Read Komrem MIJAHEI 32 Bible Online

MIJAHEI 32 - Komrem bible

MIJAHEI 32

¹Reuben leh Gad phung he’n se katamtak anleidôna,

²anmani Moses, Eleazar, khana alak vaipui hlamkakeihei hneng kase heia anvahri,

³“RŌNGPU’n Israelhei tahlō sik a ale’nthōpui hei ram: Ataroth, Dibon, Jazer, Nimra, Heshbon, Eleale, Sibma, Nebo khana Beon hei hi, se veina sik a ram kaṭhatak hei kae, khana se katamtak kanneia kae.

⁵Lungsettak a hiva ram hi kanhlōna sik a apek roh, Jordan tuidung re amanke mak roh, khava hmun a aman om mak roh.”

⁶Moses’n amasôn, “Nanloi Israel he’n rea anselai nangni’n hinahin aka-om hnōm chei mo?

⁷Heikhong mo Israelhei kha RŌNGPU’n apeksa ram kha Jordan re kea anhlutmakna sik, malung suk mathlâkna kapek sik a a’ntluk chei?

⁸Nanpa he’num Kadesh Barnea inphut khava ram ka-en inthlip katirlai hei khang’khan anleitloa kae.

⁹Anmani Eshkol phaicham katlunga kase heia ram kha anvahmu, tâk anhe’nle pha, RŌNGPU’n apek hei ram shunga hlut sik kha mipui malung ansuk mathlâk pek jo hei.

¹⁰Khava kanikhō ning khan RŌNGPU ahnuk kana joa intepna inkhat anei jo:

¹¹‘Kei intepna kanei jo khachu anmani’n anṭit ankajamak eng jâra, Egypt ram a inphut ahe’ntôrsōt pase kum 20 leh chungting seng, Abraham, Isaac leh Jacob pek sik a ale’ntep eng ram kha hlutthei mak jo hei ning.’

¹²Hivahin Kenizz mi Jephune sapa Caleb leh Nun sapa Joshua teilo pase rakip ahōm jo hei, anmani chu RŌNGPU kha aṭong anjuiṭhak a kae.

¹³RŌNGPU kha mipuihei chunga ahnuk kana joa, khava khanga amalung intlaimak hei seng kha anthisō mak kârseng ram thōia kum 40 alei manlônle heia kae.

¹⁴Khana tûn nanpahei hmun kha nanloa, set kasip mihei khangther inkhat in RŌNGPU hnuknat inhnak kha Israel chunga heirônsōt sik a intluk nôk cheia kae.

¹⁵Tûn Reuben leh Gad mihe’n ama kahnung nanjui hnōm mak inchu, hiva mihei hi ram thōia avea adahlon sik jo hei kae, anmani inhmangna rahno kha nangni’n nantarôn sik kae.”

¹⁶Anmani’n Moses ansora anvahri, “Ahma inkeia, hin kankemōng hei kakekhumna sik leh kanmi vei hei sik khōpuihei rekur syemna sik ahnōm pek roh.

¹⁷Khava sō leh chu kanloi Israelhei leh rehmun a kōnsap sik a intluk sik ung khana antachen sik ram a khan kanman om mak hei lai seng rehlam kankei sik. Khava pha shunga, rekur syemdek jo khōpui heia hin kanmi vei he’n anleiomna sik khana hiva ram miheia inphut anlei inhukna sik a kae.

¹⁸Alak Israel he’n ankarōi chen sik kha anchensō mak lai seng keini innting he’nle mak ning.

¹⁹Keini’n Jordan rekhat ting anmani kâra karōi heite lomak ning, ajârchu keini’n Jordan nisōting hin chen kha kannei jo.”

²⁰Moses’n amasôn hei, “Nanta hri hi nantatlo khet sik achang inchu, khan chu RŌNGPU hmaikunga hin re katuk sik a kōn jo ruh.

²¹Nanpase remi rakip he’n Jordan re akake sik hei kae, RŌNGPU hlamkeina thōia ni’nrepuihei kha RŌNGPU’n ator mak hma seng

²²khana anram kha ahlō mak kârseng re antatuk sik kae. Khava sō leh he’nlethei sik jo chei, ajârchu RŌNGPU leh nanloi Israelhei hnenga nanṭōn bat kha hui nantamathlung sik kae. Khan chu Jordan nisō langa ram hi nangni ta jo kae tia ahnōm pek sik jo chei.

²³Tâk-kha nan-intepna kha nanjuimak inchu, kahridek hi kae, nangni RŌNGPU kadōia kaset sik chei. Khava chunga ṭhena neimak ruh; nansetna jâra karâkna nanchen sik.

²⁴Khava jâra nankhōpuihei leh kemōng rōng hei sak hei ruh, kachanga nanle’ntepna khachu tlo ruh.”

²⁵Gad leh Reuben pase he’n anti, “Apu, naṭongpek ung kapōa kantlo sik.

²⁶Kannuhmei leh kansa khana kanse hei leh kankemōng hei Gilead khōpuia hin leika-om sik hei.

²⁷Khana keini kankhenga RŌNGPU hlamkeina thōia re katuk kase sik a intluk jo ung. Jordan re kake sik unga kha, nahri kapōa re kanvatuk sik.”

²⁸Khava jâra Moses’n Eleazar, Joshua leh alak Israel hlamkakeihei hneng hiva ṭongpek-hei hi aleipek hei:

²⁹“Gad leh Reuben pase he’n RŌNGPU ṭongpek a Jordan re ankesō leh re katuk sik an-intluk inchu, khana anmani inṭangpui jâr cheia ram kha nanvalotor inchu, khava sō leh chu Gilead ram kha ankarōi sik a pek jo hei ruh.

³⁰Tâk-kha Jordan re ankemak a nangnihei leh re ankōn sap mak inchu, nangnihei kapōa Canaan ram shunga anchen karōi kha antanei sik kae.”

³¹Gad leh Reuben pasehei khan anmasôn, “Apu, RŌNGPU ṭongpek kapōa kantlo sik.

³²Ama ṭongpek thōia Canaan ram shung kanrakan sik khana re kakōn sik ung, Jordan nisōting hin karōi kha kanchen torna sik a.”

³³Khava jâra Moses’n Amorhei rengpa Sihon leh Bashan rengpa Og ramṭhen rakip, khava kimvea khōpuihei leh ram katlunga Gad leh Reuben phunghei khana Manasseh aṭimkhat hei hneng anganse jo hei.

³⁴Gad phung he’n Dibon, Ataroth, Aroer,

³⁵Atroth, Shophan, Jazer, Jogbeha,

³⁶Beth Nimra khana Beth Haran Rekurhei kha ansakther jo hei.

³⁷Reuben phung he’n, Heshbon, Eleale, Kiriathaim,

³⁸Nebo, Baal Meon (rahming hi inthleng jo) khana Sibma rekurhei kha ansakther nôk jo. Antasakther khōpuihei kha rahming anphō jo hei.

³⁹Manasseh sapa Machir innshung he’n Gilead re kakōn heia anhlō jo, khana aleika-om Amorhei kha anhnongsōt jo hei.

⁴⁰Khava jâra Moses’n Gilead kha Machir innshunghei apek jo hei, khan anmani ka-om jo hei.

⁴¹Manasseh phunga Jair intipa’n khō ṭhahrep re asō heia alo jo hei jâra khō rahminghei kha, “Jair Khōhei” tia aphō jo.

⁴²Noba in re kakōna Kenath leh khō kasinhei avahlō hei, ama’n arahming amanrôna khavakha Noba tia aphō jo.