Read Komrem ZECHARIAH 7 Bible Online

ZECHARIAH 7 - Komrem bible

ZECHARIAH 7

¹Darius reng changna kum 4 tlukna, thla 9 tlukna (Kislev) Karam thla ni 4 tluk ning RŌNGPU’n ṭong hi apek eng.

²Bethel mipui he’n Sharezer, Regemmelech leh anmihei Chunghnung RŌNGPU Bek-inna, RŌNGPU vângpekna kader sik a

³khana thempuhei leh sânkathemhei hneng hiva ṭong hi akader sik a anheitir hei: “Bek-inn a’nset jo jâra kum katamtak a kantaheitlo jo thla 5 tlukna bu hngōia ṭajai suina kha kantalatlo ṭhak sik mo?”

⁴Kahnenga RŌNGPU ṭong akajōng kha hivahi kae.

⁵Ama’n ati, “Ram a mipuihei leh thempuhei kha manthei hei roh khachu hiva kum 7 shunga thla 5 leh 7na buhngōi leh ṭajai suina kha, kei kajana changmak.

⁶Anmani’n antasâk anta-in kha anbing von khopna sik a kae.”

⁷Jerusalem khōpui akhang sōt lai, mi kasip a an-omlai, khōpui kimvea rōk changloa thlâng ting ramkeia leh tlaitlâk ting hmebung pang heia mi katamtak anleiom lai hmalaia sânkathem heia inphut RŌNGPU’n ajōng hri kha hivahi kae.

⁸RŌNGPU’n Zechariah hneng aṭong kha apek:

⁹“Tenlai khan hiva ṭongpek hi kamihei hneng kaleipek hei: ‘Akadik nanta tlo-nger sik kae, khana khat leh khat chunga inlungset leh maritna nantamalâr sik kae.

¹⁰Reng-hmeihei, nu leh pa insamhei, nankâra aka-om khōhmehei, khana sâk leh in kaneimak hei ra-ôtmak hei ruh.’

¹¹“Tâk-kha kami he’n hivahi rangei mak hei. Anmalung ankama kae

¹²khana anmalung kha hlung kapōa anmansak a kae. Tenlaia sânkathemhei hneng ke’n kalei tir jo mantheina kha anrangei mak jâra kei anmani chunga kahnuk kana hêr.

¹³Ke’n ṭong kahri pha anmani’n anrangei mak jâra, anmani’n ander pha ke’n rangei pek mak hei eng.

¹⁴Thlipui kahrâng kapōa ke’n anmani miram a kamantlensōt hei. Hiva ram kaṭha hi ramhânga, ashunga tûte omloa andahlon jo.”