Read Komrem MATTHEW 15 Bible Online

MATTHEW 15 - Komrem bible

MATTHEW 15

¹Khava sōa Jerusalema inphut Phariseehei leh Dân ojahei Jesu hneng kahong heia,

²“Nasonle he’n nipa-nipuhei mansena chônngai kha heisa mo antajui mak? Ajârchu anmani ansâk hma ankut sôpmak hei!” anti.

³Jesu’n amasôn hei, “Nangni’n Pathen ṭongpek kha heisa mo nanta juimak a nanbinga mansena chu nantajui?

⁴Ajârchu Pathen in, ‘Nannu nanpa kaja ruh, tu achang inum anu a-emak leh apa kahri inset mi kha that nger sik kae.’

⁵Tâk nangni mi mantheina chu, tu achang inum apa leh anu hnenga inthōpuina thei neinâk heikhat anei kha, ‘Hi Pathen tâ jo kae,’ ati’nchu,

⁶ama’n apa hnenga lumloa pekna sik rangei mak jo,’ nanti. Khang’khan nangni mi mantheina kha juitheina sik a Pathen ṭongpek khachu donmak jo chei.

⁷Nangni a’nṭhat hlemsak-hei! Isaiah khan nangni chungchânga aleisânsōt kha heituk a akadik jo mo!

⁸Pathen in, ‘Hiva mihei hin anbei vâng rōk ankaja eng, tâk anmalung chu keia inphut kahlatak a ka-om.

⁹Antakamuk eng hi anmani sik a ahnemna om mak, ajârchu anmani’n mihring dân kha kei dân kapōtak a mi anmanthei heia kae!’”

¹⁰Khana Jesu’n mipuihei kha ahnenga abek heia ahri, “Rangei-una manhret ruh!

¹¹Beia kahlut heikhat khan mi kha beklanga amantheng mak changmak; beia inphut ahei kasōk jôk khan mi kha amantheng mak kae.”

¹²Khava sōa asonlehei kha ahnenga kahong heia, “Naṭong hri khan Phariseehei malung atôn jo so, namanhret mo?” anhongti.

¹³Jesu’n amasôn hei, “Marvâna kapa talingmak thingkung rakip kha phoisōt sik kae.

¹⁴Anmani chunga nanmalung manrim mak ruh! Anmani hmitkachohei hi hmitkachohei hlamkakeihei kae; hmitkacho inkhat in hmitkacho inkhat hlam akei inchu, an-inhnibât a khur kōk a akatla sik hei kae.”

¹⁵Peter in, “Tekâk kha kanhnenga ahri manchên pek roh,” tia kaṭongsōt.

¹⁶Jesu’n anhnenga ahri, “Nang tûn kapha alak-hei kanek a lasing detmak che.

¹⁷Manhret mak che mo? Hei-achanga mi inkhat beia akahlut kha avona katlung, khan chu ataksa inphut kasōksōt a kae.

¹⁸Tâk beia inphut ahong kasōk khachu lungria inphut ahong kasōk kae, khahei khan mi inkhat beklanga amantheng mak kae.

¹⁹Ajârchu alungria inphut lungthim kaṭhamak, mi thatna, jôngna, khana ṭhatmak omchen tlona, inruna, maleisei, mi hrimasetna hei hi ahong kasōk kae.

²⁰Hihei seng hin mi amantheng mak kae. Tâk anmani’n antahri, nankut sôp loa sâkna hin mi amantheng mak changmak a kae.”

²¹Jesu’n khava hmun kha adahlona Tyre leh Sidon ramṭhenting kase jo.

²²Khava ramṭhen tinga inphut a Canaan nupui inkhat kahong. “David Sapa”, tia ka-ông. “Alungset roh, Apu! Kasanu ṭai inkhat arôna anat inrek hêr jo,” ati.

²³Tâk Jesu’n amanu kha heite masôn mak. Asonlehei kahong heia ngekna annei, “Amanu hi tirsōt jo roh! Nikahnung ajui mea rahnak a kapeng jo.” anhongti.

²⁴Khava sōa Jesu’n amasôn hei, “Kei Israel mihei kemōng inhmanghei rōk hnenga ajōng-intir eng kae.”

²⁵Khava pha amanu kha kahonga akekunga hong-inkuna, “Apu, a’nthōpui roh!” ati.

²⁶Jesu’n amasôn, “Naipanghei bu kha loa uihei hneng hlon sik kha akadik changmak.”

²⁷Amanu’n, “Kadik, Apu, kha’num ankapuhei dokhânga inphut akatla a’nhleihei kha uihei kapha’num ansâk a kae,” ati.

²⁸Khan chu Jesu’n amanu amasôn, “Taksenna kalen nuhmei che kae! Namadu kha tlopek sik che kae.” Khava phatak a khan asanu kha kadam jo.

²⁹Jesu’n khava hmun kha adahlona Galilee dîr vena kase jo. Ama hmebung inkhat a kakea in-ong jo.

³⁰Mipui katamtak ahnenga kahong hei, kut kangōi, hmitkacho, ke inkhôi, akaṭong theimak khana akadam mak ralak katamtak, akekunga anhong da hei; khana ama’n amandam hei.

³¹Mipuihei khan, akaṭong theimak akaṭongthei, lang kangōi akadam, ke inkhôi akalôn, khana hmitkacho’n khō ahmu hei kha anhmu pha andet-hla jo; anmani’n Israel Pathen kha anleichoi manshâng jo.

³²Jesu’n asonlehei ahnenga abek heia ati, “Hiva mipuihei sik a kamalung kachâmpek hei, ajârchu anmani ni 3 heite sâk loa kei leh ka-omsap jo ung. Heite mansâk loa tirsōt hnōm mak hei eng, akinchu an-inn jōnna hlamhri invōi sik hei.”

³³Sonlehei khan ahnenga anti, “Mipui hingtuk katam hei veina sik buhlom nêrdiram thōia hin khon mo nivalo sik.”

³⁴Jesu’n ader hei, “Buhlom heija mo nantanei?” Anmani’n, “Buhlom 7 leh ngate ajing,” tia anmasôn.

³⁵Khan chu Jesu’n mipuihei raleia ani’n-ongna sik ṭong apek jo hei.

³⁶Ama’n buhlom 7 leh nga kha aloa Pathen manpâkna aneia, har akhōia asonlehei apek jo hei; asonlehei khan mipuihei kha ansempek jo hei.

³⁷Ankhenga ansâk a kakhop et hei. Khana a’nhlei ahar-ahak kha asonle he’n hrai 7 kasip anhrutsōt a kae.

³⁸Akasaseng pase, nuhmei naipang tei loa, 4,000 hei kae.

³⁹Khava sōa Jesu’n mipuihei kha atirsōt jo hei, ama rakōng inkhat a kahlut a Magadan ramting kase jo.