Read Komrem HABAKKUK 1 Bible Online

HABAKKUK 1 - Komrem bible

HABAKKUK 1

¹Hivahi Habakkuk sânkathem hnenga RŌNGPU’n asânsōt ṭonghei kha kae.

²O RŌNGPU, intuk inthana inphut nahuk mak hma ung hin kaṭong narangei pekna sik enga, heituk kasôt mo inthōpuina sik a kabek sik che?

³Heisik a mo hiva khōdeng theina hi namanhmu eng? Khang khava dikmak ṭōntlo heikhong mo na-en hnâm tor? Insuksetna leh intuk intha na’n kei ani katōmbit jo, hmun rakip a innâk-insena kasip sō jo.

⁴Dân ṭong katlasam jo ahnemna hong om mak jo, khana akadik him-him intlo mak jo. Mikaṭhamak in mikadik kanek a ṭhatna achen pot jo, khana akadik hlam kha anthleng jo.

⁵Khava khan RŌNGPU’n amihei hneng ati, “Nasir navena ka-om jât-hei kha enroh, khana nang in nahmit hmun a kha inlak nasak sik. Nang in ṭong nathei pha nataksen tor mak sik ṭōn ṭhahrep katlo sik kae.

⁶Khava rahe kasetak, châm inhnga tet lo hei Babylon mihei kha ratha kamannei sik hei. Anmani vânhnōia kase heia milak-hei ram hlōna sik a antlo sik.

⁷Anmani’n ṭitna leh inpirna anmasō lele khana an-inlensakna khan anmani anbing sik a dân kachang hei.

⁸Anshakorhei kha rûtnu kanek a tlân kayâng hei, kahne von kaṭâm hei kanek a kakhôk chet hei. Anshakor remi he’n ram kahlatak a inphut kahong hei; anshakor he’n raleia anke ankatat a kae. Marhmu’n vate asur tinga kapōa jōng inthlur hei.

⁹“Ankadōi he’n intuk intha pum a re antor, anmani anhong hin mi rakip ṭit leh inpirna annei. Anrehring surmihei kha nêrdi kapōa katam hei.

¹⁰Anmani’n renghei kha hnōisetak a antlo hei khana ṭōnhmun kalen katlohei kha anmanuisō hei. Rekur he’n anmani tingtor mak hei, khava kur rape kunga ralei pi anbuk a anhlō ria kae.

¹¹Hivasōa thli kapōa kajongsōt hei, hiva mihei ratha neina kha Pathen kae.”

¹²RŌNGPU, anphutbia inphut nang chu Pathen che kae. Nang a’ntheng leh kumsôt a ka-Pathen che kae. RŌNGPU ka-Pathen kakahrungpa, nang in Babylonhei kha nakadei hei khana keini karâktorna sik a ratha napek hei.

¹³Tâk-kha hiva mikaṭhamak mikahōnhei hi heikhong mo na-en hnâm tor hei? A’nthengmak enna sik a nahmit kha intheng hêr, khana mipui he’n akadik mak antlona kha en-hnâm tor mak che. Khava jâra, anmani kanek a akadik chet mipuihei kha ansuk manhmang hei pha heisa mo aka-om hnâm che?

¹⁴Hlamkakei kaneimak nga, achangmak leh sihling phaivâm kapōa mihring hi heisa mo natlo hei?

¹⁵Ngasur kapōa Babylon he’n khoi vânga anman-ôk hei. Anmani nga surna len vânga ankei hei, mi ansur jâra khan inpâk a ka-ông hei.

¹⁶Anmani’n nga surna len hei kapha ankamuk heia inthoina antōk hei, ajârchu annga surna len hei khan chen akaṭhapen rakip kha apek heia kae.

¹⁷Anmani’n pha rakip a anchemjâm kha antahmang ṭhak sik mo khana lungsetna neiloa jât-hei hi antasuk manram sik jo hei mo?