Read Komrem MATTHEW 19 Bible Online

MATTHEW 19 - Komrem bible

MATTHEW 19

¹Jesu’n khaseng ahrisōa, Galilee adahlona Jordan tuidung rekhat tinga Judea ramting kase jo.

²Mipui katamtak in ama anleijui, khana khava hmun a khan mi katamtak annat aleimandam hei.

³Pharisee ṭhahrep ahnenga kahong heia anchânga man-ôkna sik ahnenga ṭong inkhat anhongder, “Heikhat jâra pase inkhat in anuhmei a’nṭhenpui sik hi nidân in ahnōm pek mo?”

⁴Jesu’n amasôn hei, “A’nphutbia Akasyempa’n pase leh nuhmei aleisyem hei inti ṭong intheng hi teiphung mak chei mo?

⁵Khana Pathen in ati, ‘Hiva sik jâra pase inkhat in anu leh apa adahlon sik hei kae, khana anuhmei leh a’nchun sik hei kae, khana 2 hei kha inkhat rōk akachang sik hei kae.’

⁶Achang jâra anmani mi 2 changmak jo hei, inkhat rōk jo hei kae. Pathen tamanchun jo hei kha tûte’n ṭhenmak hei rasoh.”

⁷Pharisee he’n ahnenga, “Khan chu heisa mo pase inkhat in anuhmei hneng indana malârna lekha inkhat pek a tirsōtna sik Moses’n dân aleipek,” anti.

⁸Jesu’n anhnenga, “Ajârchu nangni manse nan-intakrei jâra nan-inṭhen sik kha Moses’n aleihnōm pek chei kae. Tâk anphutbia chu kha leichang mak.

⁹Kahri pek chei kae, tu achang inum jông leh kik jâra tei loa, anuhmei a’nṭhenpuia nuhmei lak inkhat kanei mi kha mikajông kae,” ati.

¹⁰Asonle he’n ahnenga, “Pase inkhat leh anuhmei kâra khanga anti’nchu inn neimak kha kaṭha jôk,” anti.

¹¹Jesu’n amasôn hei, “Hiva mantheina hichu mi rakip chunga mansethei changmak, tâk Pathen tapek rōk hei sik a kae.

¹²Ajârchu mihe’n lu anhông makna ajâr katamtak ka-om: ṭhahrep in khanga ajo’nte ka-om hei, alak he’n khanga mihring tasyem ka-om hei, khana alak he’n marvân Rengram sik a lu kahongmak um ka-om hei. Hiva ṭong hichu akalotor mi khan inlo rasoh.”

¹³Mi ṭhahrep in naipanghei luchunga Jesu’n akut adapek a aderpekna sik heia ahnenga anhongṭhōi hei, tâk asonle he’n mihei kha anleirasei hei.

¹⁴Jesu’n anhnenga, “Naipanghei kha kahnenga heimanhong hei ruh, khâm mak hei ruh, ajârchu marvân Rengram kha anmani kapō hei ta kae,” ati.

¹⁵Ama’n akut kha anlu chunga ada a khava sōa kasesōt jo.

¹⁶Vōi khat mi inkhat Jesu hneng kahonga ahnenga ahongder, “Oja, ke’n kumleikōa hringna sik ṭōn kaṭha heimo katlo sik?”

¹⁷Jesu’n ahnenga, “Akaṭha chungchânga heisa mo nahongder eng? Akaṭha Inkhat rōk ka-om. Kumsôt hringna khan nahlut-hnōm inchu ṭongpek-hei kha jui roh,” atipek.

¹⁸Mipa khan, “Hei ṭongpek-hei kha mo?” ati. Jesu’n amasôn, “Mi that mak roh; jông mak roh; inru mak roh; dik loa mi demmak roh;

¹⁹nanu napa kaja roh; khana nang nabinga na’nlungset kapōa nakhō naven lungset roh.”

²⁰Rether khan ahnenga amasôn, “Hiva ṭongpek-hei seng hichu ke’n kahei juisa hei kae. Heimo kalavât aka-om?”

²¹Jesu’n ahnenga, “Pui mathluk sik namadu’n chu, se ina nanei rakip vajōr roh, sêr kha sara khōdeng katheihei vasempek hei roh, khana marvâna karōi nanei sik; khava sōa hong inna kakahnung ajui roh,” atipek.

²²Rether khan kha athei pha malung inrimtak a kase jo ajârchu ama kha mi kaneitak kae.

²³Jesu’n khava sōa asonlehei hneng, “Kadiktak a kahri pek chei kae, mikahao inkhat marvân Rengram ahlut sik hi intak hranghra.

²⁴Ke’n kahri nôk: mikahao inkhat marvân Rengram ahlut sik kha ṭimphōi kōr a sharîngsei ahlut sik kanek a intak jôk a kae,” ati.

²⁵Asonle he’n kha anthei pha, inlak ansak hêr jo. “Khan chu, tu hmen hukmanhring akachang tor sik jo?” tia ander.

²⁶Khava pha Jesu’n kasang kanga a-en heia amasôn hei, “Mihring sik a chu kha chang tor mak, tâk Pathen sik a chu heirakip kachang tor,” ati.

²⁷Khava sōa Peter kaṭonga ati. “Enroh, keini’n heirakip kandahlona kanjui che, keini’n heihmen kantachen sik?”

²⁸Jesu’n ahnenga ahri, “Kadiktak a kahri pek chei kae, Khang athera Mihring Sapa khan alûrna leh alen in-ongna chunga a’n-ong pha nangni ani kajui 12 seng um Israel phung 12 hei chunga ṭong katan sik a reng in-ongna chunga a’n-ong sik chei kae.

²⁹Khana tu achang inum a-inn, asōpuinu leh asōpuipa, anu leh apa khana asahei leh ahlei, kei sik jâra akadahlon mi khan araja kakhea ahmu sik, khana kumsôt hringna kha achen sik.

³⁰Tâk tuna hmakakei mi katamtak in hnung ankhôr sik, khana tuna hnung kakhôr mi katamtak in hma ankei sik.”