Read Komrem MATTHEW 22 Bible Online

MATTHEW 22 - Komrem bible

MATTHEW 22

¹Jesu’n mipuihei ahri pekna khan tekâk aleihmang nôk a kae.

²“Marvân Rengram kha hiva kapō kae. Pha khat a reng inkhat in asapa hmōiṭhōina revei inkhat aleimantluk.

³Ama’n revei sâktlânga sik a hmelâk-hei kabek sik asōk atir hei, tâk anmani honghnōm mak hei.

⁴Khava jâra asōk ahlop atir nôk heia ahmelâk-hei hneng hing’hin ti ruh: ‘Tûn revei thlaithleng kadônsō jo; kase che leh kavei manthai kase terehei kathat a, heirakip mantluksō jo kae. Hmōiṭhōina reveia hong ruh, vati hei ruh!’ ati.

⁵Tâk hmelâk-hei khan heitea sakmak heia anṭōn et kase jo hei: inkhat in hleia, ahlop inkhat in inveina hmun a andahlon jo,

⁶alak he’n asōk-hei kha ansur heia, anvōk hei, khana anthat hei.

⁷Rengpa kha ahnuk kana hranghra jo, mikathat-hei kathat sik leh ankhōpuihei karo inhmang sik a asepei atir jo hei.

⁸Khava pha ama’n asōk abek heia anhnenga, ‘Hmōiṭhōi revei sâktlâng mantluk jo kae, tâk kahmelâk mihei sik a anrahōi changmak jo.

⁹Tûn khōpui hlamlen heia son se una nantahmuhmu hei vabe hei ruh,’ ati.

¹⁰Sōk-hei kha khōpui hlamlena kase heia akaṭha leh akase antahmu mi rakip anmantûp jo hei, hmōiṭhōina innden kha mipui leikasip jo hei.

¹¹Rengpa kha hmelâk-hei ka-ena hongkahlut, pase inkhat hmōiṭhōi retpōn a’nvonmak ahmu sōt jo.

¹²Rn khan ahnenga, ‘Ṭhōnpa hmōiṭhōina retpōn invon loa heikhong mo aheikahlut che?’ ati. Tâk mipa kha heite ṭongmak jo.

¹³Khava sōa rengpa khan asōk-hei hneng, ‘Akut leh ake khit una vângting inthimna hmun a hlonsōt ruh,’ ati hei. Khana khan kaṭap sik khana aha akarôt sik jo,’ ati.”

¹⁴Jesu’n achaina ahri, “Mi katamtak inbe hei, tâk akatlômtek indeisōt hei.”

¹⁵Pharisee kasesōt heia ṭongderna vâng Jesu kha man-ôkna sik anmantluk jo.

¹⁶Anmani’n ansonlehei leh Herod mihei ahnenga antir hei. Anmani’n, “Oja, nang in akadik nahri kanmanhret che. Nang in, tûte lûrna leh lenna chunga kajana neiloa, mihei sik a Pathen lungdo kha kadik a namanthei hei, ajârchu nang in tûte inkhat lulenna kha donmak che.

¹⁷Khava jâra, heimo nang in namandon amanthei roh. Rome Rengkalen Caesar hneng ramsêrṭhei pek sik hi nidân kadōi mo, akadōimak mo?” anti.

¹⁸Achang ravâng, anṭhatmakna ṭōnmantluk kha Jesu’n amanhret a, “A’nṭhat hlemsak-hei! Heisa mo kei man-ôk sik a a’ntluk chei?

¹⁹Ramsêrṭhei pek sik sêr kha eiman hmu ruh!” ati hei. Anmani’n dangka cheng khat anheichoi,

²⁰ama’n anhnenga ader hei, “Hivahi tu lim leh tu rahming mo?”

²¹Anmani’n anmasôn, “Rengkalen Caesar ta kae.” Khava pha Jesu’n ahnenga ati, “Caesar ta kha Caesar pek ruh, Pathen ta kha Pathen pek ruh.”

