Read Komrem MIJAHEI 3 Bible Online

MIJAHEI 3 - Komrem bible

MIJAHEI 3

¹RŌNGPU’n Sinai Tlânga Moses hneng ṭong aleihri lai Aaron leh Moses innkōshung hei kha hihei hi kae.

²Aaron in sapa 4 anei hei: upapen kha Nadab, khan Abihu, Eleazar khana Ithamar.

³Anmani kha thempu changna sahrik anleimanthi hei,

⁴tâk, Nadab leh Abihu chu Sinai Nêrdiram a hmei intheng mak RŌNGPU hneng antōk jâra leikathi jo hei. Sa leinei mak hei, khava jâra Eleazar leh Ithamar in Aaron hringkhō shunga thempu ṭōn anleitlo jo.

⁵RŌNGPU’n Moses hneng ati,

⁶“Levi phunghei kha hmating heiṭhōi hei roh Aaron thempu inthōpui sik a kadei hei roh.

⁷Ka-omna Pōn-inna tlo sik kasōk antlo sik khana thempuhei leh vaipui sik a mantluk sik ṭōnhei antatlosōt sik kae.

⁸Pōn-inn neinâk rakip kha antinta sik khana alak Israelhei sik tlohlam kasōk kha antatlo sik kae.

⁹Levihei ṭōnpuipen khachu Aaron leh asapahei inzen sik kha kae.

¹⁰Aaron leh asapahei kha, thempu ṭōnpui katlosōt sik a nakadei sik hei kae; tu inkhat in tlo sik arei inchu akathi sik kae.”

¹¹RŌNGPU’n Moses hneng ati,

¹²“Tûnchu Levihei kha keita sik jo hei kae. Ke’n Egypt nai a’nte hma-inkei rakip kaleithat lai hei, Israel inkōshunga sapa upapen hei leh ran a’nte hma inkeipen rakip kei sik a kaman thengsōt jo hei kae. Anmani keitâ kachang sik jo hei. Kei RŌNGPU eng kae.”

¹³

¹⁴Sinai Nêrdiram a RŌNGPU’n Moses ṭong aleipek,

¹⁵Levi phung leh innkō aja mazet manhlutna sik leh pase thla khat a inphut chungting seng khum manhlutna sik a,

¹⁶Moses’n khanga aleitloa kae.

¹⁷Levi’n sapa 3 anei hei: Gershon, Kohath, khan Merari hei kae, anmani hi anphung rahming invō anpu anpahei kae. Gershon in sapa 2 aleinei: Libni leh Shimei; Kohath in sapa 4 aleinei: Amram, Izhar, Hebron, khana Uzziel; Merari’n sapa 2 aleinei: Mahli leh Mushi. Anmani kha an-innkō shunga rahming aleikarôn anpu anpahei kae.

¹⁸

¹⁹

²⁰

²¹Gershon phung hrui kha Libni leh Shimei innkōhei tasyem kae.

²²Pase thla khat a inphut chungting seng rahming inkhum ankhenga 7,500 hei kae.

²³Hiva phung hin tlaitlâk intongting Pōn-inn kahnunga rephōr antasyem sik kae,

²⁴Lael sapa Eliasaph kha phung upa kae.

²⁵Anmani kha Pōn-inn ka-ensuihei kae, ashung makhuna, avâng makhuna, ahlutna pinden,

²⁶Pōn-inn leh maichâm kimvea rape sik a pinden khana sumpuk hlutna pinden ka-ensuihei kae. Hihei hi leh a’nkop thei ṭōn rakip ka-ensuihei kha kae.

²⁷Kohath phung kha Amram, Izhar, Hebron khan Uzziel innkōshung hei kae.

²⁸Pase thla khat a inphut chungting seng a’nzet inhlut ankhenga 8,600 hei kae.

²⁹Hiva phung hrui he’n Pōn-inn thlang intongtinga rephōr antasyem sik kae,

³⁰Uzziel sapa Elizaphan kha phung upa kae.

³¹Anmani kha ṭongtep bôm, dokhâng, thaihmei matungna, maichâm leh Hmun Inthenga thempuhei hmangchâk be leh bûr hei, khana Hmun Inthengpena hlutna pinden katinta sik hei kae. Anmani’n hiva hmangchâk-hei leh a’nmat ṭōn rakip anta-ensui sik kae.

³²Levihei phung upa chu Aaron thempu sapa Eleazar. Ama kha Hmun Inthenga ṭōn katlohei ka-ensui leikachang.

³³Merari phung kha Mahli leh Mushi innshunghei inphut ajōng insyemsōt kae.

³⁴Pase thla khat a inphut chungting seng a’nzet inhlut kha ankhenga 6,200 hei kae.

³⁵Hiva phung hin Pōn-inn sak intongting rephōr ansyem sik, Abihail sapa Zuriel kha phung upa kachang sik.

³⁶Anmani kha Pōn-inn sik a thing kekim, rape thingtlōn, kacho, akung matungna leh mansurna rakip ka-en sik hei kae. Hihei hi leh a’nmat ṭōn rakip ka-ensui sik hei kae.

³⁷Anmani kha kacho, amatungna, hrui mankeina uchup, ahrui, avânga sumpuk sik a ka-ensuihei kae.

³⁸Moses, Aaron leh ansapahei kha nisōtinga Pōn-inn hma rephōr antasyem sik kae. Anmani Israel sik a Hmun Intheng shunga ṭōn ka-ensui sik hei kae. Milak inkhat in khava ṭōn kha atlo’nchu that sik kae.

³⁹RŌNGPU’n Moses hnenga ṭong aleipek dungjuia Levi phung pase thla khat a inphut chungting senga hei kha ankhenga 22,000 hei kae.

⁴⁰RŌNGPU’n Moses hneng ati, “Israel sapa a’nte hma inkeipen hei kha keita kae. Khava jâra Israel pase a’nte hma-inkei rakip, thla khat a inphut chungting seng anrahming mazet manhlut roh. Tâk-kha khava kahlanga Levi rakip kami kamanchang jo hei. Kei RŌNGPU eng kae! Ran inte hma kakeihei kahlânga Levihei ranhei kata kamanchang jo hei.”

⁴¹

⁴²Moses’n ṭong ajuia, sapase a’nte masa rakip aleimazet jo.

⁴³Thla khat a inphut chungting seng amazet manhlut jo; ankhenga 22,273 hei kae.

⁴⁴RŌNGPU’n Moses hneng ati,

⁴⁵“Tûnchu Israelhei sapa a’nte hma-inkei rakip kahlanga Levihei, khana Israelhei ran a’nte hma-inkei rakip kahlanga Levihei ranhei tōksōt jo roh.

⁴⁶Levihei kanek a Israel sapa a’nte hma-inkei kha 273 katamsa chet, khava jâra sapa ṭhahrep nantarachôksa sik kae.

⁴⁷Sena ngai dungjuia inkhat a dangka 5 pek sik kae,

⁴⁸hiva sêr hi Aaron leh asapahei pek hei ruh.”

⁴⁹Moses’n ṭongpek kha ajuia,

⁵⁰dangka 1.365 kha aloa,

⁵¹Aaron leh asapahei apek jo hei.