Read Komrem MICAH 4 Bible Online

MICAH 4 - Komrem bible

MICAH 4

¹Akahong sik kani heia Bek-inn ngirna tlâng kha tlâng rakip kâra a’nshângpen inkhat kachang sik. Jât katamtak hei khana khan hong katlân inhlut sik hei,

²khana anmi he’n anti sik, “Israelhei Pathen Bek-inna, RŌNGPU tlâng chunga vaketou rih. Ama’n amantlo hnōm me kha amanthei sik me; ama’n akadeisōt hlam a khan kase sik me. Ajârchu RŌNGPU mantheina kha Jerusalema inphut kajōng, Ziona inphut amihei hneng ṭong ahri.”

³Ama’n hmun akahla leh akahnaia ratha kaneihei kâra innâk-insena ṭong atanpek sik hei. Anchemjâm hei lângkôn lôngkhuma ankheng sik ankasei hei theikung bâk manhlingna chemcha a ankheng sik hei. Jât he’n rea sehêr mak hei ning, re tlona sik intluk hêrmak jo hei ning.

⁴Mi rakip ama ama vomhrui thei rahōn leh theichang kunghei kâra kamōnga ka-om sik hei khana ama kha tûte’n maṭhitna pek mak hei ning. Chunghnung RŌNGPU’n hivahi atep jo kae.

⁵Jât rakip in ama ama pathen ankamuk a anjui, tâk-kha keini chu RŌNGPU kan-Pathen kha are-rea sik kanjui sik khana kankamuk sik jo.

⁶RŌNGPU’n ahri, “Ke’n karâkna kapek mipuihei, rehring surna inrengna kathok hei mantûpna sik pha kha kahong jo.”

⁷Anmani anke katlek a ram kahlatak a ka-om jo hei, tâk dahlona ka-om hei kha leh hringkhōther manphutna kanei sik, khana anmani jât kalentak hongkachang sik hei. Zion Tlâng chunga ke’n anmani khava pha khana inphut ahei tik a sik vai karôn sik.”

⁸Khana Jerusalem nang, Pathen in kemōng kakhem inkhat kapōa amihei ahrungna hmun, vōi khat narengram sik a reng-innpui lakachang nôk sik che.

⁹Heisik a mo khangtuk rasa inshângtak a akaṭap che? Nuhmei naiha kaphu kapōa hei sik a mo natna nade? Reng naneimak jâra mo, khana nang mansena kaneihei anthisō jâra mo khanga natlo?

¹⁰Jerusalem mihei, nuhmei naiha kaphu kapōa inlet ruh inkōi ruh, ajârchu nangni’n khōpui kha nanda hlona ramhânga aka-om sik jo chei kae. Nangni Babylona kase sik chei, tâk khana khan RŌNGPU’n nangni nanka-en kada heia inphut ahuk sik chei.

¹¹Jât katamtak in nangni buhluna sik inchun heia kae. Anmani’n anti, “Jerusalem hi nimanhmang nger sik kae! Hiva khōpui inhmangna kha nihmu sik kae!”

¹²Tâk-kha hiva jât-hei hin RŌNGPU malung kha manhret mak hei. Hmuchi kara saphōra vōk mathlâk sik a manbuk jo kapōa anmani kha karâkna pek sik a khôm mantûp jo hei kae ti kha anmani’n manhret mak hei.

¹³RŌNGPU’n ahri, “Jerusalem mihei, se ruh, nan-inrepuihei kha vakarâk hei ruh! Ke’n nangni thir raki kanei, sum-êng ke matin kanei sehratche kapōa ratha hratna kapek sik chei. Nangni’n jât katamtak nansuk manram sik hei khana rumhrat a mihei nei leh hao antachom kha, vânhnōi pumpui Rōngpu kei hneng nanta heitōk sik kae.