Read Komrem MATTHEW 20 Bible Online

MATTHEW 20 - Komrem bible

MATTHEW 20

¹“Marvân Rengram khachu hiva kapō kae. Pha khat a mi inkhat in avomhrui rahōna ṭōn katlo sik a mi, nek sik kajonga jîngkâr hmatak a kasōksōt a kae.

²Ni khat a kanihlō cheng khat sâm pek sik heia leikahnōma avomhrui thei rahōna ṭōn katlo sik atir jo hei.

³Khava sōa pungkō radona ama keithea kasōk nôk a heite tlo loa akangirlele mi ṭhahrep avahmu jo hei,

⁴khana ama’n, ‘Nangni’m kavomhrui thei rahōna va’nṭang ruh, nanhlō kaṭha kapek sik chei,’ ati hei.

⁵Khana anmani kase jo hei. Khana sûnṭim pung 12 radona leh khōhlei ting pung 3 radona ama kasesōt nôk a khang tlit khan mihei avatir nôk heia kae.

⁶Kani tlâk sik ting pung 5 radona ama keithea kasesōt nôk a mihlop ṭhahrep aleikangirle hei avahmu hei. Ama’n anhnenga, ‘Nangni sûn nilun heisa mo heite tlo loa pha nantamanhmang?’ tia ader hei.

⁷Anmani’n anmasôna, ‘Tûte inkhat in keini anekmak,’ anti. ‘Kaṭha jo, nangni’m se ruh, vomhrui rahōna ṭōn vatlo ruh,’ ati hei.

⁸“Khōhlei ahong tlung jo pha, vomhrui rahōn kapupa khan anei katintapa hneng khan, ‘Ṭōn katlohei kha behei roh, ankani hlō pek jo hei roh, khana hnungpena ṭōn katlohei pek manphut inna hmapena ṭōn katlohei achaina pek hei roh,’ ati.

⁹Pung 5 radona ṭōntlo kaphut hei kha dangka cheng khat et apek hei.

¹⁰Hmakakei loihei kha anhong pha anmani’n akatamdet antachen sik a anleimandon; tâk anmani’m dangka cheng khat et apek heia kae.

¹¹Anmani’n sêr kha an-inlo pha rahōn kapupa chunga khan inphin jo hei.

¹²‘Hnung kakhôrpen nami nek he’nchu pung khat rōk ṭōn antloa, keini sûnilun kani kalum kadea ṭōnkatlo leh naman-ang ung,’ anti.

¹³“Akapupa khan ankâra inkhat hneng amasôna, ‘Rangei roh, kaṭhōn, ke’n nangni kahōn chei changmak. Ni khat a dangka cheng khat kahlō sik a akahnōmsa chei kae.

¹⁴Tûn nahlō kha inchoi inna se jo roh. Nang kapek che jahrep hiva hnung kakhôrpa hi’m ke’n kapek hnōm kae.

¹⁵Kasêr kha karachama hmangna sik ratha kaneimak sik mo? Pek a kaṭhat jâra nathang akase mo?’ atia kae.”

¹⁶Khana Jesu’n aṭong chaina, “Khava jâra hnung kakhôr hei khan hma ankei sik, khana hma kakeihei khan hnung ankhôr sik,” ati.

¹⁷Jesu Jerusalem kajōna aselai, ama’n asonle 12 hei kha hlam hlop a aṭhōi heia khanga anselai ṭongmarûk aleihri pek hei.

¹⁸Ama’n ahri pek hei, “Rangei ruh, eini Jerusalema kase sik me, sona son Mihring Sapa kha thempu kalenhei leh Dân ojahei kut a a’npek sōt sik kae. Anmani’n thina katlunga themmô anpek sik,

¹⁹khana Jât-hlop hei kut chunga anpek sōt sik, anmani’n anmanuisō sik, anjem sik khana thingrakea ankir mankop sik, tâk ni 3 ning kahringa keimathō akachang sik kae.”

²⁰Khava sōa Zebedi nuhmei kha asahei 2 leh inṭhōia Jesu hneng kahonga ahma hong-inkuna akamuk a, ngekna inkhat ahongnei.

²¹Jesu’n ahnenga, “Heimo namadu?” ati. Amanu’n amasôn, “Nang Reng nachang pha leh kasa 2 hei hi inkhat nachangting inkhat naveiting ani’n-ongna sik ṭong atep pek roh.”

²²Jesu’n asahei hneng amasôn, “Nangni’n nantader kha heimo manhret mak chei. Kei ta-in sik inrengna kōklei kha nangni’n nanta intor nâk sik mo?” Anmani’n ahnenga, “Kan-in tôr sik,” antia kae.

²³Ama’n anhnenga, “Kadik, nangni’n kakōklei khachu nan-in sik; tâk kachangtinga leh kaveitinga in-ongna sik kadeina ratha neimak eng. Khava hmun khachu kapa’n amantluk pek hei tachen sik kae,” ati.

²⁴10 hei khan khava ṭong kha anthei pha, unai 2 hei chunga khan anhnuk kana jo.

²⁵Achang jâra Jesu’n ankhenga abek heia ati, “Jât-hlop hei vaikarôn he’nchu anmihei chunga anrōngpu kachang hei, khana hlamkakeihei khan anchunga pui katluk a ratha annei ti nanmanhret.

²⁶Tâk nangni kâra chu hinga changmak ning. Nankâra inkhat in alenhnōm inchu ama khan alak-hei sōk akachang sik kae;

²⁷khana nangni kâra inkhat in achungpen achanghnōm inchu ama khan nansōk akachang sik kae,

²⁸Mihring Sapa kapōa, mi tarazen sik a changloa, mi inzen sik jôk leh mi katamtak intlensōt sik a ahringkhō kapea akajōng kapōa khan atlo sik kae.”

²⁹Khang’khan Jesu leh asonle he’n Jericho kha andahlon joa, mipui katamtak in anleijui.

³⁰Hlamlen panga hmitkacho 2 ale’n ong hei khan Jesu kahong ti ṭong antheia, an-ôna, “David Sapa! Keini alungset roh, Apu!” anti.

³¹Mipuihei khan anmani anrasei heia sip katia an-omna sik anmanthei hei. Tâk anmani’n inhnakchet a an-ôna, “David Sapa! Keini alungset roh, Apu!” anti.

³²Jesu kangira khana abek heia, “Nangni heimo katlo pek sik chei nanta madu?” ader hei.

³³Anmani’n anmasôn, “Apu, kanhmit namanvâr sik kanmadu!”

³⁴Jesu’n alungset heia anhmit kha asitpek jo hei; khava phatak a anhmit kavâr jo, khana ama anjui joa kae.