Read Komrem MATTHEW 12 Bible Online

MATTHEW 12 - Komrem bible

MATTHEW 12

¹Khava sōa sôt loa Châmhngat kani ning Jesu’n sabi hleilai aleihroa kae. Asonlehei anvon kaṭâm joa savui anmajuia ansâk manphut jo.

²Pharisee he’n anhmu pha Jesu hneng, “Enroh, nasonle he’n Châmhngat kani ning, hi antatlo hichu nidân kadōihei kae,” anti.

³Jesu’n amasôn hei, “David leh ami he’n anvon aleiṭâm pha heimo anta leitlo teiphung mak chei mo?

⁴Pathen inna kahlut heia, Pathen hnenga a’ntōk buhlom ansâk a Dân kadōi anchang sik inum, ama leh a’nṭhōipui he’n anleisâk jo, khava buhlom kha thempu rōk hei tasâk sik a hnōmpek hei kae.

⁵Achangmak leh Châmhngat kani kataia Bek-inn shunga thempu he’n Châmhngat kani ning dân ansukkhōi ṭhak, kha’num themmô chenmak hei tina Moses Dân kha teiphung mak chei mo?

⁶Bek-inn kanek a akalen jôk inkhat hin ka-om ti hi ke’n kahri pek chei kae.

⁷Ṭong intheng in, ‘Kei tamadu khachu lum lona kae, ran inthoina kha changmak,’ ati. Hivahi heitina mo nanlei manhret inchu, nangni’n ṭhena kaneimak hei kha nantalei masetmak sik hei kae;

⁸ajârchu Mihring Sapa kha Châmhngat kani Rōngpu kha kae.”

⁹Khava hmun kha Jesu’n adahlona intûpna inn inkhat a kase jo,

¹⁰khana khan kut kangōi mi inkhat leika-om. Jesu’n akadik mak atlo tia maset theina sik khana khan mi ṭhahrep leika-om hei, khava jâra ahnenga ander “Châmhngat kani ning nat mandam sik hi nidân kadōi mo kae?”

¹¹Jesu’n amasôn hei, “Nangni kâra mi inkhat in kemōng inkhat aneia khana Châmhngat kani ninga khur kōk inkhat a atlâk jo’nchu heikhonga sik? Nantamatua kadomsōt mak tin chei mo?

¹²Kemōng inkhat kanek a mihring inkhat hi aman katam jôk a kae! Khava jâra Châmhngat kani ning mi inkhat inthōpui hi nidân in ahnōm kae.”

¹³Khava sōa ama’n kut kangōi mipa hneng, “Nakut razit roh,” ati. Arazit a akut inkhat tinga leh in-anga kadam jo.

¹⁴Khava sōa Phariseehei kasesōt jo hei khana Jesu thatna sik ṭōn anmantluk jo.

¹⁵Jesu’n ama dōina ṭōnmantluk kha athei pha, khava hmun a inphut kasesōt jo; khana mipui katamtak in anleijuia kae. Ama’n khava akanahei seng kha aleimandam hei

¹⁶khana ama chungchânga milak hneng anhrimakna sik ṭong apek hei.

¹⁷Hiva atlo hi Pathen in sânkathem Isaiah inphut ale’nhri kha hui atlungna sik a kae. Khachu:

¹⁸“Ke’n kakadei kasōk kha hin ka-om, kalungsetpa, khana achunga kamalung tlainapa kae. Achunga ke’n Ka-Rathla kajōngtir sik, khana ama’n jât-hei hneng kaṭong tanna kha ahrisōt sik.

¹⁹Ama mi inkhepui mak ning khana ôngmak ning, a-emak leh hlampuia rasa inhnak a ṭongmak ning.

²⁰Mahre inkun inkhat ama’n sukthlek mak ning, khana thaihmei kathi de-de sêmthat mak ning. Dikna khan re amantor mak kârseng ama’n athōk sik,

²¹khana jât rakip in achunga inhōrna annei sik.”

²²Khava sōa mi ṭhahrep in mi inkhat ṭai arôn jâra ahmit kacho, akaṭong theimak Jesu hnenga anheiṭhōi. Aṭong theina sik leh ahmu theina sik a Jesu’n aleimandam jo.

²³Jesu ṭōntloa khan mipui rakip in inlak ansak jo. Anmani’n, “Ama hi David Sapa akachang sik nâk mo?” inder hei.

²⁴Pharisee he’n kha anthei pha, “Ama hin ramṭai hei vaikarôn Beelzebul rathapekna vâng rōk khan ṭaihei ahnong sōt kae,” anti.

²⁵Anmani’n antamandon kha Jesu’n amanhret a anhnenga ati, “Rengram inkhat abinga insem ṭhena, arup-rup a an-indōi jo’nchu, akasôt ngir tor mak ning. Khana khōpui achanga innshung inkhat achanga abinga a’nsemṭhena arup-rup a a’ndōi jo kha, akatlu inchek sik kae.

²⁶Achang jâra Seitan rengram shunga rup khat leh inkhat an-indōi jo’nchu, khan chu arup-rup a inṭhendek jo tina kae khana katlu bei sik jo tina kae!

