Read Komrem MATTHEW 14 Bible Online

MATTHEW 14 - Komrem bible

MATTHEW 14

¹Khava lai Galilee vaikarônpa Herod khan, Jesu chungchâng ṭong inhri kha aleithei jo.

²Ama’n aṭōnpui karônhei hneng, “Ama hi Tui Inhlutpa John kha akathia inphut akahringsōt khet kae. Khava jâra, hiva ṭōn-inlak tlotorna ratha anei kae,” ati.

³Ajârchu Herod in John kha hiva mak hma khan aleisura thirhrui vâng akhit a aleikhum kae. Hivahi asōpuipa Philip lômnu, Herodias jâra kae.

⁴Ajârchu pha khat a John in Herod hneng, “Herodias kha nanuhmei naman chang sik hi dân dikmak,” aleitipek a kae.

⁵Herod in athat hnōm, tâk Jehudi mipuihei aleiṭit hei, ajârchu anmani’n John kha sânkathem inkhat kae tia anleilo.

⁶Herod inte ninga rehōia Herodias sanu kha mipui hma hong kalâm. Herod kha katlai hranghra,

⁷khana amanu hneng le’ntep a, “Nang in nader eng rakip kha kapek sik che, kei intep eng,” aleiti.

⁸Anu mansena dungjuia ama’n, “John lu kha thleng inkhat chunga hinahin tûntak apek roh!” ati.

⁹Rengpa kha amalung inrim jo, tâk ahmelâk rakip hei hmaikunga a’ntepsa achang jâra akadernu lungdo mathlungna sik ṭong amasō jo.

¹⁰Khava jâra kurkhum shunga John lu avamantan jo hei.

¹¹Thleng inkhat chunga John lu kha anheichoia nuhngâknu hneng anhongpek jo, nuhngâk khan anu hneng achoi jo.

¹²John sonlehei kahong heia, akalōng kha anvaloa, anvahre jo; Jesu hneng kahong heia thang anhongkōi jo.

¹³Jesu’n hiva ṭong hi athei pha, khava hmun a inphut kadai hngera abing rōk a omtheina inkhat ting rakōnga kasesōt jo. Mipui he’n kha antheia, ankhōpui andahlona ram chârna ting ama anjui jo.

¹⁴Jesu khan rakōnga inphut heikasōksōt a, mipui katamtak hei kha ahmu hei pha, anchunga alungsetna hongkasip jo, khana akanahei aleimandam jo hei.

¹⁵Khava ninga khōhleia asonlehei ahnenga kahong heia, “Apha hi kathlengrei jo, khana ahmun hi mi om makna kae. Mipuihei kha manse jo hei roh, anmani khōheia sehei sona sâk sik va’ncho jo hei rasoh,” anti.

¹⁶Jesu’n anhnenga ati, “Anmani sena sik rangei mak. Nangni’n sâk sik heikhat pe hei ruh!”

¹⁷Anmani’n anmasôn, “Eini’n hinna nineiseng chu buhlom pheng 5 leh nga 2 rōk kae.”

¹⁸Jesu’n, “Khan chu hin kahnenga heichoi ruh,” ati.

¹⁹Ama’n mipuihei kha phi chunga ani’n-ongna sik ṭong apek hei; khava sōa ama’n buhlom 5 leh nga 2 kha aloa, marvânting a-ena Pathen manpâkna aneia kae. Ama’n buhlom kha har akhōia asonlehei apek hei, asonle he’n mipuihei hneng anleisem pek jo hei.

²⁰Mi rakip in ansâk a kakhop et hei. Khava sōa sonle he’n a’nhlei aharhei kha hrai 12 kasip anhrut.

²¹Akasahei kha nuhmei leh naipang inveiloa, mi 5,000 kapō hei kae.

²²Khava sōa Jesu’n mipuihei kha atirsōt lai hei, asonlehei kha rakōng inkhat a amanhlut heia dîr rekhat ting hmadet a anleisena sik amantluk hei.

²³Mipuihei kha atirsōt sō jo hei, derna kanei sik a abinga hmebung inkhat a kake jo. Khōhlei ahong tlung jo pha, Jesu kha abing rōk a khan leika-om;

²⁴hiva pha hin rakōng khachu dîrlaia kahlatak a leika-om, tui in-nông khan akanok lele, ajârchu thli kahrâng khan asuk lelea kae.

²⁵Jîngkâr pung 3 leh 6 kâra Jesu asonlehei hneng kahong, tui chunga heikalôn.

²⁶Tui chunga ama’n ke ahei choi kha anhmua anmani ṭit inper jo hei. “Rathla kaṭhamak kae!” antia kaṭi heia kapeng jo hei.

²⁷Khava phatak a Jesu kaṭonga anhnenga ati, “Kangama om ruh! Kei eng kae. Ṭimak ruh!”

²⁸Khava sōa Peter in kaṭongsōt a, “Rōngpu, nangkhet nachang inchu, kei nahnenga tui chunga hin kahongna sik ṭong eipe roh,” ati.

²⁹Jesu’n amasôn, “Hong roh!” Khana Peter rakōng chunga inphut kaṭuma Jesu hnengting tui chunga lôn aphut jo.

³⁰Tâk thlipui kha ahmu pha ama kaṭi jo, khana tui shunga kahlut inphut jo. “Rōngpu ahuk roh!” tia alei-ôn.

³¹Khava phatak a Jesu’n akut vâng amatua khana ahnenga, “Heituk a taksenna katlôm che mo! Heisa mo namalung a’nkei chio che?” ati.

³²An-inhnia rakōnga kahlut jo hei, khana thli kha kabâng jo.

³³Rakōng chunga ka-om sonlehei khan Jesu ankamuk jo. “Kadiktak a nang Pathen Sapa che kae!” antia ka-ông jo hei.

³⁴Anmani’n dîr kha anhei rakansōt a, Gennesaret ram kachâra hei kake hei,

³⁵khanna khan mihe’n Jesu kha anleimanhret. Khan chu ram shung pumpuia khan mi antira, mikana rakip Jesu hnenga anheiṭhōi jo hei,

³⁶Akana he’n apōnhmor bek ansitna sik ahnenga anngek a kae; khana apōnhmor katôn rakip leikadam hei.