Read Komrem MIJAHEI 35 Bible Online

MIJAHEI 35 - Komrem bible

MIJAHEI 35

¹Jerichoa inphut Jordan re kena Moab phaichama khan RŌNGPU’n Moses hneng ati,

²“Israel he’n ankarōi rahlânga inphut Levihei omna sik khōpui ṭhahrep leh khōpui kimvea sekhemna ram antapek nger sik hei kae.

³Khōpuihei hi Levi he’n anchen sik, khava hmun a khan ka-om sik hei. Sekhemna ram kha ansehei leh anran ralak-hei seng sik kae.

⁴Sekhemna ram kha khōpui bang vâng intonga inphut akimvea metre 450 kasei sik,

⁵khana adung avai an-anghrep ram kha asir-apang rakip a metre 900 kasei sik, khana khōpui kha alaiṭimtak a ka-om sik.

⁶Pase inkhat in tu mo inkhat manhret manloa athat jo’nchu, ahe’n phesōt a a’nthupna sik a khōpui 6 Levihei nantapek sik hei kae.

⁷anse khemna ram kha leh akhenga ram 48 tlukna sik a kae.

⁸Phung rakip a Levihei khōpui sik kha, aramkei asin leh alen dungjuia kachang sik.”

⁹ RŌNGPU’n Moses kha amanthei

¹⁰Israelhei hneng hri sik kha: “Nangni’n Jordan re nankea Canaan ram nanhlut pha,

¹¹tu mo pase inkhat in mi inkhat manhret manloa athat inchu atlânsōt leh a’nthupna sik khōpuihei kadei ruh.

¹²Khava hmun a khan ama kha, akathipa innkōhei phuhlō sik a inphut inhuk sik. Tu inkhat mikathat kha achunga ṭong tanna omloa thatbât sik changmak.

¹³Khōpui 6 kadei hei ruh,

¹⁴3 in Jordan nisōting, khana 3 nôk in Canaan ram shunga.

¹⁵Hivahei hi Israelhei leh ramlak mihei, pha bongkhat sik a aka-om hei leh aka-om inhnet hei inthupna khōpuihei kachang sik. Tu mo inkhat in mi inkhat manhret manloa athat jo’nchu khava khōpui inkhat a katlân inhlut thei sik.

¹⁶“Achang inum, mi inkhat in tu inkhat thatna sik a thir, hlung khana thing ahmang jo’nchu mithatna themmô achen jo, ama kha that sik kae.

¹⁹Akathipa inhnai puipen innkō khan mikathatpa thatna sik ratha anei. Ama’n mi kha ahmu pha athat sik.

²⁰“Tu inkhat in mi inkhat a-enkada a anam mathlûk a a-emak leh heikhat vâng avadeng hlona

²¹a-emak leh akut vânga avōkthat jo’nchu, mikathat changna themmô achen jo, that sik kae. Akathipa inhnai puipen innkōpa khan mikathatpa thatna sik ratha anei. Ama’n mi kha ahmu pha athat thei sik.

²²“Kachanga tu inkhat in mi inkhat enkadaloa athat jo’nchu, anamhlona a-emak leh heikhat vâng adenghlon jo ti jo rih.

²³Achangmak leh tu inkhat in a’nrepui changloa khana enkadaloa mi inkhat kha khōthlir lojenna hlung inkhat vâng adenghlon jo ti jo rih.

²⁴Hinghiva omchen a hinchu vaipui in phu kahlō sik akathipa innkōhei ôna ting ṭong tan sik changmak a mikathatpa ôna ting ṭong tan jôk sik kae.

²⁵Vaipui in akathipa innkōpa inphut mikathat themmô pa kha antahuksōt a, inthupna khōpuia antamanhlut sik kae. Ama kha khava pha Thempu Kalen thimak hma seng khan aka-om sik kae.

²⁶Mikathat themmô kachen khan inthupna khōpui kha adahlona

²⁷akathipa innkōpa khan ahmu sōt a athat jo’nchu, hiva phuhlō ṭōn hi mikathat tia inlomak ning.

²⁸Mikathat themmô kachen jo kha Thempu Kalen athimak kârseng inthupna khōpuia khan aka-om sik kae, athisō leh chu ama a-innting inlethei sik jo.

²⁹Hiva dânhei hi nan-omna hmun rakip a nangni leh nansōn leh pâr he’n nantahmang sik kae.

³⁰“Tu inkhat mikathat a maher jo kha sâkhi 2 a-emak leh akakhe a-om leh rōk manṭhe thei kae, a-emak leh that thei kae; sâkhi inkhat rōk chu mikathat maherna pui katluk tia inlomak ning.

³¹Mikathatpa kha that nger sik kae. Hiva karâkna hi sêr vâng intlen theimak ning.

³²Mi inkhat inthupna khōpuia atlân inhlut jo’nchu, Thempu Kalen thimak kârseng a-inna ahong inlena sik intlensōtna kha hnōmpek mak ruh.

³³Hivahi nantlo khâk jo’nchu nan-omna ram kha nantasuk manbōk sik jo kae. Mithat hin ram asuk manbōk, mikathatpa thina tei loa mi inkhat thatna jo ram kha suk manthengna sik rōi heite om mak.

³⁴Nan-omna ram kha suk manbōk mak ruh, ajârchu kei RŌNGPU eng kae khana kei Israelhei kâra aka-om eng kae.”