Read Komrem MATTHEW 11 Bible Online

MATTHEW 11 - Komrem bible

MATTHEW 11

¹Jesu’n sonle 12 hei kha khanga amansesō hei pha, khava hmun kha adahlona mi’nthei sik leh ṭong kahrile sik a khava hnenga khōpuia kase jo.

²John in hlungkura a-omna inphut Christa ṭōntlohei kha atheia, asonle ṭhahrep aleitir hei.

³“John in akajōng sik atipa kha nang che mo, a-emak leh milak inkhat kantalahngâk sik mo, amanthei roh?” tia anmani’n Jesu hneng anleider.

⁴Jesu’n amasôn hei, “Se una nantahmu leh nantathei hei hi John hneng vahri ruh:

⁵hmitkacho’n khō ahmu, ke inkhōi ke achoi, kaphâr karôn intheng, kōr kaset athei, akathi kathōi khana sara inrenghei hneng Ṭong kaṭha inhrile.

⁶Kei chunga malung inkei-chiona kaneimak mi kha heituk a vâng kaṭha mo!” ati.

⁷John sonlehei ansesō pha, Jesu’n mipuihei hneng John ṭong kha ahria: “Nêrdi ramhânga John hneng nanse pha heimo va-en sik a’ntluk chei? Thli tasêm phihei kha mo?

⁸Hei ka-en sik a mo akase chei? Pōn innem neng kasi mi inkhat ka-en chei mo? Khanga ret kaṭha kasi hei khachu reng-innpuia ka-om hei!

⁹Amanthei ruh, hei ka-ena mo akasesōt chei? Sânkathem inkhat mo? Kadik, tâk sânkathem inkhat kanek a akalen chet nanva hmua kae.

¹⁰Ajârchu ṭong intheng in hinga ahri kha John chungchânga kae: ‘Pathen in ati, kaṭong karôn nahma katir sik, ama’n nahma hlam amahlang sik.’

¹¹Kaman chênpek chei kae ti chu mihring rakip hei kanek a Tui Inhlutpa John hi akalenpen kae. Tâk marvân rengram a akasinpen kha John kanek a kalen jôk a kae.

¹²Tui Inhlutpa John in aṭong ahrilea inphut tuning katlung marvân Rengram kha rumhrat a buhluna aratō ṭhak a kae. khana rumhrat mihe’n sur sik a anrei.

¹³John pha katlunga sânkathem leh Moses Dân khan Rengram chungchânga ṭong kha antahri kae;

¹⁴khana nangni’n anṭong kha nanrahlâng hnōm inchu, John hi akajōng sik inti Elijah kha kae.

¹⁵Khava jâra, kōr nannei inchu rangei ruh!

¹⁶“Tûnchu, tûnlai khang mihei hi, hei leh mo katekâk sik? Anmani hi keithe tlânga naipang in-ong hei kapō kae. Rup khat in rup hlop inkhat hneng an-ôna,

¹⁷‘Keini’n hmōiṭhōina bunglir kantumpek chei, tâk nangni lâmmak chei! Ṭajai suina kansakpek chei, nangni ṭap mak chei!’ inti hei.

¹⁸John kha busâk lo, tui inloa ajōng pha mihe’n, ‘Ama rathla kadikmak karôn mi kae,’ anti.

¹⁹Mihring sapa kajōnga bu asâk a tui a-in pha, khan chu mi rakip in, ‘Enruh! mi kalôp, ju ka-in, ramsêrṭhei kakhôm ṭōn katlohei leh mikasehei ṭhōnpa kae!’ anti. Hei-hei achang inum, Pathen singna khachu aṭōn tlosōt kara’n amalâra kae,” ati.

²⁰Jesu’n ṭōn-inlak katamtak atlona khōpui heia khan mi’n anmalung anthleng mak jâra, aleirasei hei.

²¹“Eh Chorazin! Heituk ṭitpek aka-om che mo! Eh Bethsaida! Nang sik um heituk ṭitpek aka-om che mo! Nangnihei hneng ṭōn-inlak ale’ntlo hei kha Tyre leh Sidona ale’ntlo achang inchu, anmalung thleng malârna borapōn ansi sik, khana ravut ale’nno sik jo hei kae.

²²Kahri manchên pek chei kae Ṭongtan Ning Pathen in nangnihei kanek a Tyre leh Sidon mipuihei chunga lungsetna aneichet sik!

²³Khana Capernaum nang sik a chu! Marvân katlung a’nchoi inshâng hnōm che mo? Kathirama hlon manhlut sik che kae! Nang hnenga ṭōn-inlak ale’ntlo hei kha Sodoma ale’ntlo achang inchu, tuning katlung aleika-om hi sik kae!

²⁴Nanmanhret manchênthei khachu Ṭongtan Ning Pathen in nang kanek a Sodom chunga lungset amalârchet sik kae!”

²⁵Khava pha khan Jesu’n, “Apa, marvân leh ralei Rōngpu, kamanpâk che, ajârchu mikasing leh mikathemhei hneng naleithup kha akathemmak hei hneng namalâr jo.

²⁶Kadik, Apa, akasōk sik a namadu kha hi leikae.

²⁷“Heirakip Kapa’n kei apek jo eng. Pa teilo tûte’n Sapa kha manhret mak, khana Sapa tei loa tûte’n Pa kha manhret mak, khana Sapa khan malârpek sik a akadei hei tei loa tûte’n Pa kha manhret mak.

²⁸“Phur kahrik karôna akachâm hei, nankhenga kahnenga hong ruh, ke’n châm manhngat chei rong.

²⁹Karîngke inlo una inrôn ruh, khana keia inphut inchu ruh, ajârchu kei kamalung innem khana kadai eng; khana châmhngatna nanhmu sik.

³⁰Ajârchu kapek sik chei rîngke hi rôn kahōi, khana kamanrôn sik chei phur hi rôn kayânga kae.”