Read Komrem MIJAHEI 33 Bible Online

MIJAHEI 33 - Komrem bible

MIJAHEI 33

¹Moses leh Aaron hlamkeina thōia phung rakip in Egypt ram andahlon kahnunga Israelhei rephōr matungna hmun kha athōia hin inpek a kae.

²RŌNGPU ṭongpek dungjuia Moses khan rephōr matungna rakip rahming kha aleimazet manhlut a kae.

³Israel mipui he’n kum khat shunga thla hma inkeia ni 15 tluk ning Rakan Kût hma inkeipen inchai ning, Egypt kha anhei dahlon jo. RŌNGPU hrungna thōia Ramese khōpui kha,

⁴RŌNGPU’n ansapa hma-inkeihei athat pekna kha, kathi kavûm Egypt hei hmit hmu khet a anleidahlon jo. Hiva ṭōn intlo hin, RŌNGPU kha Egypt Pathenhei kanek a ratha aneichet ti kha amalâr kae.

⁵Israelhei khan Ramese andahlona Sukkoth a rephōr anmatung.

⁶Abânna rephōr kha nêrdiram inchaina Ethama a ansak nôk.

⁷Khava hmun a inphut Baal Zephon nisōtinga Pi Hahiroth a he’nle heia, Migdol hnenga rephōr ansak nôk.

⁸Pi Hahiroth andahlona, Shur nêrdiram a Tuipui Kasen ṭimtak anpetan; ni 3 shunga he’ntôr heia Marah hmun a rephōr ansak nôk.

⁹Khana inphut Elima kase hei, rephōr ansak nôk, ajârchu khava hmun a tuihnar 12 leika-om khana kahno kung 70 leikahmông.

¹⁰Elim andahlona Suez tuikekâk hnenga rephōr ansak nôk.

¹¹Abânna anrephōr kha, Sin nêrdiram a kae.

¹²Khava sōa Dophkah hmun a rephōr ansak,

¹³khava sō nôk a Alush a ansak jo.

¹⁴Abânna Rephidima, khana khan tui in sik leiom mak.

¹⁵Rephidima inphut Hor Tlâng katlunga athōia anzet hmunhei hin rephōr anmatung hei: Sinai nêrdiram, Kibroth Hattaavah (a-emak leh “Akalôp hei thlân”), Hazeroth, Rithma, Rimmon Perez, Libnah, Rissa, Kehelatha, Shepher Tlâng, Harada, Makheloth, Tahath, Terah, Mithka, Hashmona, Moseroth, Bene Jaakan, Hor Haggidgad, Jotbatha, Abrona, Eziongeber, Zin ramthōi (hichu, Kadesh) khana Edom ram a’nchaina Hor Tlânghei hi kae.

³⁸ RŌNGPU ṭongpek a, Aaron thempu kha Hor Tlânga kaketou jo. Israel he’n Egypt anhei dahlonna kum 40 tlukna kum thla 5 tlukna kanikhō hma inkeipen ning, akum 123 katluk a khava hmun a ama kathi jo.

⁴⁰Canaan thlang intonga ka-om Arad reng in Israelhei kava jo hei ti ṭong athei jo.

⁴¹Hor Tlânga inphut Moab phaicham katlunga Israel he’n athōia hmunhei hin rephōr anleisak hei: Zalmona, Punon, Oboth, Moab ram shunga Abarim suksetna hei, Dibon Gad, Almon Diblathaim, Nebo Tlâng hnenga Abarim Tlâng, khana Jericho inphut Jordan dung re kea Moab phaicham, Beth Jeshimoth leh Acacia Phaicham kâr hei kha kae.

⁵⁰Jericho inphut a Jordan nirakan leh Moab phaichama khan RŌNGPU’n Moses hneng

⁵¹Israel sahei sik mansena ṭong aleipek. “Canaan ram shunga Jordan re nanke pha,

⁵²aram a ka-om mi rakip hei kha nantahnong sōt pet sik hei kae. Anhlung leh anthir limhei, khana ankamukna hmun rakip hei kha sukset hei ruh.

⁵³Aram kha lo una, ashunga khō tla ruh, ajârchu ke’n kapek jo chei kae.

⁵⁴Aphung rakip leh innshung rakip a vâng-enna nei-una ram kha insem ruh, karōi kha innshung kalena akalen, akasina akasin pek hei ruh.

⁵⁵Tâk-kha aram mihei kha nanhnongsōt mak he’nchu, nanhmit a innim kapō khana nansir nanpanga rahling aka-ang heia antamanrim sik chei kae, khana andōi sik chei.

⁵⁶Nanhnongsōt mak he’nchu, anmani suk manhmang sik a ṭōn kamantluk kapōa, nangni kasuk manhmang sik chei kae.”