Read Komrem MIJAHEI 25 Bible Online

MIJAHEI 25 - Komrem bible

MIJAHEI 25

¹Israel he’n Acacia Phaichama rephōr anmatunglai pase he’n khava hmun a ka-om Moab jōrhei ansetpui jo hei.

²Hiva nuhmeihei hin Moab pathen kamukna inthoina reveia anbek heia kae. Israelhei khan thlai kha ansâk a

³Peor pathen Baal kha’m ankamuk jo. Khava jâra RŌNGPU kha anchunga ahnuk kana joa,

⁴Moses hneng aleiti, “Israel hlamkakeihei seng kha ṭhōi hei ina kei ṭong juina, sûn kanivâr thōia that hei roh; kha achang inchu mipuihei chunga kahnuk namak ning.”

⁵Moses’n ṭōnpui karônhei hneng ati, “Nangnihei seng in nanphung shung et a pase, Peor pathen Baal inmuk rakip kha nantathat sik hei kae.”

⁶Israel he’n RŌNGPU omna Pōn-inn kot kunga ṭajai ansui laitak, mipui leh Moses hmit-hmua Israel mi inkhat in Median jōr inkhat akakōa apōn-inn shunga aheiṭhōi manhlut a kae.

⁷Thempu Aaron tupa, Eleazar sapa Phinehas khan hivahi ahmu pha, kathōisōt a mipui intûp kha adahlon jo. Ama’n kasei inkhat ahrut a,

⁸Pase leh nuhmei kha pōn-inn shunga ajui heia, kasei vâng an-inhnibât a asunhlon jo hei. Hing’hin Israelhei aleikathat inram hrise kha kabâng jo,

⁹tâk hivahin mi 24,000 aleithat dek jo hei.

¹⁰RŌNGPU’n Moses hneng ahri,

¹¹“Phinehas ṭōntlo jâra, kei Israelhei chunga kahnuk namak jo. Ama’n kei teilo pathenhei kamuk sik kha hnōm mak, khava jâra kahnuknat a kasuk manhmang mak hei kae.

¹²Khava jâra ke’n ahong katlung sik khang katlunga sik ama leh intepna kasyem jo ti hi manthei roh.

¹³Ama leh asōnhei kha thempu sik a phun manhnet jo hei kae, ajârchu kei ani kadōihei leimajôm mak hei, khana mipuihei set rangei mandamna ahei rôn sōt a kae.”

¹⁴Median jōr leh antathasap Israel mi kha Salu sapa Zimri kae, Simeon phunga innshung upa kae.

¹⁵Nuhmeinu rahming kha Cozbi anti. Apa Zur kha Median rup inkhat a upa kae.

¹⁶RŌNGPU’n Moses hneng ṭong aleipek,

¹⁷“Medianhei kha re vasō hei ina suk manhmang hei roh,

¹⁸anmani’n Peor a nachunga anhōn chea akaṭhamak antlo jâra, khana hrise asōklai ale’nthat jo Cozbi jâra vasō hei roh.”