Read Komrem MIJAHEI 19 Bible Online

MIJAHEI 19 - Komrem bible

MIJAHEI 19

¹RŌNGPU’n Moses leh Aaron hneng

²hiva dânhei hi Israelhei hneng pekna sik ṭong aleipek hei. Sehrat kasen arala nōrna kase ṭōnna ala’n hmangmak Moses leh Aaron hneng anta hongkeia,

³Eleazar thempu antapek sik kae. Rephōr kur vângting keisōt a ahmai kunga that sik kae.

⁴Khava sō leh Eleazar in athi kha ṭhahrep aloa akutpâr vâng Pōn-inn hmating khan vōisari akathek thlōn sik kae.

⁵Sehrat pum kha, avun, aravōi, athi khana akari katlunga thempu hmaikunga ro manvâm sik kae.

⁶Khava sō leh ama’n cedar thing ṭhahrep, hyssop bâk inkhat leh patsen hrui inkhat hmeishunga ahlon manhlut sik hei.

⁷Khava sō leh apōn asôp heia atak tui insokhum sik khan chu rephōra kahlut thei sik jo; tâk khōhlei mak hma seng a’nthengmak sik kae.

⁸Serala karopa kha’m apōnhei asôp ngera, ataksa tui a’nsokhum sik kae, tâk ama kha’m khōhlei mak hma seng a’nthengmak sik kae.

⁹Khava sō leh beklanga a’ntheng inkhat in serala rona akângvâm kha amantûp a rephōr vângting hmun intheng inkhat a avada sik, khava akângvâm kha Israel he’n a’nthengmak suk manthengna tui asyemna sik a da sik kae. Hiva kin hi set manthengna sik a’ntlo inkhat kae.

¹⁰Akângvâm intûp mi kha’m apōn asôp sik, khōhlei atlungmak kârseng a’nthengmak sik kae. Hiva dân hi ahei tik a Israelhei leh ramlak mi ankâra ka-om hei sik a hmang sik kae.

¹¹Tu achang inum kathi kalōng katôn kha ni 7 beklanga intheng mak.

¹²Ama kha a’nthengna sik a ni 3 tluk ning leh ni 7 tluk ning mantheng sōtna tui vâng a’nsi sik kae. Khava sō leh intheng sik jo. Tâk-kha ama ni 3 tluk ning leh ni 7 tluk ning a’nsimak inchu, intheng mak ning.

¹³Tu achang inum kathi kalōng katôna a’nsi intheng mak kha intheng loa ka-om, ajârchu insuk inthengna sik tui vâng la’nthek khummak a kae. Ama’n RŌNGPU Pōn-inn kha amanbōk, Pathen mi inkhat a inlomak ning.

¹⁴Mi inkhat pōn-inn shunga athi jo’nchu tu mo inkhat pōn-inn shunga aleika-om achanga, ahong kahlut achanga ama kha ni 7 intheng mak jo.

¹⁵Pōn-inn shunga ka-om be leh bûr asingna ka-om mak rakip kha’m intheng mak jo hei.

¹⁶Mi inkhat in mi taleithat inkhat a-emak leh retlânga thi ngaia akathi kalōng kha atôn joa a-emak leh mi inkhat in mihring ru leh thlân atôn jo’nchu ama kha ni 7 akabōk sik kae.

¹⁷Akabōk suk manthengna sik a chu, set sôp manthengna sik a, sehrat kasen arala anrona kha ṭhahrep loa, be inkhat a ada a, tuither leh manhei sik kae.

¹⁸Ahma inkeia, a’nthenga ka-om mi inkhat in hyssop bâk inkhat aloa tuia khan amachea pōn-inn leh ashunga ka-om rakip khana aleika-om mihei kha akathing thlōn sik hei. Inhni tlukna, a’nthenga ka-om inkhat in mihring ru, kathi kalōng a-emak leh thlân lei katônpa chunga tui kha akathing thlōn sik kae.

¹⁹Ni 3 tluk ning leh ni 7 tluk ning, a’nthenga ka-om inkhat in a’nthengmak chunga tui kha akathing thlōn sik kae. Ni 7 tluk ning mipa kha asuk mantheng sik kae, mi khan apōnhei asôpsōa a’nsisō jo’nchu kani tlâk pha intheng sik.

²⁰Tu inkhat beklanga akabōk jo, a’nsi intheng mak mi kha intheng loa ka-om ṭhak, ajârchu mantheng sōtna tui kha insothlōn mak a kae. Ama’n RŌNGPU Pōn-inn kha amanbōk jo, Pathen mi inkhat a inlomak ning.

²¹Nangni’n hiva dân hi ahei tik a nantajui sik kae. Suk manthengna sik a tui inthingpa kha’m apōn asôp sik hei kae; khana tui katôn rakip kha’m khōhlei atlungmak kârseng intheng mak a kae.

²²Akabōk inkhat tasit rakip kha akabōk a ka-om sik, khana khava katôn rakip kha’m khōhlei katlunga kabōk a ka-om sik.