Read Komrem MIJAHEI 9 Bible Online

MIJAHEI 9 - Komrem bible

MIJAHEI 9

¹Israel mihe’n Egypt anhei dahlonsō kum hni tlukna thla hma inkeipena RŌNGPU’n Moses hneng Sinai nêrdiram a ṭong ajōng hri jo. Ama’n ati,

²“Hiva thla shunga ni 14 tluk ning, kani tlâk a inphut, Israel he’n sedân chôndân rakip dungjuia Rakan Kût rehōi antanit sik jo kae.”

⁴Khava jâra Moses’n Rakan Kût antanit sik a mi amanthei jo hei,

⁵khana thla hma inkeia ni 14 tluk ning khōhleia Sinai nêrdiram a khanga anleihmang joa kae. RŌNGPU’n Moses aleimanthei kapōa heirakip anleitlo jo.

⁶Tâk-kha mi ṭhahrep chu mi kathi kalōng anlei tôn jâra kabōk jo hei, khana khava ninga Rakan Kût kha leihmang tor mak jo hei. Anmani Moses leh Aaron hneng kase heia,

⁷hinga anvahri, “Keini intheng mak jo ung, ajârchu kathi kalōng kanlei tôn jo, tâk keini’n heisa mo Israelhei kâra RŌNGPU hneng nei tōkna a’nvei theimak sik ung?”

⁸Moses’n amasôn hei, “RŌNGPUa inphut mansena katheimak kârseng khō rangei chot hi ruh.”

⁹RŌNGPU’n Moses hneng amanthei

¹⁰Israelhei hnenga hri sik khachu, “Nangni leh nansōnhei tu inkhat in kathi kalōng tôn jâra a’nthengmak jo pha a-emak leh khōhme kahlatak a akasesōt an-oma anmani’n Rakan Kût anhmang hnōm inchu,

¹¹thla khat sō leh nantahmang sik jôk a hnōmpek chei kae, thla hni changna ni 14 ninga khōhleia. Che philo buhlom leh thingbō kakha hei sâk una nit ruh.

¹²Thlai heikhat ajîng kania jîngkâr katlung inda mak ruh khana ran inthat hei kha aru suthlek mak hei ruh. Chôndân rakip dungjuia Rakan Kût kha nit ruh.

¹³Tâk-kha tu mo inkhat chu beklanga a’ntheng, khōhme’m se lo, khana Rakan Kût chu nit lo mi kha kami inkhat a lomak sik kae, ajârchu kei hneng kutchoi kha aphahrep a leitōk mak joa kae. Asetna kara kha athōk sik kae.

¹⁴“Ramlak mi nankâra aka-om he’n Rakan Kût kha anit hnōm inchu, sedân chôndân rakip dungjuia antanit sik kae. Ramlak mi leh aram shunga mi rakip chunga hiva dân hi a’nhmang sik kae.”

¹⁵RŌNGPU omna Pōn-inn kha matungsōt ning, sumtuk hlom inkhat he’ntôra akatōm jo. Jân leh sumtuk kha hmei kapōa inhmu.

¹⁷Chungting a’nhliksōt pha, Israel sahe’n anrephōr anthon ri, sumtuk ajōng ṭum sukna hmun a khan rephōr anmatungsōt nôk ria kae.

¹⁸RŌNGPU ṭongpek dungjuia mipui he’n rephōr kha anṭhet ri, khana ama ṭongpek dungjuia rephōr kha ansyemsōt nôk ria kae. Pōn-inn chunga sumtuk khan a-omlai seng rephōr mama a khan ka-om ri hei.

¹⁹Sumtuk kha a-omsôt lai seng RŌNGPU ṭong kha anjuia inthonsōt mak ri hei.

²⁰Pha khat leh chu sumtuk kha Pōn-inn chunga kanikhō ṭhahrep rōk ka-om ri, hei-achang inum, RŌNGPU ṭongpek dungjuia rephōra khan ka-om hei a-emak leh inthon hei.

²¹Kâklak leh chu sumtuk kha khōhleia inphut jîngkâr katlung rōk inkhang ri, sumtuk khan asesōt lim leh anmani’m inthonsōt ri heia kae. Sumtuk in a’nthonsōt akaia anmani’m kasesōt hei.

²²Sumtuk kha Pōn-inn chunga, ni 2, thla khat, kum khat khan chu akasôtdet a-omlai seng inthonsōt mak hei; khavakha a’nhliksōt pha anmani’m inthon ri hei.

²³RŌNGPU’n Moses hneng ṭong ajōng pek kha juina anrephōr kha anmatungsōt, khana anthonsōt ria kae.