Read Komrem NAHUM 1 Bible Online

NAHUM 1 - Komrem bible

NAHUM 1

¹Hivahi Elkosh khōa ka-om Nahum hmangtalâra Nineveh chunga aleihmu ṭong kha kae.

²RŌNGPU Pathen in ama indōipuihei madimmak; ama kadōihei kha akarâk hei. Ahnuknat a antlona man apek male hei.

³RŌNGPU kha ahnuk nabeimak tâk-kha ama ratha kaneitak kae khana ṭhena kaneihei kha karâkna pek loa masō hêrmak. RŌNGPU sena khan thlipui hong kahrâng; sûmphai hei hi akebōk vaiphinhei kae!

⁴Ama’n tuipui ṭong apek a, kachâr ri! Ama’n tuidunghei amanchâr ri hei. Bashan hleipuk kha invōi, Carmel Tlâng kha hong ka-êng, khana Lebanon reipâr hei kaṭi ri hei.

⁵RŌNGPU hmaikunga tlânghei innok hei; ahmai kunga hmebunghei kajor hei. RŌNGPU ahon’lâr pha ralei hi innok; vânhnōi leh amihei seng ṭit jâra innok hei.

⁶Ama hnuk natna hmun a, tu mo akahringtor sik? Ama hnuknat ṭit ka-om tak a khan tu mo akahringtor sik? Hmeimale kapō ahnuknat kha ahei bunthlōn, ahmai kunga hlunghei um innoi heia vaiphin kachang hei.

⁷RŌNGPU kha akaṭha kae; amihei khōdengthei pha ahuk hei, ahnenga ahong kahlut hei kha kaṭha a-ensui hei.

⁸Tuishâng kalen ahongtlen inhnak kapōa ama ka-en kadahei amanhmangsō hei; ama kadōihei kha thina apek heia kae.

⁹RŌNGPU dōina heimo namantluk? Ama’n asukmanram sik jo che. Vōi khat kakhea tûte’num ama indōipui tor mak hei.

¹⁰Rahling kachâr khana sapôt kachâr kapōa, ju-inruihei nangni ro manvâm sik jo chei kae!.

¹¹Nineveh, nangnia inphut RŌNGPU dōina katlo akaṭhamak ṭōn mantlukna kasip mihei kha heikasōk hei.

¹²Hivahi ami Israelhei hneng RŌNGPU’n ati kha kae: “Assyrianhei kha anhrat a antam inum, anmani suk manset heia manhmang sik hei kae. Kamihei inrengna kapek jo chei, tâk khavakha vōi khat tlo nôk mak jo ning.

¹³Tûnchu nanchunga Assyriahei ratha neina kha kamanbâng sik jo, khana nankhopna hrui kha kakeitan sik jo.”

¹⁴Assyriahei chunga RŌNGPU ṭongkam kha hi kae: “Anrahming karôn sik ansōn anpâr om mak jo ning. An-pathen inna limhei kasuk manhmang pek sik hei. Anmani akahring sik a rahōi sōk mak hei, anthlân invûmna sik kamantluk jo kae.

¹⁵Enruh, tlâng rekhat a inphut mi inkhat in ṭong kaṭha leh inṭhōia kajōng! Ama kha retorna ṭong kaphông sik a hlam a kajōng. Judah mihei, nanrevei kha tlo ruh khana Pathen hneng naṭong tepna kha pek ruh. Mikaṭhamak he’n nanrama ahei tik a’m re tlomak jo hei ning. Anmani tha manrampet jo hei kae!