Read Komrem MIJAHEI 20 Bible Online

MIJAHEI 20 - Komrem bible

MIJAHEI 20

¹Thla hma-inkei ning Israel mipuihei Zin ram thōia kahong jo heia Kadesh a rephōr anmatung jo. Khan Miriam kathia anvûm jo.

²Anrephōr anmatungna hmun a tui leiom mak, khava jâra Moses leh Aaron kimvea mipui intûp heia

³anmaduna kha anleihri, “Rōngpu Pōn-inn hma kan-Israel changpui hei leh kanlei thi’nchu akaṭha jôk sik kae.

⁴Heisik a mo ram thōia hin naheiṭhōi ung? Hinahin kanranhei leh kanthi inramna sik a mo kae?

⁵Egypt a inphut hiva hmun, heite hmông makna hin heisa mo naheiṭhōi ung? Hinahin konim, theichang, vomhrui khana kapothei he’m om mak hei. Khana tui in sik bek um om mak!”

⁶Moses leh Aaron kha mipuiheia inphut intetsōt heia Pōn-inn kot kunga vakangir jo hei. Anmani’n anhmai raleia anmakhup a RŌNGPU omna vâr kadi rik-rak kha anhnenga jo’nlâr jo.

⁷RŌNGPU’n Moses hneng ati,

⁸“Intepna Bôm hmaikunga khōnghre kha valo roh, nang leh Aaron in mipui ankhenga mantûp hei ruh. Ankhenga hmaikunga hlungpui hneng khan nang in ṭonghri roh, tui jōng kapût sōt sik. Hing hinna nang in tui kha hlungpuia inphut mihei sik leh anranhei sik mansōk roh.”

⁹RŌNGPU’n ṭong apek dungjuia Moses’n khōnghre kha avalo jo.

¹⁰Ama leh Aaron in hlungpui hma a khan mipuihei kha anmantûp heia, Moses’n ati, “Rangei ruh, dōina katlohei! Nangni sik a hiva hlungpuia hin tui kantamasō sōt sik mo?”

¹¹Khava sōa Moses’n khōnghre akalânga hlungpui kha vōi 2 ajem a, kavadung kalen inkhat tui jōng kapût sōt a mipui leh ran rakip he’n an-in jo.

¹²Tâk RŌNGPU’n Moses leh Aaron kha ajōng rakôk jo hei. Ama’n ati, “Nangni’n Israelhei ângkunga a’ntheng karatha neina hi hrisōtna sik a taksenna katluk a neimak jo chei, anmani pek sik a katep pek hei ram a khan nangni’n ṭhōi manhlut mak jo hei tin.”

¹³Hivahi Israel he’n RŌNGPU juina chunga anbei tamna leh ama’n a’nthengna amalârna Meriba hmun a akasōk kha kae.

¹⁴Moses’n Kadesh a inphut Edom rengpa hneng ṭongkarônhei aleitir. Anmani’n ahnenga anti, “Hiva ṭong hi nasōpui Israel phunga inphut kae. Nang in hringkhō intak kantalei thōk hei kha namanhret,

¹⁵kum katamtak kanlei omna Egypt ram a heikhonga mo kanpu kanpa aleikase hei. Egypt mihe’n kanpu kanpahei leh keini hneng êng kasetak a anleitlo ung,

¹⁶khana keini’n RŌNGPU hneng inthōpuina sik leika-ông ung. Ama’n kanpeng rasa athei pek unga ngeva inkhat ajōngtir pek ung, ama’n Egypt ram a inphut ahei thōisōt ung. Tûnchu keini naramkei Kadesh khōpuia ka-om jo ung.

¹⁷Lungset a naram shung petan rung. Keini leh kanran he’n hlamdung rōk kanhro sik, nanhlei hei leh nanvomhrui bi shung heia semak ni’ung khana natuikhura inphut tui inmak ni’ung. Narama inphut kansōksōt mak kârseng hlampui dung rōk kanhro sik.”

¹⁸Tâk Edom he’n anleimasôn, “Kanramshung nantahro sik hi hnōm mak ung! Nanhro’nchu hei kakōn sik unga kha re kansō sik chei.”

¹⁹Israel mipui he’n anti, “Keini’n hlam rōk kanhro sik, keini leh kanran he’n nantui an-in inchu aman kanpek sik chei, keini tamadu chu petan sik rōk hi kae.”

²⁰Edom he’n anhri nôk a, “Keini hnōm mak ung!” khana anmani kha remi ratha kaneitak hei leh inṭhōia Israelhei kating sik a injôk jo hei.

²¹Edom he’n Israelhei kha anramshung anmanhro mak hei jâra, Israelhei kha hlam hlopting inhe jo hei.

²²Israel vaipui khan Kadesh andahlona Hor Tlânga heikatlung jo hei,

²³Edom ramria khan. RŌNGPU’n Moses leh Aaron hneng ati,

²⁴“Israelhei pek sik a kanle’ntepna ram kha Aaron chu hlutthei mak jo ning; ama kathi sik jo, ajârchu nangni 2-in Meriba a khan kaṭong pek dōina ṭōn nantlo jo.

²⁵Aaron leh asapa Eleazar kha Hor Tlânga khan ṭhōitou hei roh,

²⁶khana khan Aaron kha athempu von hei kha sōtpek ina asapa Eleazar manvon roh. Aaron chu khava hmun a kathi sik jo.”

²⁷Moses’n RŌNGPU ṭongpek dungjuia atlo jo. Anmani mipui hmit-hmua Hor Tlânga khan kaketou jo hei,

²⁸Moses’n Aaron thempu von hei kha asōt a asapa Eleazar amanvon jo. Khava tlângbung bilik a khan Aaron chu kathi jo, Moses leh Eleazar kha jōng kaṭumsuk jo hei.

²⁹Mipui in Aaron thi ṭong anthei pha, ankhenga ni 30 ṭajai ansuia kae.