Read Komrem MIJAHEI 18 Bible Online

MIJAHEI 18 - Komrem bible

MIJAHEI 18

¹RŌNGPU’n Aaron hneng ati, “Nang leh nasapahei leh Levi he’n ka-omna Pōn-inn ensuina chunga heikhat tloṭhena rahno kha nanta’nrôn sik kae; tâk nang leh nasapa rōk he’n thempu ṭōna sukṭhena heikhat rahno kha nanrôn sik.

²Nang leh nasapa he’n Pōn-inn shunga ṭōn nantlo pha Levi phunga na-innkō he’n an inthōpuina sik che ṭhōi manhlut hei roh.

³Anmani’n nang sik leh Pōn-inn sik a anṭōn kha pui antamathluk sik kae, tâk hmun intheng leh maichâma neinâk intheng hei khachu antatôn hêrmak sik kae. Antôn inchu anmani leh nang that sik chei kae.

⁴Anmani’n ṭōn antatlopui sik che kae, Pōn-inn shunga ṭōn rakip pui mathlukna antatlo sik kae, tâk akathemmak mi khan nang leh ṭōn tlosap theimak ning.

⁵Israel mihei chunga kahnuk anat nôk makna sik a nang leh nasapa rōk he’n hmun intheng leh maichâm sik a rōi kha pui nanta mathluk nger sik kae.

⁶Na-innkō Levihei kha nang sik a kutchoi inkhat a Israelhei kâra inphut a’ndeisōt kha kei eng kae. Pōn-inn shunga anṭōn pui intluk sik a kei hnenga tōksōt jo hei kae.

⁷Tâk-kha nang leh nasapahei rōk in maichâm leh hmun inthengpena thempu ṭōn rakip hei kha pui nanta mathluk sik kae. Thempu ṭōn kha kutchoia kapek jo jâr cheia, ṭōnhei hi nangni rahno rônna jo hei kae. Tu inkhat rahōi kasōkmak in neinâk intheng hei hneng ahei hnai inchu that sik kae.”

⁸RŌNGPU’n Aaron hneng ati, “Kei sik a ahlopdet a pekna hei seng, inthoina shunga ro manvâm loa, nangni kapek chei kha mandon ruh. Aheitik a nangnihei chen inkhat a khahei seng kha nang leh nasōnhei kapek jo chei kae.

⁹Maichâma a’nromak a’nthengpen neitōk, hihei seng hi nangni ta kae: hmuchi inthoina, set-inthoina, khan pek male inthoina. A’ntheng inthoina, kei antapek eng rakip kha nang leh nasapahei ta kae.

¹⁰Nangni’n hihei hi hmun inthenga nantasâk sik kae, pase rōk in ansâk thei sik; intheng hei tia lo hei ruh.

¹¹“Khava chunga, Israel he’n aralak ahlopdet a, kei anta heitōk eng kha nangni ta sik kae. Ke’n khahei kha aheitik a nang leh nasapahei khana nasanuhei sik a kapek jo chei kae. Nang innshung mi beklanga a’ntheng rakip in khahei kha ansâk thei sik.

¹²“Akum kataia Israel sahe’n kara kasōk hma-inkei akaṭhapen anta heipek eng: Olive thai, vomhrui ju khana hmuchihei hi kapek jo chei kae.

¹³Hihei rakip hi nangni ta kae. Nan-innshung mi beklanga a’ntheng rakip in ansâk thei sik.

¹⁴“Israel shunga ajâr omloa kei hneng anta heitōk rakip kha nangni ta kae.

¹⁵“Israel sahe’n pasenai khana ran a’nte hma-inkei rakip kei anta heitōk eng kha nangni ta kae. Tâk-kha pasenai a’nte hma-inkei rakip aman pek a katlen malena leh beklanga ran intheng mak a’nte hma-inkei rakip katlen malena kha akahnōm sik chei kae.

¹⁶Naipang thla khat katluk jo hei kha sedân dungjuia aman dangka cheng 5 vâng rachôk male sik hei kae.

¹⁷Tâk-kha sehrat, kemōng, leh ke a’nte hma-inkeihei khachu rachôk male sik changmak; khahei khachu keita mông jo hei kae, inthoina ro manvâm sik hei kae. Anthi hei kha maichâma kathek thlōn una anthai hei kha kei tlaina marim inkhat a thlai inthoina ro hei ruh.

¹⁸Ahlopdet inthoina ranhei ôp leh anchang tinga anrakō heia hme hei kha nangni tahei kae.

¹⁹“Israel sahe’n ahlopdet a kei anta heipek eng rakip hei kha ke’n nang leh nasapa khana nasanuhei ahei tik a kapek jo chei kae. Ke’n hivahi nang leh nasōnhei hnenga akakōithei hêrmak sik intepna kasyem jo kae.”

²⁰RŌNGPU’n Aaron hneng ati, “Nang in karōia chenthei neinâk heite inkhat nalomak sik kae, khana Israel ramṭhen khatbek um nang chen a indathei mak tin. Nang tarangei rakip khachu RŌNGPU kei eng kha kae.”

²¹RŌNGPU’n ahri, “Israel sahe’n ahlopdet a anta hongtōk eng rakip kha Levihei kapek jo hei. Hivahi ka-omna Pōn-inn ka-ensui inṭangna jâra tloman a’npek hei kae.

²²Israel alak he’n Pōn-inn antahnai hêrmak sik kae khana anbinga thina kha anta heirôn manhlut mak sik kae.

²³Tûna inphut Levihei rōk in Pōn-inn kha antatinta a pui katluk a rahno kha anta’nrôn sik kae. Hivahi nasōnhei hneng um hmangthang sik jo dân kha kae. Levihei chu Israelhei kâra ankarōi akachang thang sik neinâk neimak hei ning,

²⁴ajârchu Israel he’n kei hneng ahlopdet a tōkna sem sôm kha, ke’n ankarōi sik a kapek jo hei kae. Khava jâra anmani’n Israelhei kâra karōi neithei mak hei ning tia kamanthei jo hei.”

²⁵RŌNGPU’n Levihei hneng hripek sik kha Moses hneng ṭong aleipek,

²⁶“RŌNGPU’n nankarōi sik a apek chei Israel sahei sem sôm kha nanrahlâng pha, ahlop mônga RŌNGPU tōkna sôma inkhat pek ruh.

²⁷Hiva tōklôm hei hi hlei kathlō he’n sather leh vomhrui theither antatōk leh in-anghrep a a’nlo sik kae.

²⁸Hing’hin Israel heia inphut sem sôm nanta rahlâng rakip a inphut RŌNGPU chen hei kha nangni’num nantapek sik kae. RŌNGPU sik a ahlop mônga tōklôm kha Aaron thempu hneng nantapek sik kae.

²⁹Nanta rahlâng hei kâra akaṭhapen kha RŌNGPU hneng pek ruh.

³⁰Nangni’n akaṭhapen nantōksōa, hlei kathlōpa’n tōkna aneisōa alakseng kha a’nda kapōa, alakseng kha nan-inda thei sik.

³¹Nang leh na-innshung seng in khahei seng kha khova hmun a nansâk thei sik, ajârchu hivahi Pōn-inn shunga nanṭōn tlona hlōman kae.

³²Sem sôm kâra akaṭhapen kha RŌNGPU hneng nantōklai seng khahei kha nansâk inum themmô chenmak tin chei. Tâk-kha akaṭhapen kha tōkmak hma kutchoi inkhat sâk a a’ntheng tōkna kha manset makna sik intluk ruh.”