Read Komrem ZECHARIAH 2 Bible Online

ZECHARIAH 2 - Komrem bible

ZECHARIAH 2

¹Hmangtalâr hlop inkhat a atena tekam kachoi pase inkhat kahmu.

²Ke’n ahnenga kader, “Nang khon mo akase sik che?” Ama’n amasôn eng, “Jerusalem adung avai tena sik a akase eng kae.”

³Kahnenga ṭongkahri ngeva kha hmating kasea ngeva hlop inkhat in intōpui sik a akahong kha kaleihmu.

⁴Ahma inkei ngeva khan inkhat hnenga khan ahri, “Tlân roh khana tena tekam kachoi rethernai hneng manthei roh ti chu Jerusalema mihring leh ranhring katamtak hong ka-om sik hei khachu rape nikhâr a akan sik hei changmak.

⁵RŌNGPU’n ṭong aṭep jo, ti chu ama khet khōpui hrungna sik a akimvea hmei rape kachang sik jo khana ama’n khana khan alûrna rakip leh ka-om sik jo.”

⁶RŌNGPU’n amihei hneng ṭong amanthei hei, “Ke’n ram rakip a kachai kathek jo hei. Tâk-kha tûnchu, nangni rehringa anta heisur hei, Babylona inphut heitlânsōt jo ruh, Jerusalema he’nle jo ruh.

⁸Nangni nankasukset hei kha kei hnenga mankatampen inkhat antasukset leh thakhat kae.” Achang jâra Chunghnung RŌNGPU’n amihei kasuk inbōi jât-hei hneng hiva ṭong hi ava inthei sik a ahei tir eng:

⁹“RŌNGPU khet in nangni re kadōi sik chei, pha khat a nansōk kachang hei khan nangni ansukset sik jo chei.” Hivahi asōk pha, Chunghnung RŌNGPU’n kei hi ajōngtir eng kae tia nanmanhret sik.

¹⁰RŌNGPU’n ahri, “Jerusalem mihei, inpâk a hla sak ruh! Nangni kâra aka-om sik a kei kajōng jo eng!”

¹¹Khava pha khan RŌNGPU ângshunga jât katamtak hongkahlut sik jo hei khana ami hongkachang sik jo hei. Ama kha nankâra ka-om sik jo, khana ama’n kei hi nanhnenga ajōngtir eng kae tia nanmanhret sik jo.

¹²Judah hi vōi khat nôk aram intheng shunga RŌNGPU karōipui lakachang sik, khana Jerusalem hi alungsetpen khōpui kachang sik.

¹³RŌNGPU hmaikunga mi rakip sip ti ruh, ajârchu ama kha a-omna hmun inthenga inphut kajōnga kae.