Read Komrem MATTHEW 18 Bible Online

MATTHEW 18 - Komrem bible

MATTHEW 18

¹Khava pha sonlehei kha Jesu hneng kahong heia anleider, “Marvân rengram a tu mo akalenpen sik?”

²Jesu’n naipang inkhat ahnenga abek a anhma aman ngira ahri,

³“Ka-diktak a kahri pek chei kae, nangni’n nanmalung nanthlenga naipanghei kapōa nanchangmak inchu marvân Rengram kha hlut hêrmak tin chei.

⁴Marvân Rengram a akalenpen kha abinga a’nsinsak, hiva naipang kapōa aka-omchen mi kha kae.

⁵Khana tu achang inum kei rahminga hinghiva naipang kapō inkhat inhlâng mi khan kei arahlâng eng kae.

⁶“Tu inkhat in hiva naipang kasinhei taksenna eng kha manhmang sik a atlo’nchu khava mi kha arînga chakri hlung kalen inkhat khit makheia tui-ôngpui shunga hlon manhlut, ama sik a kaṭha jôk sik.

⁷Mihei taksenna inhmangna sik katlo neinâk-hei, a-om jâra raleichung hi heituk a ṭitpek ka-om jo mo! Khang khavakha kasōk ṭhak sik, tâk mi tlûkna katlo inkhat sik a heituk a ṭitpek ka-om jo mo!

⁸“Nakut a-emak leh nake khan nataksenna amanhmang sik achang inchu, tansōt inna hlonsōt roh! Kut 2 leh ke 2 pum a kumleikō hmeikhura hlon manhlut nachang sik kanek a, kut inkhat leh ke inkhat kasea kumsôt hringna nakahlut kha nang sik kaṭha jôk.

⁹Khana nahmit in nataksenna amanhmang sik achang inchu khersōt inna hlonsōt roh! Hmit 2 leh hmeikhura hlon manhlut nachang kanek a hmit inkhat rōk leh kumsôt hringna nakahlut kha nang sik kaṭha jôk.

¹⁰“Hiva naipang kasinhei inkhat hmumasi makna sik insing thei ruh. Kahri pek chei kae anngeva he’n marvâna Kapa hmaikunga ka-om ṭhak hei.

¹¹Ajârchu Mihring Sapa kha a’nhmanghei kahuk a akajōng kae.

¹²“Mi inkhat in kemōng 100 anei khana inkhat kalôn inhmang jo, khan chu mipa khan heimo atlo sik a nantamandon? Tlâng sira phi kasâk 99 kha adahlon heia akalôn inhmang inkhat kha avajong sik?

¹³Kahri pek chei kae, a’nhmang kha ahmu pha a’nhmangmak 99 hei kanek a, akalôn inhmang inkhat chunga khan a’npâkna kalen jôk a kae.

¹⁴Khava ângphunga hiva naipang kasinhei inkhat a’nhmang sik hi marvâna nanpa khan madu mak a kae.

¹⁵“Nasōpui in nachunga setna atlo’nchu se ina aṭhena kha vahri pek roh. Tâk marûk a, bingrōk a tlo roh. Ama’n nahri kha arangei che’nchu, nang in nasōpui kha nasyem manṭhat nôk jo.

¹⁶Tâk ama’n naṭong kha arangei mak inchu, mi inkhat a-emak leh 2 ṭhōisa roh, ajârchu ṭong intheng in ahri kapōa, ‘masetna rakip sâkhi 2 3 beisō vâng a’ntan sik kae,’ ati.

¹⁷Ama’n anmani ṭong kha’m arangei mak inchu, bekrup manthei jo hei roh. Atorna a, ama’n bekrup ṭong kha’m arangei mak inchu, ama kha Pathen inhret mak inkhat a-emak leh ramsêrṭhei ṭōnkatlo inkhat kapōa mandon jo ruh.

¹⁸“Khava jâra nankhenga kahri pek chei kae: nangni’n raleichunga nantakhit rakip kha marvâna a’nkhit sik kae. Khana raleichunga nantamasō rakip kha marvâna masō akachang sik kae.

¹⁹“Kakhea kahri pek chei kae: raleichunga nangni mi 2-in heikhat der sik chunga inhnōmtōna nannei pha, marvâna kapa’n nangni sik atlopek sik chei.

²⁰Ajârchu karahminga mi 2 3 anhong intûpna hmun a khan ke’m ankâra ka-om eng.”

²¹Khava sōa Peter Jesu hneng kahonga ader, “Rōngpu, kasōpui in kachunga setna atlo’nchu, vōi heija mo karangei mandam sik? Vōi 7 mo?”

²²Jesu’n amasôn, “Changmak, vōi 7 changmak, tâk vōi 70 kha ve 7 katlung sik kae,

²³ajârchu marvân Rengram khachu hiva kapō kae. Pha khat a reng inkhat in asōk-hei chunga sêr hisâp tlo sik a aleimadu.

²⁴Ama’n khanga aphut pha, sêr hingja kabat mi inkhat ahnenga anheiṭhōi jo.

²⁵Sōk khan abat kha pekna sik heite neimak jo, khava jâra reng khan ama kha, alômnu, asahei leh anei rakip jōr heia abat kha malena sik ṭong apek jo.

²⁶Sōk khan reng hmaikunga amarkhup athlep a akamuk a, ‘Ahngâk hi roh, ke’n kabat rakip kapek sik che!’ ati.

²⁷Ama sik a rengpa khan malung khamna anei jo, khana abat-hei kha arangei mandama amanse jo.

²⁸“Khava sōa sōk kha kasesōt a asōk changpui inkhat asêr ajing kabatpa kha ahmua asura ahrak akarâk pek a, “Nabat eng kha eipe jo roh,” ati.

²⁹Asōk changpuipa khan inkuna ahnenga ‘Ahngâk hi roh, ke’n kabat che kha kapek sik che!’ tia angek a kae.

³⁰Tâk ama’n hnōmpek mak; khava kanek a abat kha apeksō mak kârseng kurkhum a avathōn manhlut jo.

³¹Asōk changpui he’n khanga atlo kha anhmu pha, anmalung inrim hêr jo, kase heia omchen kasōk rakip kha rengpa hneng anhri pek jo.

³²Khan chu ama’n sōk kha abek manhlut jo. Ama’n, ‘Eh sōk kaṭhamak!’ ati. ‘Nang in nangek eng jâra nabat akhenga karangei mandam jo che kae.

³³Ke’n nang kalungset che kapōa, nang inum nasōk changpuipa kha nalungset sik kasōk,’ ati.

³⁴Rengpa kha ahnuk kana hêr joa, ama’n abatseng kha akhenga apeksō mak kârseng kurkhum a karâkna sik a atirsōt jo.”

³⁵Jesu’n ṭongchaina aneia, “Khava kapōa nangni nankâra nansōpui lungria inphut nanrangei mandam mak inchu marvâna ka-Pa’num nangni khang’khan atlo sik chei kae,” ati.