Read Komrem MALACHI 2 Bible Online

MALACHI 2 - Komrem bible

MALACHI 2

¹Chunghnung RŌNGPU’n thempuhei hneng ati, “Hiva ṭongpek hi nangni sik kae:

²Nanṭōn tlo vânga khan nantakaja sik eng kae. Kaṭong hri nanrangei mak inchu, hâksêrna kapek sik chei kae. Nangni hmangchâk sik a nanta rahlâng neinâk chunga khan kahâksêr sik kae. Kadiktak a chu, khahei chunga kahâksêr jo hei kae. Ajârchu kaṭong pek chei chunga khan kakhôktak a lomak cheia kae.

³Nansahei karâkna kapek sik hei khana nanta heitōk ranhringhei ek kha nanhmaia kakano pek sik chei, khana ek hmebunga khan nangni ṭhōisōt sik chei kae.

⁴Khava pha nangni’n hiva ṭongpek hi ke’n kapek chei kae ti kha nanhong manhret sik, hivahi thempuhei, Levi sōnhei hnenga kaṭong tepna kha akōimakna sik a kae.

⁵“Anmani’n ankajana sik enga tia, kei intepna shunga khan anhringkhōa damna hōina pek sik heia le’ntep eng, khavakha ke’n kaleipek jo hei. Khava lai khan chu anmani’n kajana leh ṭitna annei enga kae.

⁶Anmani’n akadik kha anmanthei hei, akadik mak kha manthei mak hei. Anmani kei leh malung khat a ka-om ung; anmani’n akadik antatlo rōk kha changmak, tâk alak-hei dikmak tlona bângna sik a’m an-inthōpui heia kae.

⁷Pathen kadik a manhretna kha mi manthei sik hi thempuhei ṭōn kae. Mipui he’n kei lungdo anmanhretna sik a anhnenga akase sik hei kae, ajârchu anmani kha Chunghnung RŌNGPU ṭongkarônhei kae.

⁸“Tâk-kha tûnchu thempu nangni he’n akadik hlam a inphut inhesōt jo chei. Nanṭong mantheina khan mi katamtak akaletting aṭhōisōt jo hei, nangni leh ni’ntepna ṭong nanmakhōi jo.

⁹Achang jâra, khava tloman a, Israel mihei kaman hmumasi sik chei, ajârchu kalungdo kha juimak chei, khana nangni’n kamihei nanmanthei hei pha, mi rakip in-anga razen mak hei chei.”

¹⁰Eini nikhenga pa inkhat rōk ninei changmak mo? Pathen inkhat rōk in asyem changmak me mo? Achang inchu heijâra mo inkhat leh inkhat niṭong tepna nimakhōi, khana Pathen in nipa-nipuhei leh aṭong leitepna kha nihnōise?

¹¹Judah he’n Pathen hnenga anṭong tepna anmakhōi jo khana Jerusalem leh ram pumpuia ṭit ka-om ṭōn antlo jo. RŌNGPU talungset Bek-inn kha anmanchok jo. Pase he’n ram hlop pathen inmuk nuhmei anlo jo hei.

¹²Hiva katlohei kha Israel phung shunga inphut RŌNGPU’n losōt hei rasoh khana Chunghnung RŌNGPU hneng nijât he’n inthoina antōkna shunga ahei tik a’m invei mak hei rasoh.

¹³Hivahi nangni tatlo inkhat nôk kha kae. Nangni’n RŌNGPU maichâm kha hmit-rathli sōkpum a, ṭap leh in-ôipum a nankeisôt, ajârchu nangni tahei choi inthoina kha ama’n rahlâng mak a kae.

¹⁴Heijâra mo arahlâng mak nangni’n nander. Ajârchu nangni naipang nanchanglai lômnu nanneina khan nan-intepna kha nanmakhōia kae. Amanu kha nang taksa ṭhen khat kae, ama hnenga taksenthei chang sik a Pathen ângshunga intepna naleinei jo’num ahnenga na’ntepna kha navōkkhōi jo.

¹⁵Pathen in nang kha ama leh taksa inkhat rōk a asyem chei changmak mo? Hivahin ama lungtup kha heimo? Khava khachu nangni’n akadiktak Pathen mi akachang sik a sa leh nai nanneina sik a kae. Khava jâra hivahi manhret manchên ruh, tûte’num anuhmei hnenga ṭongtep kha makhōimak rasoh.

¹⁶Israelhei RŌNGPU Pathen in ati, “Sanghram inṭhen hi kathei kada. Nankâra inkhat in alômnu hneng êngset atlo kha kahōt. Nanlômnu hneng taksenthei changna sik a nan-intepna kha makhōimak ruh.”

¹⁷Nanṭong hria RŌNGPU kha nanmanchim jo. Tâk-kha nangni’n, “Heikhong inmo keini’n ama kanta manchim?” nanti. Hinga nanhrina khana kae, “Akahratpen RŌNGPU’n ṭōnse katlo he’m kaṭhahei tia amandon hei; kadiktak a ama’n amadu hei,” nanti. Khana nangni’n nandera, “Akadik katlo sik Pathen kha khon mo aka-om?” nantia kae.