Read Komrem MICAH 6 Bible Online

MICAH 6 - Komrem bible

MICAH 6

¹Israelhei chunga RŌNGPU ṭongnei hi rangei ruh. Thōi roh, O RŌNGPU, naṭongnei kha keisō jo roh; tlâng leh hmebung he’n heimo nahri kha thei hei rasoh.

²Tlânghei nangni, ahei tik a raleichung inhmunhei nangni, RŌNGPU ṭongnei hi rangei ruh! RŌNGPU’n amihei kadōia ṭong aneia kae. Israel chunga masetna ahei rôn sik.

³RŌNGPU’n ati, “Kamihei, ke’n nanhnenga heimo katlosōt jo? Kei hi heituk a nanrôn kahrik akachang jo eng mo? Eimasôn ruh.

⁴Egypt a inphut kaheiṭhōisōt chei; nansōk changna inphut kahuksōt chei; nangni kaṭhōisōt sik a Miriam, Aaron khana Moses kahei tir hei.

⁵Kamihei, Moab Rengpa Balak in nanchunga heimo tlo sik a amantluk khana Beor sapa Balaam in ama heikhonga mo aleimasôn kha mandonsōt ruh. Acacia inphut Gilgal jōnna hlam a akasōk hei kha mandon ruh. Hiseng hi mandonsōt ruh khana nangni huksōtna sik katloseng kha nanmanhret sik jo.”

⁶Marvân Pathen, kamukna sik a kahong pha ke’n RŌNGPU hneng heimo kahei choi sik? Sehrat rala kaṭhapen kha romanvâm inthoina sik kahei choi sik mo?

⁷Kemōng lishing raja achangmak leh olive thaitui tuilōng kapōa kahei choi inchu RŌNGPU kha amalung katlai sik mo? Kasetna jâra kasapa hma inkeipen kha katōk sik mo?

⁸Changmak, RŌNGPU’n akaṭha kha ahri pek jo me. Ama’n einia inphut amadu khachu: akadik tlo sik, inlungsetna injônjet a malâr sik, khana insinsaktak a Pathen leh inṭhōi sik hi kae.

⁹RŌNGPU ṭit sik hi akasing ṭōn kae. Ama’n khōpui abek a ati, “Khōpuia a’ntûp a ka-om nangnihei, rangei ruh!

¹⁰Mikaṭhamak-hei innshung heia malung intheng loa antahmu karōi anmanbuk hei. Kei tahōt akadik mak tena hmangchâk anhmanga kae.

¹¹Akadik mak tena kher leh tena hlung kahmang hei kha heikhonga mo karangei mandam tor sik hei?

¹²Mikahao nangni he’n misarahei nanmanbōi heia kae, nangni nankhenga malei kasei chei kae.

¹³Khava jâra, nansetnahei jâra nangni manhmangna sik leh suksetna sik ṭōn kha kaphutdek jo kae.

¹⁴Nangni’n nansâk sik, tâk khoptor mak tin, kadiktak a chu nanvon kaṭâm ṭhak sik. Nangni’n ṭōn nantlosōt sik, tâk khahei kha damanbuk tor mak tin chei; nangni’n nantabuk hei kha ke’n rea kamanhmang sik hei.

¹⁵Sachi bechi nanvor sik tâk akara khômmak tin chei. Olive thei nan-ep sik, tâk ahei tik a’m hmangtor mak tin chei. Ju nansyem sik, tâk ahei tik a’m inmak tin chei.

¹⁶Hiseng hi kasōk sik, ajârchu nangni’n Reng Omri leh asapa Ahab omchen kaṭhamak kha nangni’n nanjuia kae. Nangni’n anmani mantlukna hei nantlo manjôna kae, khava sik a nangni kamanhmang sik chei, khana mi rakip in anhnōise sik chei. Hmun rakip a mihe’n mater tak a antlo sik chei.”