Read Komrem MATTHEW 2 Bible Online

MATTHEW 2 - Komrem bible

MATTHEW 2

¹Herod reng changlai Judea ram shunga Bethlehem khōpuia Jesu le’ntea kae. Khava kahnung bât a nisōtinga ârsi lekha kathemhei Jerusalema kahong heia

²ander hei, “Jehudihei Reng sik a naidông inte kha khon mo aka-om? Keini’n nisōtinga ama ârsi ahong kasōk kha kanhmu, ama inmuk sik a akahong ung kae,” anti.

³Hiva ṭong hi Reng Herod in athei pha amalung inrim jo, khana Jerusalema mi rakip um anmalung inrim jo hei.

⁴Ama’n thempu kalenhei leh Dân ojahei ankhenga abek mantûp heia, “Messiah kha khon mo a’nte sik?” tia ader hei.

⁵Anmani’n anleimasôn, “Judea ram a Bethlehema kae. Ajârchu sânkathem talei mazet kha hi kae:

⁶‘Judah ram shunga Bethlehem, Judah khōpuihei kâra nang akasinpen changmak che; ajârchu kami Israelhei ka-ensui sik mi kha nanga inphut hlamkakei inkhat akajōng sik kae.’”

⁷Herod in nisōtinga khōhmehei kha marûk a abek heia ârsi kha heitik phatak a mo ajōng kasōk ti kha aleimanhret jo.

⁸Khava sōa ama’n hiva ṭong mantheina hi anei heia Bethlehema atir jo hei, “Nangni se ruh, naite chungchâng kha inchêntak a va-en ruh, ke’num kava kamukna sik, ama nanhmu pha leh aṭong ahong manthei ruh,” ati hei.

⁹Khang’khan andahlona kase jo hei, anhlam hrona nisōtinga ârsi anta leihmu mama kha anleihmu nôk jo. Anmani’n ârsi kha anhmu pha, heituk a anmalung kahōi jo, heituk a a’npâk jo hei! Khava khan naite omna chung tak a a’nhnga mak kârseng anhmating leikase lea kae.

¹¹Anmani inna khan kahlut hei, anmani’n naite kha anu Mary leh anhmu hei pha, inkun heia ankamuk jo. Ankutchoi bôm anmahlânga sana, thai marim katui, bero anpek joa kae.

¹²Anmani Herod hneng an-inle makna sik anrahmanga Pathen in amanse hei jâra hlam hlop inkhat a anramting inle jo hei.

¹³Anmani ansesō kahnunga, Rōngpu ngeva inkhat Joseph rahmanga jōng inlâra ahnenga, “Herod in naite hi that sik a ajong sik. Achang jâra thōi inna naite kha anu leh Egypt ram a ṭhōi jo ruh, khana ke’n ṭong kapek nôk mak kârseng chei sōn va-om ruh,” ati.

¹⁴Joseph kathōisōt a, naite leh anu kha aṭhōi heia, Egypt kajōna jân a kase jo hei,

¹⁵khana khan Herod thimak kârseng vaka-om jo hei. Hivahi, “Ke’n Egypt a inphut ka-Sapa kabeksōt,” tia Rōngpu’n sânkathem beia aleihri kha hui atlungna sik a kae.

¹⁶Nisōtinga ârsi lekha kathem he’n anmathlip jo eng ti Herod in amanhret jo pha, ahnuk kana hêr jo. Bethlehema leh khō inhnaipui heia pase naipang kum hnia inphut thōitingseng ṭhatna sik ṭong amasō jo, hivahi ama’n khōhmehei hnenga inphut ârsi sōkna pha amanhretna dungjuia aleitlo kae.

¹⁷Khang’khan sânkathem Jeremiah taleihri kha hui katlung jo:

¹⁸“Rama a rasa inkhat inthei, mi ka-ông ṭap rasa kae. Rachel kha asahei sik a leikaṭap; aṭap kha mathlema manhai sik leihnōm mak, ajârchu asahei kha kathi jo hei.”

¹⁹Herod thisōa, Egypt ram a Joseph rahmanga Rōngpu ngeva inkhat inlâra,

²⁰ahnenga, “Thōi roh, naite leh anu ṭhōi hei inna Israel ram a inle jo roh, ajârchu naite thatna sik akarei hei kha kathi jo hei,” aleiti.

²¹Khava jâra Joseph kha kathōia naite leh anu kha aṭhōi heia, Israel ramting inle jo hei.

²²Tâk Judea ram a Archelus kha apa Herod kathlenga reng kachang ti ṭong Joseph in athei pha, Judea ram a se sik kaṭi jo. Arahmanga akakhe chet mantheina le’npeksa, khava jâra Galilee ramting kasea,

²³Nazareth inti khōpui inkhat a inn avamatung jo; ti chu hivahi sânkathemhei taleihri, “Ama Nazareth mi a’nti sik kae” tina kha huitlungna sik kachang jo.