Read Komrem ZECHARIAH 13 Bible Online

ZECHARIAH 13 - Komrem bible

ZECHARIAH 13

¹Akahratpen RŌNGPU’n ahri, “Khava pha kha ajōng tlung pha, David sōn leh Jerusalema ka-om mihei setna leh limsyem kamukna kha mantheng sōtna sik tuihnâr inkhat jōng kasōksōt sik.

²Khava pha, ram shunga inphut limsyem rahminghei kalosōtpet sik jo hei, tûte’num mandonsōt mak jo hei ning. Sânkathem eng kati mi kha ke’n donmak ning khana limhei kamukna malung kalosōt sik jo.

³Tu mo inkhat in sânsōt ṭong ahriṭhak inchu, ama kanei anu leh apa heikhet khan ama kha that sik kae tia antahri pek sik kae, ajârchu RŌNGPU ṭong sânsōt sik a ati leh akadik mak jôk ahrisōt a kae. Ama’n ṭong asânsōt pha, anu leh apatak hei khan antatuk hlon sik kae.

⁴Khava pha kha ajōng pha, sânkathem in hmangtalâr chunga a’nlensak mak sik hei kae, a-emak leh sânkathem inkhat a’nhlem sakmak sik, a-emak leh mihei hōnna sik a sânkathem zakkō a’nvonmak sik kae.

⁵Khava kanek a, ama’n ahri sik, ‘Kei sânkathem changmak eng. Kei chu hlei kathlō mi eng kae, kahringkhō katlung bit a hlei kathlō.’

⁶Tu mo inkhat in ader a, ‘Na-ôp a abi hei hi heitatlo mo?’ ati’nchu, ama’n amasôn sik, ‘Kaṭhōnpa inna antamantôn eng kae.’”

⁷Akahratpen RŌNGPU’n ahri, “Thōi roh, chemjâm, khana kei sik a ṭōnkatlo kemōng kakhempa so vabuhlu roh! Ama so that roh, khana kemōnghei inchai kathek sik jo hei. Ke’n kamihei kabuhlu sik jo hei

⁸khana hiva ram pumpui shunga aka-om mi sem thuma semhni kathi sik hei.

⁹Khana alakahring sem thum changna hei kha hmei in dangka amanthengsōt kapōa ke’n ka-enmansin sik hei. Sana enmansinna kapōa ke’n ka-enmansin sik hei. Khava sōa kahnenga derna anhongnei sik, khana ke’n kamasôn sik hei. Anmani kamihei kae tia kahri pek sik hei, khana anmani’n kei hi an-Pathen eng kae tia anhrisōt sik jo.”