Read Komrem MIJAHEI 23 Bible Online

MIJAHEI 23 - Komrem bible

MIJAHEI 23

¹Ama’n Balak hneng ati, “Hinahin maichâm 7 asyempek roh, khana sehratche 7 leh kemōngche 7 aheikei pek roh.”

²Amanthei kapōa Balak in aleitlo, ama leh Balaam in maichâm rakip a kemōngche leh sehratche inkha-khat antōksōt jo.

³Khava sōa Balaam in Balak hneng ati, “RŌNGPU’n a’nhmupui sik eng mo, a’nhmupui mak sik eng mo, avaka-en sik a kase kâra nang ro-inthoina hnenga hin leingir roh. Ama’n amanhmu eng rakip kha kahri pek sik che.” Khava jâra ama abing rōk a bung bilik a kaketou jo,

⁴khana Pathen in ama a’nhmupui jo. Balaam in ahnenga ati, “Ke’n maichâm 7 kasyema sehratche 7 leh kemōngche 7 maichâm et a katōk jo.

⁵RŌNGPU’n ahri sik kha Balaam hneng amantheia aṭong kha Balak hnenga avakahri sik a atir male jo.

⁶Ama inlea, ro-inthoina hnenga Balak kha Moab hlamkakei rakip hei leh aleikangir ṭhak kha avahmu.

⁷Balaam in hiva ṭongsân hi aleihri, “Moab rengpa Balak in Nisōtinga Syria ram a inphut aheiṭhōi eng. Ama’n, ‘Hong roh kei sik a ṭong avahri pek roh.’ ‘Israelhei kha avahâksêr pek hei roh,’ ati.

⁸Pathen in ahâksêr mak kha heikhong mo kahâksêr sik, A-emak leh RŌNGPU’n inrimna ahri mak kha heikhong mo kahri sik?

⁹Hlungpui inshânga inphut anmani kajōng hmu hei; hmebunga inphut kajōng ensuitor hei. Anmani anbing rōk a akahring jât-hei kae; jât-hlop hei kanek a mahâmṭhat anchenna kha inhret hei.

¹⁰Israel sōn leh pârhei kha vaiphin kapō hei kae, Anja katam reia intei tor mak jo. Pathen mihei kapōa kakanikhō hei hi manchai rong; Mikadik kapōa kamōnga thi rong.”

¹¹Khava pha Balak in Balaam hneng, “Kahnenga heimo natlo jo? Ka’ndōipui hei kahâksêr sik hinahin kaheiṭhōi che kae, tâk natlo rakip hichu mahâmṭhat napek jo hei.”

¹²Ama’n, “RŌNGPU’n hri roh ati rōk kha kahritor kae,” tia amasôn.

¹³Khava sōa Balak in Balaam hneng ati, “Varoh kei leh hmunhlop a se nôk rih khan Israel ṭhahrep rōk nahmu sik hei. Khava hmun a inphut ahâksêr pek hei roh.”

¹⁴Ama’n Pisga Tlângbung bilik chunga Zophim hlei tetlânga khan aṭhōitou jo. Kha’num ama’n maichâm 7 asyema khava rakip a sehratche leh kemōngche inkha-khat atōksōt nôk jo.

¹⁵Balaam in Balak hneng ati, “Naro manvâm tōksōtna hnenga hin leingir roh, ke’n sova hmun son Pathen va’nhmupui hi rong.”

¹⁶RŌNGPU’n Balaam kha a’nhmupui, hri sik hei kha amanthei, khan aṭonghei kha Balak hnenga avakahri sik a atir male jo.

¹⁷Khava jâra ama inlea Balak kha Moab hlamkakeihei leh aro manvâm tōksōtna hnenga anlei ngir ṭhak kha avahmu jo. RŌNGPU’n heimo ahri pek kha Balak in aleider,

¹⁸Balaam in hiva ṭongsân hei hi ahri jo: “Varoh, Zippor sapa Balak, Khana kahri sik hei hi rangei roh.

¹⁹Pathen hi, malei kasei mihring kapō changmak. Ama hi malung kathleng lele mihring inkhat changmak. A’ntepna jo rakip kha, ama’n atlo; Ama’n ahri kha intlosōt a kae.

²⁰Ṭhatthei bukna sik a ṭong apek jo eng, Khana Pathen in ṭhatthei abōk kha, ke’n bekmale theimak eng.

²¹Ke’n kaleihmu khachu hnunga Israel chunga Vângsetna leh khōdengthei heisōk mak ning. RŌNGPU an-Pathen khan a-ompui ṭhak hei; Anmani’n ama hi anreng kae tia anphông.

²²Pathen in Egypt a inphut aheiṭhōisōt hei; Ama’n ansik a, ram sik a sehratche kapōa re adōi,

²³Israel phung leh jât-hei dōina sik a, Hmitphedôi leh dôi ṭong inhmang mak. Tûnchu mihe’n Israelhei chunga hinga anti sik, ‘Enruh Pathen in heimo atlo jo!’

²⁴Israel jât hi ratha kanei shabakkai inkhat kapō kae: Akei hlera amadesō mak lai seng, Athat hei kha anthi a-insōmak lai seng, inhnga mak a kae.”

²⁵Khava sōa Balak in Balaam hneng ati, “Israelhei kha hâksêr hnōm mak jo hei che, tâk mahâmṭhat rōk chu pemak hei roh!”

²⁶Balaam in amasôn, “RŌNGPU’N amanthei eng rōk kha katlo sik tia kalei hridek changmak mo?”

²⁷Balak in ati, “Kei leh se rih, ke’n hmunhlop a kaṭhōi sik che. Khava hmun a khan Pathen in kei sik a anmani amanhâkser khakhat sik che.”

²⁸Khava jâra ama’n Peor Tlângbung bilik nêrdiram hmun a khan aṭhōi nôk jo.

²⁹Balaam in ahnenga ati, “Hinahin maichâm 7 asyempek ina, sehratche 7 leh kemōngche 7 aheiṭhōi pek roh.”

³⁰Balak in amanthei kapōhrep a atlo jo, maichâm rakip a khan sehratche leh kemōngche inkha-khat atōk jo hei.