Read Komrem HABAKKUK 3 Bible Online

HABAKKUK 3 - Komrem bible

HABAKKUK 3

¹Hivahi sânkathem Habakkuk derna kae:

²O RŌNGPU, naleitlo rakip kha kathei jo, nang ṭit leh kajana kasip eng. Nang in ṭōn kalen naleitlo hei kha, tûn keini pha hin tlo nôk roh. Nahnuk anat jo tâk inum lungset them roh.

³Edoma inphut Pathen kha kahong nôk a kae; Paran hmebung heia inphut Pathen intheng kha kahong. Ama lûrna’n marvân chunghei amakhusō; khana raleichung hi ama manpâk na’n kasip.

⁴Khō inphe kavâr kha leh inṭhōia ama kahong; khava arathahrat inthupna akut a inphut vâr kha heikasōk.

⁵Ahmating natna kha atirsōt akahnungting thina’n amanjui.

⁶Ama’n a’nhnga pha, ralei hi innok; ama’n ahei-en pha jât-hei anratha innok. Kumsôt a ka-om tlânghei kavōk-khōi; kumleikōa aka-om hmebunghei kha katlasuk hei, tenlaia aleilônna hmebunghei kha’m.

⁷Kushan mihei ṭitna kha kahmu, Midian mihei innok hei.

⁸RŌNGPU, nahnuknat kha tuidunghei tatlo mo? khangtuk a nahnuk akana kha tuipui tatlo mo kae? Nang in sûmphai kha nachōng; namihei re namantor hei lai khan thlipui sûmphai hei kha nang gâri leikae.

⁹Nasai kâp sik a naman tlukdek, nathehei kâpsōt sik a nakamdek jo. Nakhō manphe khan raleichung hi akhōiṭhen.

¹⁰Tlâng he’n anhmu che pha, innok hei; thangvâna inphut tuihei insun inthla. Ralei thōia tui khan hong inhrung, khavahei tui in-nông kha inshângtak a hong kake.

¹¹Nathe kâp kayâng kavâr ja-jap khan nakasei vor kadi liplep khan kani leh thla amanngir hnâm hei.

¹²Nahnuknat a ralei napetana kase che; nahnuknat a jât-hei nachōnpha hei.

¹³Namihei hukna sik a kasesōt che, nakadeisōt reng kha hukna sik a. Mikaṭhamak-hei hlamkakei kha navōk mathlûk a akahnung kajuihei seng pui katluk a nasuk manhmang hei.

¹⁴Nathehei khan arehlam kakei kha nakâp manthang khavakha sarahei chunga marûk a suk manbōina katlohei ṭong-êng sōna kapōa, thlipui kapōa, keini chai kathekna sik a ahong pha khan.

¹⁵Tuipui kha nashakorhei namanchōn hei, ratha kaneitak tui kha hong kasōk a kae.

¹⁶Hiseng hi kathei jo, kei innok eng; ṭit jâra karakam innok jo. Kataksa hi innok inthing jo, kake intlunhrek a thontor mak eng. Pathen in keini ani kabuhlu hei akarâkna sik pha kha ahong tlung sik kha sip katia kanhngâk sik.

¹⁷Theipōng kung in a’nramak inum, vomhrui jâma vomhrui akaimak inum, Olive thei a’nramak inum, hleia hmuchi a’nramak jo’num, kemōnghei anthipet a serōng arōkpet jo’num,

¹⁸kei chu inpâkna leh ningṭhatna kasip sik eng, ajârchu RŌNGPU Pathen kha kakahuk inhring kae.

¹⁹Chunghnung RŌNGPU’n rathahrat apek eng. Ama’n shakhi kapōa kakethon amanṭhe pek mak, tlâng chunga ahrung enga kae.