Read Komrem MICAH 1 Bible Online

MICAH 1 - Komrem bible

MICAH 1

¹Judah renghei Jotham, Ahaz, khana Hezekiah hei reng changlai Moresheth khōpui mi Micah hneng RŌNGPU’n hiva ṭong hi aleipek. Jerusalem leh Samaria chungchânga RŌNGPU’n Micah hneng hihei seng hi aphôngpek.

²Nangni jât rakip, hivahi rangei ruh; raleichunga aka-om rakip hivahi rangei ruh! Chunghnung RŌNGPU’n nangni a-ensui sik chei. Rangei ruh! Ama’n marvâna abek-inna inphut ṭong ahri.

³RŌNGPU’n ahmun inthenga inphut kajōng; ama kajōng sik khana tlânglêr heia kalôn sik.

⁴Khana tlânghei kha ake thōia kazor sik hei hmeishunga khōilu kazor ka-ang sik; phaichamting kalōng sik hmebunga inphut tui ajōng kalōng kapōa.

⁵Israel he’n setna antloa Pathen andōi jâra hivaseng hi akasōk sik kae. Israelhei racham set jâra tu mo maset pek sik? Samaria, reng-innpui khet hi kae! Judah shunga limhei sik a maset pek sik tu mo? Jerusalem khet hi kae!

⁶Khava jâra RŌNGPU’n ati, “Ke’n Samaria hi ramhânga sukset manbuk kamanchang sik, vomhrui theikung lingna kamanchang sik. Khōpuia hlunghar hei kha phaichamting kaheihlon sik, khana khōpui innhmun kha akarōksaia ka-om sik jo.

⁷Mankatam limsyem rakip ahar-ahak a vōkkhōi sik hei, khava bek-inn noti hei hnenga inpek rakip hmeia romanvâm inthoina sik hei, alim rakip vōkkhōi dek-dôk a manbuk sik kae. Samaria he’n khahei kha vonchoi theina sik a inthoina kamukna heia antachen hei kae, tûnchu anka-en kada he’n bek-inn noti sik a anchoisōt sik jo hei.”

⁸Khava sōa Micah’n ati, “Hiva jâra hin kei malung kanguia ṭajai kasui sik. Kei kake rōksaia khana pōnbōia kalôn sik eng. Ram-ui kapōhrep a inhrâm sik eng khana Valen kapōa kakhōng sik eng.

⁹Samaria natna bi dam tor mak ning, khana Judah’n khava kapōa khōdeng theina aratō sik; insuksetna khan kamihei omna, Jerusalem kekot a hong katlung jo.”

¹⁰Nihmai môkna ṭong kha Gath a ka-om ni-indōipui hei kha manthei mak hei ruh; nankaṭap um manhmu mak hei ruh. Beth Leaphra mipuihei, vaiphin kâra inlet inna nanlung dongna kha malâr ruh!

¹¹Shaphir mihei, rehring sura miram a se ruh, pōnbōi leh inzak pum a. Zaanan mihei kha ankhōpuia inphut hongsōktor mak jo hei. Bethezel he’n ṭajai ansuina rasa nanthei pha, khava khan inthupna hmun om mak jo ti nanmanhret sik.

¹²Maroth he’n malung kachâmtak a inthōpuina anhngâk, ajârchu RŌNGPU’n Jerusalem hnengtak a khōdeng theina ahong mathlung joa kae.

¹³Lachish a ka-om nangni, shakorhei kha shakor gâri keina sik a hnamke mando ruh. Nangni’n Israelhei setna omchen nanloa Jerusalem setna nanmathlâk a kae.

¹⁴Khana tûnchu, Judah mihei, Moresheth Gath khōpui kha inṭhenna chibei tlo ruh. Israel reng he’n Achzib khōpuia inphut inthōpuina hmumak hei ning.

¹⁵Mareshah mihei, RŌNGPU’n nankadōi, nankhōpui kahlō sik hei kut a apek sōt sik chei. Israel hlamkakeihei Adullam khurpuia kase heia inthup sik hei.

¹⁶Judah mihei, nanlungset nansahei sik a ṭajai suina nansam vomankek hei ruh. Hmuthong kapōhrep a nanlu mankek ruh, ajârchu nansahei kha rehringa anṭhōisōt sik jo hei.