Read Komrem MIJAHEI 21 Bible Online

MIJAHEI 21 - Komrem bible

MIJAHEI 21

¹Canaan ram thlang intongtinga ka-om Canaanhei rengpa Arad in Israelhei kha Atharim hlam a kava jo hei ti ṭong athei pha, abuhlu heia ṭhahrep asur jo hei.

²Khava sōa Israel he’n RŌNGPU hneng intepna annei, “Hiva mihei hi nani mantor pou ung inchu, anmani leh ankhōpuihei nahnenga heite hnemna jongloa kantōksōt sik hei, khana kansuk manhmang sik hei.”

³RŌNGPU’n athei pek heia Canaanhei torna sik a a’nthōpui jo hei. Khava jâra Israel he’n anmani leh ankhōpuihei ansuk manhmang pet jo heia, khava hmun kha Hormah tia arahming anphō jo.

⁴Israelhei kha Hor Tlâng andahlon jo, Edom ram kimvea hrona sik a Agaba Tuikekâk hlam anjuia kase jo hei. Tâk mipui he’n anhlam hrona anthōk hla jo

⁵khana Pathen leh Moses dōina ṭong anhri jo. Anmani inphin heia anti, “Heisik a mo tui leh thlai omakna nêrdiram a hin akathi sik a Egypt ram a inphut naheiṭhōi ung? Hiva sâk theimak thlai he’n keini akasôt amanngir tor mak jo!”

⁶Khana RŌNGPU’n tûr kanei marihei ajōng tira, Israel mi katamtak anmachuk heia kathi jo hei.

⁷Mipuihei kha Moses hneng kahong heia anti, “Keini’n RŌNGPU leh nang dōina ṭong kanhri jo jâra kaset jo ung. Marihei hi losōtna sik a tûn RŌNGPU hnenga der roh.” Khana Moses’n mipuihei sik a ader jo.

⁸Khava sōa RŌNGPU’n Moses hneng tûr kanei mari inkhat lim thir vânga syem ina, thingtlōn inkhat chunga makhei roh, tu achang inum mari’n amachuk jo mi khan a-en inchu akadam sik kae tia amanthei.

⁹Khava jâra Moses’n sum-êng mari inkhat lim asyema thingtlōn inkhat a atâr jo. Tu mo inkhat mari’n amachuk jo mi khan a-en inchu akadam sik kae.

¹⁰Israelhei kha intôrsōt heia Oboth a rephōr anmatung jo.

¹¹Khava hmun kha andahlon sōa, Moab-hei ram nisōting ramhânga Abarim sukset hmun a khan rephōr anmatung jo.

¹²Khava sōa Zered phaichama rephōr anmatung nôk jo.

¹³Khava hmun a inphut anmani intôrsōt nôk heia Arnon tuidung sak intonga rephōr ansak nôk, Amorhei ram katlunga ahe’njei ramthōi kae. (Arnon hi Amorhei leh Moab-hei ramri kae.)

¹⁴Khava jâra RŌNGPU lekharabua khan hing’hin, “Supha ramkeia Waheb khōpui leh phaichamhei, Arnon tuidung,

¹⁵phaicham insuk kha Ar khōpui katlunga injei khana Moab ramri chin langting katlunga ajōng phak,” tia ka-om.

¹⁶Khana inphut a Tuikhurhei inti hmun a khan kase nôk heia, RŌNGPU’n Moses hneng ati, “Mipuihei kha mantûp hei roh, tui kapek sik hei.”

¹⁷Khava pha Israelhei khan hiva hla hi anleisak: “Tuikhurhei, nantui manpût ruh; Hla leh inṭhōia kanrahlâng sik —

¹⁸Tuikhur kha reng sapahei leh Mipui hlamkakeihei talei khōr kae, Rn khōnghre inkhat vâng leh Ankhōnghre vânga antakhōr kae.” Anmani ramhânga inphut Mattana ting intôr hei,

¹⁹khava hmun a inphut Nahaliel a kase hei, khan Nahaliel a inphut Bamoth a,

²⁰Bamoth a inphut Moab ram phaichama, Pisga Tlâng thōia, nêrdiram hmun a jo kae.

²¹Khava sōa Israel he’n Amorhei rengpa Sihon hnenga ṭongkarôn antir heia hinga anva manti hei:

²²“Naram shung petan rung. Keini leh ranhei hlamdung rōk kanhro sik, nahleipuk hei leh navomhrui heia semak ni’ung khana natuikhur heia tui um inmak ni’ung; naram shunga inphut kan-intôrsōt mak kârseng hlampui rōk kanhro sik.”

²³Tâk-kha Sihon in Israel he’n aram shung antapetan sik kha phemak jo. Ama’n aremihei amantûp heia ram thōia, Jahaz a intôrsōt jo hei khana Israelhei anbuhlu jo hei.

²⁴Tâk Israel he’n ankadōihei kha rehmun a akatamtak anthat heia anram kha Arnon Tuidunga inphut Jabbok sak intong katlung andepha jo, khavakha Ammonhei ram katlunga kae, ajârchu Ammon he’n anramri kha kahnettak a anleihrunga kae.

²⁵Khava jâra Israel he’n Amor khōpui rakip Hashbon leh akimvea khōpui rakip inveina anloa khō ansyema ka-om jo hei.

²⁶Hashbon hi Amorhei rengpa Sihon khōpui leikae, ama’n Moab reng hma-inkei kha re aleituk a aram rakip Arnon tuidung katlunga aleiloa kae.

²⁷Khava jâra hla kaphō he’n ansak a, “Sihon rengpa khōpui Hashbona hong ruh! Khava a’nsakther leh a’nsyemther kha kan-en hnōm.

²⁸Pha khat a hiva Hashbon khōpuia inphut Sihon remihei hmei kapōa leikakōn hei; Moab ram a Ar khōpui kha ansuk manhmang, khan chu Arnon chung intonga bung hei kha ansuk manhmang pet a kae.

²⁹Moab mihei heituk a ṭitpek ka-om jo chei mo! Chemosh kabek mihei sukset kachang sik jo chei! Nan-Pathen in pasehei kha, hnongsōt mi amanchang jo hei, khana nuhmeihei kha Amor rengpa rehring sur amanchang hei.

³⁰Tûnchu ansōn leh pârhei insu inhmang jo hei, Hashbona inphut Dibon katlung Medeba hnenga Nashima inphut Nopha hlam katlung.

³¹Khava jâra Israelhei kha Amorhei ram shunga khō katla jo hei.

³²Moses’n Jezer khōpui buhluna sik a hlam kaṭhapen ka-en sik mi aleitir hei. Israel he’n khōpui kha leh akimvea khōhei anhlō heia khana ka-om Amorhei kha anhnongsōt jo hei.

³³Khava sōa Israelhei kha inhe heia Bashan hlamlen ting kase jo hei. Khana Bashan rengpa Og kha aremihei leh Edrei hmun a ankasō sik a kakōn jo.

³⁴RŌNGPU’n Moses hneng ati, “Ama kha ṭitmak roh. Ke’n ama, ami rakip leh aram chunga torna kapek sik che. Hashbona vai leikarôn Amorhei rengpa Sihon naleitlo kapōa ama chunga’m tlo roh.”

³⁵Khava jâra Israel he’n Og, asapahei khana ami rakip anleithat hei, akahringa inkhatbek damak hei, khana aram kha anhlō joa kae.