng banga inphut sum-êng hmei thlenghei kha losōtna sik leh hmeithlenga hmeira-ê hei kha hmun khat a kathek chai sik a Aaron sapa Eleazar kha manthei roh, ajârchu hmei thlenghei kha a’ntheng hei kae.

³⁸RŌNGPU maichâma anpek sōt jo hei kha a’ntheng jo hei kae. Khava jâra ansetna jâra thina kachen jo hei hmei thlenghei kha losōt ina, kheng ina, akhenga maichâm makhuna sik a syem roh. Hivahi Israel mihei sik a maṭhitna akachang sik kae”.

³⁹Khana Eleazar thempu’n hmei thlenghei kha aloheia thleng inpa amankheng heia maichâm makhuna amansyem jo hei.

⁴⁰Hivahi Israelhei sik maṭhitna kae khachu tu inkhat Aaron sōn leh pâr kachangmak in RŌNGPU sik a maichâma bero karo sik akahongmak sik kae. Achangmak inchu Korah leh amihei kapōa ama kha suk manhmang sik kae. RŌNGPU’n Moses a inphut Eleazar ṭong aleipek dungjuia heirakip hi le’ntlosōt jo.

⁴¹Abân kania vaipui mi rakip in Moses leh Aaron chunga ṭong anhri, “Nang in RŌNGPU mi ṭhahrep nathat jo hei.”

⁴²Anmani ankhenga Moses leh Aaron hneng inkhepui sik anhong intûpsōa, Pōn-inn langting anhei ena sumtuk in amakhua RŌNGPU omna vâr kadi rik-rak a’nlâr kha anhmu jo.

⁴³Moses leh Aaron kha kase heia Pōn-inn hma leikangir hei,

⁴⁴khana RŌNGPU’n Moses hneng ahri,

⁴⁵“Hiva miheia inphut nakahnung ting intet ina ngir roh, hiva hmun a hin kasuk manhmang sik jo hei kae!” Anmani 2 inbok heia anhmai raleia andim jo,

⁴⁶khana Moses’n Aaron hneng ati, “Nahmei thleng kha inlo roh, maichâma inphut hmeira-ê kha ashunga da roh, hmeira-ê chunga khan bero ajing mathlâk roh. Kha choi ina mipuihei hneng inrang roh, inthoi-insân thleng mantheng sōtna tlopek hei roh. Inrang roh! RŌNGPU hnuknat kha hong katlung jo, hrise aphut jo.”

⁴⁷Aaron in ṭong ajuia, ahmeithleng aloa ale’ntûp mipuihei laia katlân inhlut jo. Hrise aleiphut dek jo ti amanhret pha, hmeira-ê chunga bero ajing ada a anmani sik a mantheng sōtna inthoina kha atlo jo.

⁴⁸Hivahin hrise kha a akhâm jo, khana ama kha kahring leh kathihei laiṭim a leikangira kae.

⁴⁹Korah dōina chunga akathihei tei loa, khana akathi mija kha 14,700 hei kae.

⁵⁰Hrise kha ahai jo pha, Aaron kha Pōn-inn hlutna kot a Moses hneng hong inle jo.