Read Komrem MIJAHEI 24 Bible Online

MIJAHEI 24 - Komrem bible

MIJAHEI 24

¹Tûna hinchu Balaam in, RŌNGPU’n Israelhei ṭhatchômna aman pek hnōm kha a-inhret jo, khava jâra amak hma aleitlo kapōa vasena sik leh tlâ sânna sik tlomak jo. Ama nêrdiramting khan inheia,

²Israel he’n anphung et a rephōr antasâk kha ahmu jo. Pathen rathla’n ajōng che-ôrep a,

³khana aman hiva ṭongsân hei hi ahri jo: “Beor sapa Balaam ṭonghei, Inthengtak a akahmu tor mi inkhat,

⁴Pathen tahri katheitorpa ṭonghei. Kasang kanga ka-ena ke’n hmangtalâra kahmu, Akahratpen Pathena inphut hmangtalâr kae.

⁵Israel pōn-inn kaṭhahei,

⁶Kahno thing agôr kaseihei ka-ang, A-emak leh tuidung panga rahōnhei, RŌNGPU’n aleiphun aloe kunghei kapō, A-emak leh tuikea cedar thing kapō hei kae.

⁷Anmani’n khōtui katluk a annei sik, Kaṭhatak a tui omna hleiheia hmuchihei anmankek sik. Anrengpa kha Agag kanek a kalen jôk sik. Khan chu anvairôn kha kalen kaseisa sik.

⁸Pathen in Egypt a inphut aheiṭhōisōt hei; Anmani sik a ram sehrat inkhat kapōa a’nsukpui pek hei. Anmani’n an-inrepuihei kha ansuk manhmang hei, Anru ansuk rabun hei, anthe andor thlek pek hei.

⁹Hiva jât hi shabakkai inkhat kapō kae; Ama aje pha, tûte’n mathōi ngammak hei. Tu enum Israel vângṭhat kapek kha vângṭhat achen sik kae. Khana tu enum Israel hâksêr kapek kha hâksêr achen sik kae.”

¹⁰Balak ahnuk kana joa akut-hei akatōma Balaam hneng ati, “Ka’nrepuihei kahâksêr sik a kabek che, tâk vethumset ṭhatthei napek jôk jo hei.

¹¹Tûnchu innting inle jo roh! Hlōman pek sik chea le’ntep eng, tâk hlōman nahmu sik kha RŌNGPU’n hnōm mak jo.”

¹²Balaam in amasôn, “Kahnenga nahei tir ṭongkarônhei hneng kaleihri jo khachu,

¹³nareng-innpuia sana leh dangka rakip nanipek eng inum, ke’n Rōngpu ṭongpek kaler a binga heite khatbek um tlotor mak ning. RŌNGPU’n hri roh tia amanthei rōk kha kahri sik kae.”

¹⁴Balaam in Balak hneng ati, “Tûnchu kei kamihei hneng inle sik jo eng, tâk Israel in hnung leh namihei chunga heimo anta hongtlo sik kha kasemak hma kamanthei dek che kae.”

¹⁵Khava sōa ama’n hiva ṭongsân hi aleihri: “Beor sapa Balaam ṭonghri, Inthengtak a akahmu tor,

¹⁶Pathen ṭonghri akathei tor Khan chu A’nshângpena inphut manhretna akajōng kha a’nhlângpa ṭonghei kae. Kasang kanga ka-ena ke’n hmangtalâra kahmu, Akahratpen Pathena inphut hmangtalâr kae.

¹⁷Ke’n hnunga sik ka-ena, Israel jât kahmu hei. Rn inkhat ârsi kavâr inkhat kapōa khava jât a inphut hongkathōi sik. Ârsi sômkaleng kapōa Israel a inphut kajōng sik. Moab hlamkakeihei asukkhōi sik hei Seth hei avōk mathlâk sik hei.

¹⁸Edoma a’nrepuihei kha ator sik hei Anram kha akarōi amanchang sik jo, Khava shunga Israel in ator injôn sik hei.

¹⁹Israel phung in anmani kha achōnpha sik hei Khana akahring seng um amanhmangsō sik hei.”

²⁰Khava sōa Balaam in Amalek-hei kha hmangtalâra ahmu heia hiva ṭongsân hi ahrisōt: “Amalek kha jât rakip hei kâra ratha kaneipen kae, Tâk achaina chu inhmangthang sik jo.”

²¹Hmangtalâra ama’n Kenhei aleihmu hei, hiva ṭongsân hi aleihri: “Na-omna hmun kha kahnet, Kare chunga varabu inchom kapōa inhuk,

²²Tâk Assyria he’n anhong sur pha chea, Kenhei, nangni suk manhmang sik chei kae.”

²³Balaam in hiva ṭongsân hi aleihri: “Sak lang tinga a’ntûp hei hi tuhei mo?

²⁴Re katlo he’n Cyprus inphut rakōng anhei tôr sik; Assyria leh Aber antor sik hei Tâk anmani, khava tloman a, ahei tik a inhmang sik jo hei.”

²⁵Khava sōa Balaam intluk a innting inle jo, Balak um asena hlam ahro jo.