Read Komrem HAGGAI 1 Bible Online

HAGGAI 1 - Komrem bible

HAGGAI 1

¹Persia rengkalen Darius vairônna kum 2 tlukna shunga thla 6 tlukna kani hmakakei ning, RŌNGPU’n Haggai sânkathem kha ahmanga ṭong ajōng hri. Aṭong khachu Judah ram vaikarônpa, Shealtiel sapa Zerubbabel leh Thempu Kalen, Jehozadak sapa Joshua sik a kae.

²Chunghnung RŌNGPU’n Haggai hneng ahri, “Hiva mihei hin tûn hi Bek-inn sak nôkna pha changmak anti.”

³Khana RŌNGPU’n sânkathem Haggai kha ahmanga hiva ṭong hi mihei hneng apek hei:

⁴“Kamihei, kabek-inn chu katlek a a-omlai hin heisik a mo nangni’n inn kahōi tatak a aka-om sik chei?

⁵Nanchunga akasōk kha hmumak chei mo?

⁶Nangni’n sâng hingja nanvor, tâk apâr ajingte rōk nankhôm. Sâk sik a bu nannei, tâk nanvon khopna sik katluk a neimak chei. In sik a vomhrui ju nannei, tâk inruina sik katlunga neimak chei! Pōn nannei, tâk nanlumna sik katluk a neimak chei. Khanna ṭōnkatlo he’n anhringna sik a hlotor mak hei.

⁷Hivahei hi heijâra mo akasōk hmutor mak chei mo?

⁸Tûn hmebung heia vake ruh, thingpum hei valo ruh, Bek-inn sak nôk jo ruh; kha a-enchu kei katlai sik eng khana kei hi kamuk hlam kasōk a nankamuk sik jo eng.

⁹“Nangni’n sâng katamtak khôm sik a inhōr chei, tâk achikte rōk kachang rih. Inn-na nanhei rôn manhlut pha, ke’n kabeia kasem mantlen sōa kae. Heisa mo khavakha katlo? Ajârchu nangni inkhat et in nan-inn ṭōn tlona insaler et cheia kei bek-inn khachu insetsōa ka-om joa kae.

¹⁰Khava jâra khō sûrmak jo khana heite inkhat kekthei mak a kae.

¹¹Raleia, ahmebung heia, sabi hleia, vomhrui thei rahōna, khana olive hleia, ralei in akeisō kara rakip, mihring leh ranhei, khana nangni’n mankek sik a nantlona rakip hei chunga, ke’n khō manchârna kaneia kae.”

¹²Khana Babylona rehring sura anlei oma inphut ahong inle jo mihei khana Zerubbabel leh Joshua khan RŌNGPU an-Pathen in tlo sik a ahrina kha antlo joa kae. Anmani kha ṭitna aneia RŌNGPU sânkathem Haggai ṭong kha anjuia kae.

¹³Khan chu RŌNGPU ṭong kha Haggai in mipuihei hneng ahri jo, “Ke’n nangni ka-ompui sik chei, khavakha kei intepna kae.”

¹⁴Bek-inn sakna sik a RŌNGPU’n mi rakip amathok jo hei: Judah vaikarôn Zerubbabel; Thempu Kalen Joshua, khana rehring sura inphut ahong inle hei rakip. Anmani khan an-Pathen Chunghnung RŌNGPU Bek-inn sakna ṭōn kha anmanphut jo,

¹⁵Persia rengkalen Darius vairôn kum 2 tlukna shunga thla 6 tlukna ni 24 ning khan ṭōn kha anphut joa kae.