Read Komrem MIJAHEI 28 Bible Online

MIJAHEI 28 - Komrem bible

MIJAHEI 28

¹RŌNGPU’n Moses kha ṭong aleipek,

²ama malung tlaina pek-hlam kasōk thlai tōksōtna kha apha rakip a tōkna sik Israelhei ahri pekna sik a.

³RŌNGPU hneng thlai tōksōt sik hei kha hihei hi kae: ani kataia ro-inthoina tōksōt sik a, kum khat katluk jo nōrna kase kemōng chere 2 sik kae.

⁴Kemōng inkhat kha jîngkâra khana inhnina kemōng kha khōhleia tōk roh,

⁵inkhat et kha hmuchi inthoina olive thai kaṭhapen litre inkhat leh inhei jâmdi kilograme inkhat leh tōksa sik hei kae.

⁶Hivahi ani kataia ro-inthoina kha kae, khavakha RŌNGPU tlaina marim katui thlai inthoina Sinai Tlânga ahma inkeipena le’ntōk a kae.

⁷Inkhatna kemōng chere kha leh vomhrui ju inthoina kha, maichâm chunga vomhrui ju kha litre inkhat sunthlōn roh.

⁸Khōhlei ting um 2 tlukna kemōng chere kha hiva kapōa vomhrui ju inthoina kha leh tōksa hei roh. Hivahi’m thlai tōksōtna inkhat kae, amarim kha RŌNGPU tlaina kae.

⁹Châmhngat kani ning chu, nōrna kase kum khat katluk jo kemōng chere 2, olive thai leh inhei jâmdi kilograme 2 kha hmuchi inthoina leh vomhrui ju inthoina leh tōk sik hei kae.

¹⁰Hiva ro-inthoina tōksōtna hi, ani kataia inthoina leh vomhrui ju inthoina chunga, châmhngat ning katai, tōksa sik kae.

¹¹Thla rakip inphut ning RŌNGPU hneng ro-inthoina tōksōt ruh: nōrna kase rōk sehrat chere 2, kemōngche 1, kum khat katluk jo hei kemōng chere 7.

¹²Hmuchi inthoina sik a, olive thlai leh inhei jâmdi tōk ruh: sehratche inkhat et leh jâmdi kilograme 3; kemōngche inkhat leh kilograme 2;

¹³khana kemōng chere inkhat et leh kilograme 1 tōk ruh. Hiva ro-inthoina tōksōt hei hi thlai inthoinahei kae, amarim kha RŌNGPU tlaina kae.

¹⁴Vomhrui ju inthoina kadiktak khachu sehratche inkhat et a vomhrui ju litre 2, kemōngche inkhat litre 1 leh aṭim khana kemōng chere inkhat et a litre 1 akachang sik kae. Hivahi kum katlung bit a thla phutna kani ninga romanvâm tōkna dân sik kae.

¹⁵Ani kataia ro manvâm leh ju inthoina chunga khan, set-inthoina keche inkhat tōksa ruh.

¹⁶RŌNGPU kajana Rakan Kût kha thla hma’nkei pena kanikhō 14 ning nit sik kae.

¹⁷Kanikhō 15 tluk ning beklang tinga rehōi phut a ni 7 katlung hmang sik kae, hiva shunga che philo buhlom rōk sâk sik kae.

¹⁸Revei hma-inkei ning nangni kamukna sik a’ntûp sik chei kae, khana ṭōn heite tlomak sik kae.

¹⁹RŌNGPU hnenga thlai inthoina inkhat a ro-inthoina tōk ruh: sehrat chere 2, kemōngche 1, khan chu kum khat katluk jo kemōng chere 7, ankhenga nōrna kase akae sik hei kae.

²⁰Ahlamtak a hmuchi inthoina, olive thai leh a’nhei jâmdi kha tōk ruh: sehratche inkhat et leh kilograme 3, kemōngche leh kilograme 2

²¹khana kemōng chere inkhat et leh kilograme 1 sik kae.

²²Set-inthoina keche inkhat um tōksa ruh, hing’hin mipui sik a suk manthengna rōi kha tlosōt ruh.

²³Hihei hi jîngkâr kataia ro-inthoina tōkna chunga tōksa hei ruh.

²⁴Hiva kapōa, ni 7 shunga RŌNGPU hnenga ama tlaina marim, thlai inthoina kha tōk ruh. Hivahi ani kataia ro-inthoina leh vomhrui ju inthoina chunga tōksa ruh.

²⁵Ni 7 tluk ning kamukna sik a intûp ruh, ṭōn tlomak ruh.

²⁶Sakhôm Kût hma-inkei ning, RŌNGPU hneng thlaither nantōk pha, kamukna sik a a’ntûp sik chei kae, ṭōn heite tlomak sik kae.

²⁷RŌNGPU malung tlaina marim, ro-inthoina kha tlo ruh: sehrat chere 2, kemōngche 1, khana kum khat katluk jo kemōng chere 7, ankhenga nōrna kase rōk akae sik hei kae.

²⁸Ahlamtak a hmuchi inthoina, olive thai leh manhei jâmdi kha tōk ruh: sehratche inkhat et leh kilograme 3, kemōngche leh kilograme 2,

²⁹kemōng chere inkhat et leh kilograme 1 tōk sik kae.

³⁰Khana set-inthoina keche inkhat um tōksa ruh, hing’hin mipui sik a mantheng sōtna rōi tlosōt ruh.

³¹Hihei seng hi leh ju inthoina kha ani kataia ro-inthôi tōksōtna leh hmuchi inthoina chunga tōksa hei ruh.