²⁷Ke’n Beelzebul rathapekna vâng ṭai kahnong sōt hei kae nanti. Kaṭha jo, achang inchu, nankajui he’n tu rathapekna vâng mo ṭai antahnong sōt hei? Nankajui hei ṭōntlo kalalen khan nangni nanṭhe jo tia amanchên jo!

²⁸Beelzebul tapek eng changmak, Pathen Rengram kha nankâra jōng katlungdek jo ti manchênna sik ṭaihei hnongsōt torna ratha hi Pathen Rathla tapek eng kae.

²⁹“Tûte inkhat in mikahrat inkhat kha ahma inkeia khit loa a-inna hlut tor mak khana anei chom tor mak; akhitsō leh rōk a-innshung kha achom tor sik.

³⁰“Tu achang inum kei mi aka-emak kha kakadōi intheng kae, khana tu achang inum ani kakhôm intûp puimak mi khan avor kathek a kae.

³¹Achang jâra mihring in setna leh akaṭhamak antahri heirakip rangei mandam thei kae; tâk tu achang inum Rathla Intheng kadōia heikhat kahri rakip rangei mandam chenmak ning.

³²Tu inkhat in Sapa dōina heikhat ahri kha inngei indam sik; tâk tu achang inum Rathla Intheng dōina heikhat kahri kha tûnum ahei tik a’m inngei indam mak jo ning.

³³“Thing kara kaṭha chenna sik akung kaṭha nantanei nger sik kae; thingkung kaṭhamak nannei inchu akara kaṭhamak nantachen sik kae. Thingkung hi akara vâng khan a’nhret kae.

³⁴Nangni marihei — akaṭhamak nangni’n heikhong mo akaṭha nanta hri tor sik? Ajârchu malunga kasip a aka-om kha beia a’nhrisōt.

³⁵Mikaṭha inkhat in anei kaṭha manbukna inphut neinâk kaṭha kha ahei choisōt; khana mikaṭhamak khan anei kaṭhamak manbukna inphut neinâk kaṭhamak kha ahei choisōt a kae.

³⁶“Nanmanhret manchênthei sik khachu Ṭongtan ning mi rakip in hnemna kase anṭong hrina rakip tintana phôngsōtna anei sik kae.

³⁷Nanṭong hri mama kha nanṭong tanna sik a ahong inhmang sik kae, ṭhena nantanei leh nantanei mak malârna sik kae.”

³⁸Khava sōa Dân ojahei leh Pharisee ṭhahrep in ahnenga anti, “Oja, keini’n nanga inphut ṭōn-inlak inkhat kanhmu hnōm.”

³⁹Jesu’n inhnak a ahri “Tûnlaia mihei hi heituk a akaṭhamak leh Pathen kadonmak jo hei mo! Ṭōn-inlak katlo sik a nantader eng mo? Changthei mak! Nanhnenga a’npek sik ṭōn-inlak inkhat rōk khachu sânkathem Jonah ṭōn-inlak kha kae.

⁴⁰Jonah’n ni 3 jân 3 nga kalen von shunga aka-om kapōa Mihring Sapa kha’m ni 3 jân 3 ralei thōia aka-om sik kae.

⁴¹Ṭongtan ning Nineveh mihe’n nanchungchânga kangirsōt sik hei khana anmaset sik chei; ajârchu anmani’n Jonah ṭonghri kha anthei pha anmalung anleithleng; khana kahri pek chei kae Jonah kanek a akalen jôk kha hin ka-om!

⁴²Ṭongtan ning thlang tinga Sheba rengnu kha kangirsōt sik khana amaset sik chei; ajârchu aram a inphut hlamdung aheihroa Solomon singna mantheina ahong rangeia kae; khana kahri manchên kae, Solomon kanek a akalen jôk kha hin ka-om!

⁴³“Mi inkhat a inphut a’nthengmak rathla inkhat asōksōt pha, omna sik hmun kajōnga ram kachâr hmun heia kaselea kae. Ama’n inkhatbek ahmu mak jo pha,

⁴⁴ama’n abinga kaṭonga, ‘Kalei omna inna khan inle nôk sik eng,’ ati. Khanga inle nôk a inn kha akarōk a, inthenga, injenpet a aleika-om kha avahmu jo.

⁴⁵Khana ama vakasesōt a ama kanek a akaṭhamak chet rathla 7 ahongṭhōi heia ka-om jo hei. Khana achai-chaina chu mipa kha hma kanek a ahringkhō kha kakhôk chet joa kae. Hivahi tûnlaia mikaṭhamak-hei chunga akasōk sik kha kae.”

⁴⁶Jesu’n mipuihei hneng ṭong ahrilai anu leh anaihei hong katlung hei. Vânga kangir heia, inbek puina sik anleihri.

⁴⁷Khana aka-om mi inkhat in ahnenga, “Enroh, nanu leh nanaihei vânga kangir hei, inbekpui sik anmadu che,” ati.

⁴⁸Jesu’n amasôn, “Tu mo kanu, tuhei mo kasōpuihei?”

⁴⁹Khana ama’n asonlehei akut vâng akhing heia, “Enroh, kanu leh kasōpuihei kha hin ka-om hei!

⁵⁰Tu achang inum marvâna ka-Pa lungdo katlo kha kasōpuipa, kasōpuinu leh kanuhei kae,” ati.