Read Komrem ZECHARIAH 9 Bible Online

ZECHARIAH 9 - Komrem bible

ZECHARIAH 9

¹Hivahi RŌNGPU ṭong kha kae: Ama’n Hadrak ram leh Damascus khōpui chunga karâkna sik a ṭongkamna anei jo. Israel jât rōk changloa Syria khōpui katlunga RŌNGPU ta kachang.

²Hadrak ramria Hamath kha’m, khana Tyre leh Sidon khōpui khana ankut themna rakip ama ta kae.

³Tyre khan rekur asyema sana leh dangka katamtak vaiphin kapō leoa abuk.

⁴Tâk-kha ama karōi rakip Rōngpu’n akhenga akasut sik. Ama karōihei kha tuipui shunga ahlon manhlut sik, khana khōpui kha hmei vâng aro manhmang sik.

⁵Ashkelon khōpui in kha ahmu sik khana aṭit sik. Gaza khōpui in khavakha ahmu sik khana malung natna anei sik. Khava kapōa Ekron um kati sik, a’nhōrna katlang sik jo! Gaza’n areng amanhmang sik, khana Ashkelon dahlona ka-om sik.

⁶Ashdod khōpuia jât hlop-hlop inchun heia ka-om sik hei. RŌNGPU’n ati, “Philisti mi inlensak rakip kasuk mannem sik jo hei.

⁷Anmani’n thisen alaka-om hme achangmak leh alak inthenglo thlai sâk mak jo hei ning. Kahringa alaka-om senghei kha Judah phunga mi kapōa kamirup hongkachang sik hei Jebush mihei tatlo kapōa Ekaron kha’m kamirup hongkachang sik jo.

⁸Ke’n karam hi kahrung sik, khana remihei manpetan mak hei ning. Mihnuk kasehei khan kamihei mansuk manrim mak jo hei ning. Ke’n kamihei heituk a a’nrenghei mo ti kha kahmu jo.”

⁹Inpâk ruh, hōi ruh, Zion mihei. Jerusalem mihei inpâk a ông ruh! Enruh, nanrengpa kha nanhnenga kajōng jo! Ama khan chung sōkna leh torna aneia kahong tâk-kha insinsak tak a shakōrtung aheichōng — shakōrtung tere inkhat aheichōng.

¹⁰RŌNGPU’n ahri, “Israel heia inphut re shakor gâri kha kalosōt sik jo khana Jerusalema inphut Shakor kalosōt sik jo; re tlona saihei kasuk manhmang sik jo. Narengpa khan jât-hei kâra intōk inchamna ajōng rôn sik jo; ama’n tuipui inkhat a inphut inkhat a vai arôn sik, Ephrath tuidunga inphut raleichung inchaina katlung.”

¹¹RŌNGPU’n ahri, “Inthoina thisen vâng mêrchîkna mahôr a’ntatkhum khava nangni leh kei intepna jâra khan, ke’n namihei kha kamasōsōt sik jo hei, rehring surna, tui omakna khura inphut kamasōsōt sik hei.

¹²He’nle ruh, rehring sura aka-om nangni, tuna inhōrna kaneihei; inhrung theina nanrama he’nle ruh. Tûnchu kamanthei chei kae, nanlei inrengna rakip kha chen inhnia mahâmṭhatna kapek sik jo chei.

¹³Judah hi remi inkhat, sai kapōa kahmang sik Israel khan, the kapōa kahmang sik. Zion mihei kha chemjâm kapōa kahmang sik hei, Greek remihei re kadōi sik a.”

¹⁴RŌNGPU kha amipuihei chunga hong inlâr sik; khō inphe kapōa ama’n the akâpsōt sik. Chunghnung RŌNGPU’n pengkun atum sik; thlang tinga inphut thlisip kâra ama kha hong injôk sik.

¹⁵Chunghnung RŌNGPU’n amihei ahrung sik hei, khana anmani’n an-indōipui hei kha ansuk manhmang sik jo hei. Anmani’n ju-inruihei kapōa rehmun a ka-ông sik hei an-indōipui hei thisen anmasō sik; inthoina thisen kapōa kalōng sik kōkleia inphut maichâm chunga jōngsun inthla kapōa.

¹⁶Khava kani kha ahong pha RŌNGPU’n amihei ahuksōt sik hei, kemōng kakhempa’n akemōng thina theia inphut ahuksōt hei kapōa. Lukhua kakop sana mukta kapōa, aram shunga anmani hong kavâr sik jo hei.

¹⁷Heituk akaṭha leh enhnōm ka-om ram mo akachang sik! Aram kara leh aram theitui an-ina khangtherhei kha anratha kahrat chet sik jo hei.