Read Komrem MIJAHEI 4 Bible Online

MIJAHEI 4 - Komrem bible

MIJAHEI 4

¹RŌNGPU’n Moses hneng ati

²Levi phunga Kohath intipa phung bâk-hei leh khana innshunghei rahming kha sun manhlut roh,

³khana RŌNGPU omna Pōn-inn shunga ṭōn katlo sik a rahōi kasōk pase kum 30 leh 50 kâra seng kha mazet manhlut hei roh tia ṭong amanthei jo.

⁴Anṭōn kha a’nthengpen chungchânga kae.

⁵RŌNGPU’n Moses hneng mansenahei hi aleipek. Rephōr ṭhet sik pha, Aaron leh asapahei kha Pōn-inna kahlut sik hei, Ṭongtep Bôm hmatinga pinden kha anlo mathlâk sik, khan vâng Ṭongtep Bôm kha antamakhu sik kae.

⁶Anmani’n shavun kaṭhatak vâng achung kha ankatōm sik, achung pena rahmurei pōn anpha sik, khava sōa akadomna thingtlōn antakathi sik hei kae.

⁷RŌNGPU hneng buhlom tōkna dokhâng chunga rahmurei pōn inkhat anpha a achunga thlenghei, bero mankhutna thlengkam, nei tōkna thleng pher, vomhrui theitui tōkna kōkleihei anda sik hei. Dokhâng chunga khan pha rakip a buhlom daṭhak sik kae.

⁸Khahei rakip chunga pōnsen makhu sik, shavun kaṭhatak vâng makhu nôk sik, khava sōa akadomna sik thingtlōnhei kha kathisōt sik kae.

⁹Rahmurei pōn anloa thaihmei matungna leh thaihmei, cheiche, thlengkông, Olive thai kōklei heirakip antamakhu sik kae.

¹⁰Khavakha leh ahmangchâk rakip shavun kaṭha vâng antakasûn heia akadomna sik kekim inkhat chunga antada sik kae.

¹¹Abânna sana maichâm chunga khan rahmurei pōn inkhat anpha a, shavun kaṭha inkhat anmakhu sik a kha, khava sōa akadomna thingtlōn antathōn sik kae.

¹²Hmun Inthenga hmangchâk be leh bûr rakip rahmurei pōn vâng ankasun sik, khahei chunga akaṭha shavun vâng anmakhu sik khan akadomna sik kekim inkhat chunga antada sik kae.

¹³Thai inno jo ravut hei kha maichâma inphut anlōksōt sik khana achunga pōn sendup inkhat anpha sik.

¹⁴Maichâm tōkna hmangchâk rakip achunga anda sik: khângbe, thirkōikim, vutlōkna leh thlengkông hei. Khava sōa shavun kaṭhatak inkhat achunga anmakhua akadomna sik thingtlōnhei ankathi sik.

¹⁵Rephōr kha aṭhet sik pha, Aaron leh asapa he’n anhmangchâk hei seng ankasûnsō phatō khan Kohath phung khan neinâk intheng kha antakadom sik kae. Kohath phung he’n neinâk intheng kha tônthei mak hei ning, akathi sik hei kae. Pōn-inn anthon chenna hivahi Kohath phunghei ṭōn rôn sik kae.

¹⁶Aaron thempu sapa Eleazar in Pōn-inn pumpui leh thaihmei sik a thai, bero, hmuchi inthoina, kano sik thai, Pōn-inn shunga neinâk lak RŌNGPU hneng a’ntōk rakip a-ensui sik kae.

¹⁷RŌNGPU’n Moses leh Aaron hneng ati,

¹⁸“Kohath phung kha anthi makna sik a,

¹⁹neinâk inthengpen hnenga manhlut mak hei ruh. Hivahi asōk makna sik a Aaron leh asapahei kha akahlut heia anmani tatlo sik ṭōnhlam antapek heia antamanthei sik hei kae.

²⁰Tâk Kohath sahei kha Pōn-inn shunga anhlut a thempuhei neinâk intheng thon sik a mantlukna kha an-en inum akathi sik hei kae.”

²¹RŌNGPU’n Moses hneng ahri,

²²Gershon phunga Levihei phungbâk leh innkōshung mija mazet manhlut roh,

²³khan chu kum 30 a inphut 50 katlung kâra pase, RŌNGPU Pōn-inn ṭōn katlo tor sik rahōi kasōk rakip kha mazet manhlut hei roh.

²⁴Anmani hiva neinâk antarôn sik kha anṭōn kae:

²⁵Pōn-inn ashung leh avâng katōmna, chung makhuna shavun kaṭha, ahlutna kot pinden,

²⁶Pōn-inn leh maichâm kimvea pindenhei leh hrui hei, khana sumpuk a hlutna pinden leh amatung sōtna hmangchâk rakip anmani tôn kae. Hihei sik a arangei seng kha antatlosōt sik kae.

²⁷Aaron leh asapa he’n Gershon sahei tatlo sik ṭōnhmun leh antatlo sik a ṭōn antapek rakip hei antlosōtna chunga Moses leh Aaron in anta-ensui ṭhak sik kae.

²⁸Pōn-inn shunga Gershon phung tatlo sik kha hi kae; Aaron thempu sapa Ithamar ṭongpekna thōia anta’nrôn sōt sik hei kae.

²⁹RŌNGPU’n Moses hneng, Levi phung Merari phung bâk-hei leh innkōshung mihei rahming teina sik a ṭong aleipek,

³⁰kum 30 a inphut 50 kâra pase, RŌNGPU omna Pōn-inna ṭōn tlona sik a rahōi kasōk rakip hei kha mazet manhlut roh tia aleihri pek.

³¹Anmani hin Pōn-inn thing kekim, rape khârna thingtlōn, kacho, khana matungna kōklei

³²khana Pōn-inn sumpuk a kacho, amatungna kōklei, hrui mankeina uchup, ahrui, khana amatung sōtna hmangchâk rakip phur karôn sik hei kae. Pase rakip in neinâk inkhat et anta’nrôn sik kae.

³³Merari phung he’n Pōn-inn shunga anṭōn rôn sik kha hi kae: Aaron thempu sapa Ithamar ṭongpekna thōia hihei hi antarôn sik kae.

³⁴RŌNGPU ṭongpek dungjuia, Moses, Aaron, khana phung hlamkakei he’n Levi phung shunga, Kohath, Gershon leh Merari 3 hei rahming antei jo. Phung bâk-hei leh innkōshung mihei kum 30 a inphut 50 kâra pase RŌNGPU omna pōn-inna ṭōn katlo sik a rahōi kasōk hei kha hinga anmazet manhlut jo: [Phung] — [Anja] Kohath — 2,750 Gershon — 2,630 Merari — 3,200 Inchunna: — 8,580

⁴⁹RŌNGPU’n Moses hneng ṭong aleipek dungjuia mi rakip anmazet manhlut jo hei; khana RŌNGPU’n Moses hneng ṭong ajōng pek dungjuia pase rakip ama ama ṭōn sik leh neinâk anta’nrôn sik ngansena inpek jo hei.