Read Komrem MIJAHEI 31 Bible Online

MIJAHEI 31 - Komrem bible

MIJAHEI 31

²“Media mihe’n Israel mipuihei chunga heimo anta leitlo khava jâra khan karâk hei roh. Khavakha natlosō leh nang kathi sik jo che.”

³Khava jâra Moses’n mipuihei hneng ati, “Media he’n RŌNGPU hneng anta leitlo jâra khan nanva hlō heia nankarâkna sik hei, re katuk sik a intluk ruh,

⁴Israel phung rakip a lishing khat sâm re katuk sik tir hei ruh.”

⁵Khava jâra aphung rakip a mi 1,000 ankadei jo, ankhenga 12,000 re katuk sik intluk jo hei.

⁶Moses’n anmani kha neinâk intheng hei leh mêrchîkna kapek pengkun kachoi, Eleazar thempu sapa Phinehas hlamkeina thōia re katuk atir jo hei.

⁷RŌNGPU’n Moses hnenga ṭong apek kapōa anmani’n Media mihei kha anvasō jo hei, pase rakip

⁸leh Media hei reng 5: Evi, Rekem, Zur, Hur khana Reba anthatpet jo hei. Beor sapa Balaam um anthatsa jo.

⁹Israel mihei khan Media nuhmei leh ansahei ansur heia, anranhei leh ankemōng rup-hei anṭhōi jo hei, ankarōi rakip anchom pek hei,

¹⁰ankhōpui leh anrephōr rakip anroreng pek jo hei.

¹¹Antachomsōt rakip, rehringa antasurhei leh anranhei inveisana anheiṭhōi hei,

¹²Jericho inphut a Jordan rakanna Moab phaichama rephōra aleika-om Moses leh Eleazar khana Israel vaipuihei hneng anheiṭhōi manhlut jo hei.

¹³Moses, Eleazar khana vaipui hlamkakeihei kha, remihei inhmupui sik a rephōr inphut kasōksōt hei.

¹⁴Moses’n retukna inphut a anhe’nle ṭōnkarônhei, ṭhen leh rup hlamkakeihei chunga ahnuk kana jo.

¹⁵Ama’n anhnenga ader hei, “Heisik a mo nuhmei rakip kahringa nantahe hei?

¹⁶Balaam ṭongpek leikajui hei khana Peor hmun a RŌNGPU racham lerna sik mipui leikathōisōt hei kha nuhmeihei kae ti mandonsōt ruh.

¹⁷Khava jâra tûnchu hmun inchunna kanei jo pasenai leh nuhmeinai rakip that hei ruh,

¹⁸tâk nuhmeinai leh nupui intheng seng chu kahringa da hei ruh.

¹⁹Tûnchu mikathat leh kathi kalōng katôn rakip chei kha rephōr vângting ni 7 aka-om sik chei kae. Ni 3 leh ni 7 tluk ning nangni leh rehringa nantahei sur nuhmeihei kha insuk intheng ruh.

²⁰Nangni’n pōnhar rakip leh shavun a, kehmea, achangmak leh thinga ansyem rakip um nantasuk mantheng nger sik kae.”

²¹Eleazar thempu’n rehmun a inphut ahe’nle hei hneng khan ati, “Hihei hi RŌNGPU’n Moses aleipek dânhei kha kae.

²²Akakâng theimak rakip, ti chu sana, dangka, thir, sum-êng, tin, a-emak leh ngen hei hi hmei vâng nanta mantheng sik hei kae. Alakseng kha tui vâng nantasôp mantheng sik kae.

²³

²⁴Ni 7 ning nanpōn hei nantasôp mantheng sik kae; khava sōa beklanga intheng sik cheia kha rephōr kahlut thei sik jo chei.”

²⁵RŌNGPU’n Moses hneng ati,

²⁶“Nang leh Eleazar khana vaipui hlamkakeihei leh inchun a rea chomsōt rakip mihring leh ranhei kha’m tei mantōk pet ruh.

²⁷Ahe’nchom hei kha sem hnia sem una, sem khat remihei sik khana sem khat vaipuihei seng sik kae.

²⁸Remihei chenna inphut RŌNGPU sik a antasur mihei raja 5 et a inphut inkha-khat ṭhen hei roh, hi leh in-anghrep a se, shakōrtung, kemōng, ke heia losōt roh.

²⁹Khahei kha RŌNGPU hneng ahlopdet a pekna inkhat a Eleazar thempu hneng pe roh.

³⁰Mipui hnenga a’npe khana inphut, antasurhei 50 et a inphut inkha-khat losōt roh khana kha leh in-anghrep a ran, shakōrtung, kemōng khana kehei losōt roh. Khahei kha Rōngpu Pōn-inn katinta Levihei pek hei roh.”

³¹Moses leh Eleazar in RŌNGPU ṭongpek kha antlo jo.

³²Remi he’n rea anta heichomsōt aja kha, anmani bing sik a antadasōt hei kha tei loa, hiseng kae: kemōng leh ke 675,000, se 72,000, shakōrtung 61,000 khana nuhmei intheng 32,000 kae.

³³

³⁴

³⁵

³⁶Sepeihei tachen ahar kha kemōng leh ke 337,500 kae, hiva shunga RŌNGPU sik keiṭhen kha 675 kae; remihei chen se 36,000 kae, hiva shunga RŌNGPU sik keiṭhen kha 72 kae, remi chen shakōrtung 30,500 kae, hiva shunga RŌNGPU sik a keiṭhen kha 61 kae; khana sepeihei chen nuhngâk intheng kha 16,000 kae, hiva shunga RŌNGPU sik a keiṭhen kha 32 kae.

³⁷

³⁸

³⁹

⁴⁰

⁴¹Khava jâra Moses’n RŌNGPU ṭongpek dungjuia, ramsêrṭhei kha RŌNGPU hneng ahlopdet a tōkna inkhat a Eleazar hneng apek jo.

⁴²Vaipuihei chen kha remihei tachen kha leh in-anghrep hei: kemōng leh ke 337,500, se 36,000, shakōrtung 30,500, khana nuhmei intheng 16,000 kae.

⁴³

⁴⁴

⁴⁵

⁴⁶

⁴⁷Hiva chen hina inphut Moses’n antasur mi leh ranhringhei 50 et a inphut inkha-khat alosōt jo, khana RŌNGPU ṭongpek dungjuia khahei kha RŌNGPU Pōn-inn katinta Levihei anpek jo hei.

⁴⁸Khava sōa remi hlamkakeihei kha Moses hneng kase heia,

⁴⁹ṭong anva mathlung jo, “Apu, kanhlam keina thōia remihei kha kantei jo hei, inkhatbek ṭhemak ung.

⁵⁰Khava jâra, keini inkhat et tachomsōt sanaret, zakser, kutkhi, kōrton khana maṭhi hrui hei kha kanhei choi jo. Keini’n khahei kha RŌNGPU hneng ani ka-un ṭhakna sik ung, kanhringkhō man a kantapek jo kae.”

⁵¹Moses leh Eleazar in sana kha akhenga ret insyemsa et a anrahlâng jo.

⁵²Ṭōnhmun karônhei tahei pek sōt kha akhenga kilograme 200 aphâkvet a kae.

⁵³Ṭōnhmun karônmak remihei tachomsōt hei khachu anbingta sik a an-inda jo hei.

⁵⁴RŌNGPU’n Israel mipui kha aka-un ṭhakna sik heia Moses leh Eleazar in sana kha Pōn-inna anchoi jo.