Read Komrem MICAH 7 Bible Online

MICAH 7 - Komrem bible

MICAH 7

¹Inhōrna kase jo kae! Kei hi, vomhrui theikunga leh thingkunga akara ṭhōt sik inkhatbek a’nhmu mak vonṭâm kade mi inkhat kapō jo eng kae. Vomhrui leh theichang kara akatui rakip akhenga anṭhōtpet joa kae.

²Hiva ram a hin malung intheng om mak jo, Pathen ṭong kajui inkhatbek um om mak. Mi rakip in mi thatna sik a pha kaṭha anhngak a kae. Mi rakip in anram mi anhnong heia kae.

³Anmani ankhenga ṭhatmak tlona kathemhei. Vaikarôn leh ṭongkatan he’n sêrmarûk sâk sik ander. Aṭong kase, ratha kanei mi khan amanthei heia, anmani inchun heia ṭōn anmantluk a kae.

⁴Ankâra akaṭhapen leh malung inthengpen he’m heite akahnem mak hardông kapōhrep hei kha kae. Anmani kahrunghei, sânkathem heia inphut gîkna aleipek hei kapōa, Pathen in mihei karâkna apekna sik kani kha kajōng jo. Tûn anmani inhmak jo heia kae.

⁵Na-innsir na-innven mihei a-emak leh naṭhōnhei kha taksen mak hei roh. Nanuhmei hneng kapha’m naṭong hri sik insing thei roh.

⁶Hiva phahei hinchu, ansapa he’n anpahei kha mikamoa anlo sik hei, ansanu he’n annuhei andōi sik hei, khana hmōinu he’n anterpi hei an-innâk pui sik hei; mi inkhat inrepui kha a-innshung mi mama kachang sik hei.

⁷Tâk-kha, kei chu RŌNGPU kha ka-en ṭhak sik; ani kahuk sik Pathen kha taksentak a kalahngak sik. Ka-Pathen in kaderna athei pek sik eng.

⁸Nikadōi he’n kantlâksamna chunga inpâkna sik ajâr neimak hei. Keini katlu ung, tâk alakathō nôk sik ung kae. Tûn keini inthim shunga ka-om ung, tâk RŌNGPU’n vâr alapek sik ung kae.

⁹Keini RŌNGPU kadōia setna kanleitlo jo, khava sik a tûnchu pha chomkhat sik a ahnuk natna kha kantade sik kae. Tâk-kha achaina ting chu ama’n keini ahrung sik ung khana kanchunga ṭhenahei kha amandikpek sik ung. Khōvâr hmun a aṭhōi sik ung, khana ama huksōtna kahmu theia kahring sik ung.

¹⁰Khavakha kankadōi, “RŌNGPU nan-Pathen khon mo ka-om jo?” tia ani kader kankadōi mama hei kha’n anhmu sik khana inzak sik jo hei. Hlam a bōnthlōk kapōa chōnnek a, tor a anka-om kha kanhmu sik hei.

¹¹Jerusalem mihei, khōpui bang vōi khat sak nôkna sik pha kha kahong jo. Khava pha nanram ramri kha manlensa sik kae.

¹²Namihei aram aram a inphut hong inle sik jo hei, nisōtinga Assyria inphut, thlang tinga Egypt a inphut, Euphrates ramkeia inphut, tui-ôngpui hmun kahla leh tlâng kahla tatak a inphut a kahong sik hei.

¹³Tâk-kha raleichunga aka-om hei malung ṭhatmak jâra, ralei hi nêrdiram hongkachang sik jo.

¹⁴Namihei, nakadeisōt jo hei kemōng kakhempa inkhat kha chang roh, RŌNGPU. Ramhânga an-inchai kathek a an-om inum ankimvea ram thai omna, ram kaṭha ka-om hei. Tenlaia kapōa, Bashan leh Gilead phidông kekna ramlena sehei sona invei hei rasoh.

¹⁵Egypt a inphut naheiṭhōisōt ung laia naleitlo kapōa keini sik a ṭōn-inlak kha tlo roh, RŌNGPU.

¹⁶Jât he’n hivahi anhmu sik khana heijalai ratha annei inum inhōrna katlangpek sik hei. Inhmakban heia anbei ankam sik, ankōr ansing sik hei.

¹⁷Mari kapōa vaiphin kâra inkhōn sik hei, ṭit leh innok pum a rekur shunga inphut heikasōk sik hei. Anmani’n ṭitpum a RŌNGPU kan-Pathen hneng hong inhe sik hei.

¹⁸O Rōngpu, nang kapō Pathen lak om mak; akahringa ka-om namihei setna narangei mandam pek hei. Are-rea sik hnuknat pum a om mak che, tâk nalungsetna injônjet kha keini manhmu sik a inpâk che.

¹⁹Keini chunga vōi khat nalungset nôk sik ung kae. Kansetna hei kha nake vâng nachōn rachia tui-ôngpui thōia nahlon sōt sik hei!

²⁰Tenlaia kanpu kanpahei hneng naṭong leitepna kapōa, Abraham leh Jacob sōn leh pârhei, namihei hneng nalungsetna injônjet leh taksenthei nachangna kha namalârpek sik jo hei.