Read Komrem MIJAHEI 27 Bible Online

MIJAHEI 27 - Komrem bible

MIJAHEI 27

¹Joseph sapa Manasseh, Manasseh sapa Machir, Machir sapa Gilead, Gilead sapa Hepher, Hepher sapa Zelophehad, Zelophehad sanuhei kha Mahla, Noah, Hogla Milcah leh Tirza hei hi kae.

²Anmani RŌNGPU omna Pōn-inn kot kunga Moses, Eleazar thempu, hlamkakeihei leh mipui hmaikunga kase heia vakangir heia anvati,

³“Kanpa’n sapa inkhatbek dahlon loa ram thōia leikathi jo. Ama kha RŌNGPU dōina aleikatlo Korah kahnung aleikajui hei kâra inkhat changmak; ama bing set jâra aleikathi kae.

⁴Ama’n sapa aleinei mak jâra khan heisik a mo kanpa rahming kha Israelhei kâra a’nhmang sik? Kanpa sōpuihei leh in-anga karōi kha keini apek roh.”

⁵Moses’n anṭong kha RŌNGPU ângshunga amathlung pek hei,

⁶RŌNGPU’n ahnenga ati,

⁷“Zelophehad sanuhei tader kha akadik kae; karōi kha anpa sōpuihei kâra anmani’m pe hei roh. Anpa karōi kha anhnenga tlung rasoh.

⁸Israelhei kha manthei hei roh ti chu, ahei tik a pase inkhat sapa dahlon loa athi jo’nchu asanu he’n akarōi anta’nkhôm sik kae.

⁹Sanu aleinei mak inchu, asōpui he’n anta’nkhôm sik kae.

¹⁰Sōpui aleinei nôk mak jo’nchu apa sōpui he’n antakhôm sik kae.

¹¹Sōpui leh pahngâk anei nôk mak jo’nchu a’nhnai puipen khan akhôm sik khana akarōi khet ângphunga amatu sik kae. RŌNGPU ke’n ṭong kapek che kapōa, Israel he’n ahlam kasōk a hmangna dânhei hi antanit sik kae.”

¹²RŌNGPU’n Moses hneng ati, “Abarim Tlânga ketou roh khana Israelhei kapek ram so vathlir roh.

¹³Nava hmusō pha leh nasōpui Aaron kapōa, akathi sik jo che kae,

¹⁴ajârchu Zin ram thōia nan-inhnibât in kaṭong pek nanleidōia kae. Meriba a mipui he’n kakadōia anlei inphinlai karatha intheng kha anhmai kunga malârsōt sik leikada chei.” (Meriba hi Zin ram thōia Kadesh hmun a tuisi kapût inkhat kae.)

¹⁵Moses’n ader,

¹⁶“Hringkhō rakip jōng kōnna, RŌNGPU Pathen, mipuihei hlam kakeitor sik leh

¹⁷rehmun a hlam kakeitor sik pase inkhat kadei pek hei roh, namipuihei hi ankakhem ka-om mak kemōng kapō anchang makna sik a.”

¹⁸RŌNGPU’n Moses hneng ati, “Akatlo tor pase, Nun sapa Joshua kha ṭhōi roh, alu chunga nakut 2 da roh.

¹⁹Ama kha Eleazar thempu leh vaipui hma khan manngir roh, khana khan ankhenga hmaikunga ama kha nang kathlengpa jo kae tia phôngsōt roh.

²⁰Naratha neina ṭhahrep kha ama pe roh, Israel mipui in aṭong anjui theina sik a.

²¹Ama kha, Urim leh Thummim kahmang Eleazar thempu hnenga in-ngai sik. Hing’hin Eleazar in Joshua leh Israel mipui kha antlona rakip a amanse sik hei kae.”

²²Moses’n RŌNGPU ṭongpek dungjuia aleitlo. Ama’n Joshua kha Eleazar thempu leh mipui hma amanngir jo.

²³RŌNGPU ṭongpek dungjuia, Moses’n Joshua luchunga akut-hei adapek a ama kahlâng kathleng jo kae tia aphôngsōt jo.