Read Komrem ZECHARIAH 12 Bible Online

ZECHARIAH 12 - Komrem bible

ZECHARIAH 12

¹Thangvân inlârsōt, ralei kasyem khana mihringhei hringna kape RŌNGPU hnenga inphut Israelhei chunga ṭong ajongpek kha hivahi kae. Ama’n ati,

²“Jerusalem kha ke’n vomhrui ju kōklei inkhat kapōa kasyem sik; akimvea ka-om jât he’n an-in sik khana vomhrui ju-inruihei kapōa anhek anhek a kalôn sik hei. Anmani’n Jerusalem ankatōm pha, Judah khōpui ralak-hei kha’m anhlōsō sik hei.

³Tâk-kha khava kani ajōng tlung pha, Jerusalem kha hlung kahriktak kapōa kasyem sik jo, khava indom sik a a’ntluk jât khan abinga intôn sik. Raleichunga jât rakip ama buhluna sik a inchun sik jo hei.

⁴Khava pha khan, ke’n anshakorhei kha ṭitna kapek sik hei khana ankatôr hei kha kamanvetpek sik hei, ke’n Judah mihei kha ka-ensui sik hei, tâk anmani kadōihei shakor kha anhmit kamanchopek sik hei.

⁵Judah innshung he’n anbinga anti sik, ‘Chunghnung RŌNGPU’n Jerusalema ka-om mihei hneng ratha apek jo hei.’

⁶“Khava pha, Judah phung mihei kha ram a achangmak leh hleipuk a sâng kahmin kâra hmei kasûk kaman-ang sik hei, ankimvea ka-om jât-hei ansuk manhmangsō sik hei. Jerusalem mihei khachu khōpui shunga huksōt a ka-om sik hei.

⁷“RŌNGPU ke’n Judah remihei hneng ahma inkeipena torna kha kapek sik hei, khavakha David sōnhei leh Jerusalema mipuihei tachen sik kajana kha Judah mi ralak-hei chen kanek a alenchet makna sik a kae.

⁸Khava pha RŌNGPU’n Jerusalema ka-om mihei kha ahuk sik jo hei, ankâra akatlasam pen kha’m David kapōa kahrat sik jo. David sōn leh pârhei khan RŌNGPU ngevahei kapōa, Pathen kapōhrep a hlam ankei sik jo hei.

⁹Khava pha Jerusalem buhluna sik a a’ntluk jât rakip ke’n kasuk manhmang sik jo hei.

¹⁰“David sōn leh pârhei leh Jerusalema mipuihei kha lungsetna leh der hnōmna malung kapek mansip sik hei. Anmani’n antasun hlon mi inkhat kha an-en sik jo, naipang inkhat rōk chunga ṭajaisui kapōa kaṭap sik hei. Sapa hma inkeipen athi pha ṭajai kapōa anmani’n malung kana tak a ansui sik.

¹¹Khava pha Jerusalem khōpui shunga ṭajai suina kha Megiddo phaichama Hadad Rimmon sik a rahnaktak a ṭajai suina kapō kachang sik.

¹²Ram shunga innshung rakip in ṭajai ansui sik: David sōnhei, Nathan sōnhei, Levi sōnhei, Shimei sōnhei, khana innshung ralak he’n ansui sik. Innshung rakip in anbing et a ṭajai ansui sik, innshunga paseseng khan nuhmeihei leh anhlop-hlop a ansui sik.’