Read Komrem MIJAHEI 8 Bible Online

MIJAHEI 8 - Komrem bible

MIJAHEI 8

¹ RŌNGPU’n Moses hneng ati,

²“Aaron kha manthei roh, ama’n thaihmei sahri kha anmatungna chunga amatung pha, ahmating aser manvâr theina sik ada sik hei kae.”

³Aaron in ṭong kha ajuia thaihmei hei kha amatungna hmating amanhnget jo hei.

⁴RŌNGPU’n Moses hnenga aleimanhmu kapōhrep a thaihmei matungna kha achunga inphut athōi katlung antakhêng sana vâng a’nsyem kae.

⁵RŌNGPU’n Moses hneng ati,

⁶“Levihei kha alak Israel heia inphut ṭhensōt hei ina manthengsōt hei roh,

⁷Hing’hin tlo roh: mantheng sōtna tui vâng kathing thlōn hei roh, khan antaksa pumpui anhme vona sik leh anpōn ansôpna sik manthei hei roh. Khava sōa chu beklanga intheng sik hei.

⁸Khava sō nôk a sehrat chere inkhat anheikei sik khana hmuchi inthoina arangei, olive thai leh inhei jo jâmdi anta heichoi sik kae; khana nang in set-inthoina sik a sehratche ahlop inkhat nakeisa sik.

⁹Khava sōa Israel vaipui mantûp hei ina Levihei kha ka-omna Pōn-inn hma manngir hei roh.

¹⁰Israel he’n Levihei luchunga ankut antada sik kae,

¹¹khava sōa Aaron in Levihei kha Israel heia inphut ahlop bing kutchoi kapōa kahnenga atōksōt sik hei; kei ṭōn kha antlo theina sik a kae.

¹²Levi he’n sehratche 2 hei luchunga ankut anda sik: beklanga Levihei mantheng sōtna tlona sik a inkhat kha set-inthoina, inkhat kha romanvâm inthoina antōk sik.

¹³“Levihei kha ahlopdet kutchoi inkhat a kei hneng tōksōt hei roh, khana Aaron leh asapahei kha anka-ensui sik a da hei roh.

¹⁴Levihei kha keita anchangna sik a Israel heia inphut hing’hin ṭhensōt hei roh.

¹⁵Levihei kha nasuk mantheng heia natōksōt jo hei pha, Pōn-inn shunga ṭōn katlo sik a rahōi kachang sik jo hei.

¹⁶Anmani kha Israelhei sapa hma-inkeihei kathlenga kalei ngek jo hei kae; anmani keita rōk hei kae.

¹⁷Egypt ram shunga a’nte hma-inkei rakip kathat lai hei khan, Israel innshung rakip asapa hma inkeipen leh ran a’nte hma inkeipen rakip kha kei sik mônga kaleisuk mantheng jo hei kae.

¹⁸Tûnchu Israel a’nte hma-inkei rakip kahlang kathlenga Levihei kha kalo manhlut jo hei kae,

¹⁹Israel heia inphut kutchoi inkhat kapōa, Israelhei sik Pōn-inna ṭōn katlo sik leh Israel he’n Hmun Intheng kha anhei hnaidet pha suk inhmangna antaratō sik khana inphut anhrungna sik hei, ke’n Levihei kha Aaron leh asapahei hneng kangense jo hei kae.”

²⁰RŌNGPU’n Moses ṭong apek kapōa, Moses, Aaron khana Israelhei seng in Levihei kha anmantheng sōt jo hei.

²¹Levi he’n anbinga insuk intheng heia anpōn ansôp hei, khana Aaron in ahlopdet a kutchoi inkhat a RŌNGPU hneng atōksōt jo hei. Ama’n anmani sik a mantheng sōtna rōi atlosōt pek hei.

²²RŌNGPU’n Levihei chungchânga Moses hneng ṭong apek kapōa mipuihei khan heirakip antlo jo. Kha achang jâra Levihei kha Pōn-inn shunga Aaron leh asapahei thōia ṭōn katlo thei loi kachang jo hei.

²³RŌNGPU’n Moses hneng ati,

²⁴“Levihei kum 25 inphut ka-omna Pōn-inn shunga anṭōn et antatlosōt sik kae,

²⁵kum 50 inphut châm a’nhnga sik hei kae.

²⁶Khava sō leh, anmani’n ansōpui Levihei kha Pōn-inn ṭōn heia an-inthōpui thei sik hei, tâk-kha ama khet inchu heikhat atlo mak sik kae. Hing’hin nang in Levihei ṭōnhlam kha nasempek sik hei kae.”