²²Anmani’n kha anthei pha inlak ansak hêra andahlona kasesōt jo hei.

²³Khava ning tak khan Sadduceehei Jesu hneng kahong heia mihei hi thina inphut thōimak hei ning tia anhria kae.

²⁴“Oja, Moses’n mi inkhat sa neiloa athi jo’nchu, asōpuipa khan anuhmei kha inlo rasoh, khana akathi jo sōpuipa sa kae tia a’nlo sik nai nei hei rasoh ati.

²⁵Tûnchu, sōpui unai 7 leika-om hei. Upapen khan nuhmei aneia sa neiloa kathi jo, anaipa sik a anuhmei kha adahlon jo.

²⁶A’n-anghrep omchen kha 2 tlukna hnenga, 3 tlukna hnenga, khana achaina unai 7 ankhenga hnenga leikasōk jo.

²⁷Achaina pena anlômnu kha kathi jo.

²⁸Tûnchu, akathihei kahringa thōi nôk ning khan amanu kha tupen nuhmei mo akachang sik jo? Amanu kha ankhenga anleiompui,” anti.

²⁹Jesu’n amasôn hei, “Heituk a nantaṭhe jo mo! Hivahi Ṭong intheng a-emak leh Pathen ratha hratna kha nanmanhret mak jâra kae.

³⁰Ajârchu akathi he’n kahringa anthōisōt ning khan anmani marvân ngeva ka-ang sik jo hei, lu hôngmak jo hei ning.

³¹Tûnchu, akathihei kahringa anṭhōisōtna chungchânga chu: Pathen in amanthei chei kha teiphung mak chei mo? Ama’n

³²‘Kei Abraham Pathen, Isaac Pathen, khana Jacob Pathen eng kae,’ ati. Ama chu akathihei Pathen kha changmak, akahring hei Pathen kae.”

³³Mipuihei khan kha anthei pha, aman theinahei chunga khan anmandon-hla hêr joa kae.

³⁴Jesu’n Sadduceehei amandai hnger jo hei ti ṭong Pharisee he’n anthei pha, hong intûp hei,

³⁵ankâra Dân oja inkhat in ṭongder vâng man-ôk sik a aleitlo.

³⁶“Oja, kho kha mo Dân shunga ṭongpek kalenpen?” tia ader.

³⁷Jesu’n amasôn, “‘Nang in namalung rakip, naratha rakip, khana namandonna rakip vâng Rōngpu na-Pathen kha nalungset sik kae.’

³⁸Hivahi akarôn pen leh akalenpen ṭongpek kha kae.

³⁹Inhni tlukna akakhôk pen khachu: ‘Nang nabinga na’nlungset kapōa nakhō naven lungset roh,’ ti hi kae.

⁴⁰Hiva ṭongpek 2 chunga hin Moses Dân pumpui kha leh sânkathemhei mantheina kha a’nhnga kae,” ati.

⁴¹Pharisee ṭhahrep anho’ntûp jo pha, Jesu’n ader hei,

⁴²“Messiah chungchânga heimo nanmandon? Ama tusa mo?” Anmani’n ahnenga, “David sapa,” anti.

⁴³Jesu’n, “Khan chu heisik a mo ama kha ‘Rōngpu,’ tia abekna sik Rathla’n David kha amanhlim? David in ati,

⁴⁴‘Rōngpu khan ka-Rōngpu hneng: Na’ndōipui hei nakethōia kadamak kârseng kachangting in-ong roh,’ tia aleihri.

⁴⁵David in ‘Rōngpu’ tia abek inchu, heikhong mo Messiah kha David sapa akachang thei sik?” ati.

⁴⁶Jesu kha tûte’n masôn tor mak jo hei, khana khava ninga inphut tûte’n ṭong der ngammak jo hei.