Read Komrem MATTHEW 16 Bible Online

MATTHEW 16 - Komrem bible

MATTHEW 16

¹Jesu hneng akahong Pharisee leh Sadducee ṭhahrep he’n aṭhena sur sik a anleimadu, achang jâra achunga Pathen manṭhatna ka-om ti malârna ṭōn-inlak inkhat amanhmuna sik hei anhongder.

²Tâk Jesu’n amasôn heia, “Khōhlei pha, nangni’n, ‘Khō kaṭha sik ajârchu vânsen kasōk,’ nanti.

³Khana jîngkâr hmatak a, ‘Khō kasûr sik ajârchu vânsen leh sumphai kadup kasōk,’ nanti. Nangni’n marvân nan-ena khōsûr khōṭhat sik nansânsōt tor a kae, tâk hiva phahei sik a mêrchîkna hei khachu malesōt tor mak chei!

⁴Tûnlaia mihei hi heituk a akaṭhamak leh Pathen kadonmak jo hei mo! Nangni’n mêrchîkna ṭōn-inlak inkhat malâr sik a nantader eng mo? Changthei mak! Nangni hnenga mêrchîkna ṭōn-inlak inkhat rōk a’npe sik chei khachu Jonah ṭōn-inlak kha kae.” Khan chu ama’n adahlon heia kase jo.

⁵Sonlehei khan dîr rekhat ting anhong rakan pha, buhlom rôn sik kha anleimahngi jo.

⁶Jesu’n anhnenga, “Insing thei ruh; Phariseehei leh Sadduceehei chêa inphut inhrung thei ruh,” ati hei.

⁷Anmani anbinga inbektō heia, “Eini’n buhlom nihei rôn mak jâra hivahi ahri kae,” inti hei.

⁸Jesu’n anṭong hri kha aleimanhret joa, ader hei, “Buhlom neimak jâra heisa mo nanbinga a’nbek chei? Heituk a taksenna katlôm chei mo!

⁹Tûn kapha lamanhret mak chei mo? Buhlom pheng 5 kha mi 5,000 sik a ahar kakhōi kha mandon mak chei mo? Hrai heija mo a’nhlei nanta hrutsōt?

¹⁰Khana mi 4,000 sik a buhlom pheng 7 kha nanmandonsōt mo? Hrai heija mo a’nhlei nanta hrutsōt?

¹¹Ke’n hivahi buhlom chungchânga kahri changmak ti hi heisa mo nantamanhret mak? Phariseehei leh Sadduceehei chea inphut inhrung thei ruh.”

¹²Khava pha khan anmani’n buhlom chê phina chunga insing thei ruh ati changloa Phariseehei leh Sadduceehei mi mantheina inphut insing thei ruh atina kae ti hi anmanhret joa kae.

¹³Jesu Caesarea Philippia ramṭhenting kase jo, khana khan asonlehei hneng ader hei, “Mihring Sapa kha mihe’n tu mo kae anti?”

¹⁴Anmani’n, “Ṭhahrep in Tui Inhlutpa John anti che,” tia anmasôn. “Alak in Elijah khana alak he’n Jeremiah a-emak leh sânkathem alak anti che.”

¹⁵Ama’n ader hei, “Nangni’n-e heikhonga? Nangni’n kei hi tu mo nanti eng?”

¹⁶Simon Peter in amasôn, “Akahring Pathen Sapa, Messiah che kha kae.”

¹⁷Jesu’n amasôn, “John sapa Simon, nang narevân kaṭha. Ajârchu hiva ṭongdik hi mihring inkhat tamanthei che changmak, tâk marvâna kapa khet tamanthei che kae.

¹⁸Khava jâra Eh Peter, nahnenga kahri kae: nang hlungpui che kae, khana hiva hlungpui innhmun chunga hin ka-Bekrup kasak sik kae, khana thina kapha’n khava chunga ratha nei tor mak ning.

¹⁹Marvân Rengram thirkir kha ke’n nang hneng kapek sik che, khana raleichunga nakhit kha marvân chunga inkhit sik, khana raleichunga namasō kha marvân chunga insō sik.”

²⁰Khan chu ama Messiah achang kha tûte hneng anhrimakna sik asonlehei inhnaktak a amanthei jo hei.

²¹Khava pha inphut Jesu’n asonlehei hneng akabei hlam a ahri jo, “Kei Jerusalema kase nger sik eng khana upahei leh thempu kalenhei, Dân oja heia inphut khōdeng katamtak kathei sik. Kei anthat sik eng, tâk ni 3 ning kahringa akathōi nôk sik eng kae.”

²²Peter in hmun khat a akeia arasei, “Pathen in ahōt, Rōngpu! Khavakha nachunga sōk hêrmak rasoh.” ati.

²³Jesu hong inhea Peter hneng ati, “Seitan, keia inphut sesōt roh! Nang ka’npaina kachang che, ajârchu namandonna kha Pathena inphut changmak, mihringa inphut kae.”

²⁴Khan chu Jesu’n asonlehei hneng ahri, “Tu inkhat in kakahnung ajuihnōm inchu ama abinga a’ndon mak sik, athingrake akadom sik khana ajui sik eng kae.

²⁵Ajârchu tu achang inum ahringkhō hukna sik indu khan amanhmang sik; tâk tu achang inum kei sik jâra ahringkhō inhmang mi khan ahmu sik.

²⁶Mi inkhat in vânhnōi ralei pumpui hi chen sona, arathla amanhmang jo’nchu ama sik a heimo ahnemna aka-om? Heite om mak! Rathla inhmang kha chenmale nôkna sik a apektor heite om mak.

²⁷Ajârchu Mihring Sapa kha Apa lûrna leh inṭhōia marvân ngevahei leh akajōng sik kae, khava pha mi rakip anṭōntlo dungjui et a tloman apek sik hei.

²⁸Kadiktak a kahri pek chei kae Mihring Sapa kha Reng inkhat a ajōng ṭum anhmumak kârseng akathimak sik ṭhahrep hinahin ka-om hei.”