Read Komrem MATTHEW 24 Bible Online

MATTHEW 24 - Komrem bible

MATTHEW 24

¹Jesu’n Bek-inn kha adahlona kasesōt jo, khava pha asonle he’n khava innhei chungchânga amandona sik a ahnenga kahong hei.

²Ama’n ati, “Kadik, nangni’n hihei seng hi kaṭha a nanhmu sik hei. Hivahi kahri pek chei kae: hinna hlunghei hi inkhatbek anhmun et a om mak jo hei ning, inkhat et a hlon mathlak sik hei kae.”

³Olive Tlâng chunga Ama a’n-onglai sonlehei kha anhlop a ahnenga kahong heia, “Khahei kha heitik mo ajōng kasōk sik khana najōngna sik leh pha inchaina mêrchîkna kha heimo akasōk sik amanthei roh,” anti.

⁴Jesu’n amasôn hei, “Insing thei ruh, tûte’n ahōn makna sik chei tlo ruh.

⁵Mi katamtak in, kei sik a ṭongkahri ung antia kahong sik hei khana, ‘Kei Messiah eng kae,’ anti sik, mi katamtak anhōn sik hei.

⁶Nangni’n akahnaia re inhnok rasa khana akahla a reṭong nanthei sik; nanmalung manrim mak ruh. Khahei kha kasōk nger sik, tâk achaina chu lachang mak ning.

⁷Ram inkhat leh inkhat indōi sik hei, rengram inkhat leh inkhat inbuhlu sik hei. Hmun rakip a sâk kakhôk sik khana lingnu innok sik.

⁸Hihei rakip hi naiha kaphu nat inphutna kapō kae.

⁹“Khan chu nangni karâkna sik leh that sik a mihe’n ansur sik chei khana mikut chunga anpek sōt sik chei. Kei jâra jât rakip in anhōt sik chei.

¹⁰Khava pha mi katamtak in taksenna anmasō sik; inkhat in inkhat inhōn inthla sik hei, in-enkada sik hei.

¹¹Sânkathem inhlem katamtak hong kasōk sik hei, khana mi katamtak anhōn mathlâk sik hei.

¹²Ṭhatmak kapung kha khanga kachang sik a kha, mihring katamtak hei lungsetna hong kabâng sik.

¹³Tâk achaina katlunga kahnet a ka-om mi kha hukmanhring kachang sik.

¹⁴Khana hiva Rengram Ṭong kaṭha hi vânhnōi raleia jât rakip hneng sâkhi sik a hrimanthang sō sik kae; khava sō leh a’nchaina kha jōng katlung sik jo.

¹⁵“Sânkathem Daniel taleihri, ‘Ṭit ka-om tak Inrengna’ kha nanheihmu sik. Khava khan hmun inthenga hongkangir sik.” (Akatei hnenga ṭongmanthei: hiva tina hi manhret nger roh!)

¹⁶Judea ram a ka-om he’n tlâng ting akatlânsōt nger sik hei kae.

¹⁷Innchunga ka-om khan inna aneinâk kalo sik jōngṭumna pha lomak hei rasoh.

¹⁸Khana hleia ka-om mi khan apōn kalo a-inna he’nle mak rasoh.

¹⁹Khava pha nai kavonhei leh naitenuhei heituk a ṭitpek ka-om sik hei mo!

²⁰Phebi lai a-emak leh Châmhngat kani ning nantlânsōt makna sik Pathen hneng inder ruh!

²¹Ajârchu khava pha inrimna kha ralei insyembia inphut tuning katlunga aleikasōk rakip akakhe chet inrimna kachang sik. Khana khava kapō kha inkhatbek avea sōk mak ning.

²²Tâk Pathen in kanihei kha amantlôm jo; amantlôm mak inchu, tûte hring tor mak ning. Hei-achang inum ami kadeisōt hei sik jâra Pathen in kanihei kha asukmanbong pek sik hei.

²³“Khana mi inkhat in nanhnenga, ‘Enruh, Messiah hin ka-om!’ a-emak leh ‘Son ka-om!’ anti’num taksen mak ruh.

²⁴Ajârchu Messiah inhlem leh sânkathem inhlem hong kasōk sik hei; khana a-ethei chenna Pathen kadeisōt hei kapha hōn mathlâkna sik det-hla ka-om tak leh ṭōn-inlak antlosōt sik.

²⁵Rangei ruh! Hihei hi apha kha atluk mak hma kahri pek dek chei kae.

²⁶“Achangmak leh, mi’n nanhnenga, ‘Enruh, ama kha nêrdiram thōia ka-om!’ anti’num, vase mak ruh; khana mi’n, ‘Enruh, ama hin inthup!’ anti’num, taksen mak ruh.

²⁷Ajârchu nisōtinga inphut khō ahon’phe khan bōirōk rakip ara-âng kapōa Mihring Sapa ajōng sik kha khanga kati sik.

²⁸“Kathi kalōng omna hmun a, hmuthonghei intûp sik hei.

²⁹“Khava khōdeng theina kani a’nchaisōtak leh kani inthim sik, thla vârmak ning, ârsi marvâna inphut katla sik hei, khana bōirōk a ratha hratna hei kha anhlam hroa inphut hnongsōt sik hei kae.

³⁰Khava pha Mihring Sapa jōngna sik mêrchîkna kha bōirōk a inhmu sik jo; khana Mihring Sapa kha marvân sumtuk chunga aratha neina leh alûrna leh inṭhōia ajōng kha anhmu pha raleichung jât rakip in kaṭap sik hei.

³¹Pengkun kalen kha antum sik, ama’n angeva ralei rakir manlia atir sik hei, anmani’n akadeisōt seng kekung leh kelera anchom mantûp sik hei.

³²“Theichangkung in manhretna manthei chei rasoh. Abâk-hei ahong ka-êm heia, hong kadông heia, abō ahongcher jo’nchu khōlum pha kahnai jo ti nangni’n nanmanhret.

³³Kha leh in-anghrep a, nangni’n hihei rakip nanhmu pha, apha hong kahnai jo, a’nphut sik a intluk jo ti nanmanhret sik jo.

³⁴Omchen rakip hei hi tuna akahring mihei hi anthisō mak hma akasōksō sik hei kae ti hi mandonsōt ruh.

³⁵Marvân leh ralei chu inhmang sik, tâk kei ṭongrahme hei chu inhmang hêrmak hei ning.

³⁶“Khava kani leh pha kha tûte inkhat in manhret mak hei, marvân ngevahei leh Sapa kha’num manhret mak hei; Pa rōk in amanhret kae.

³⁷Mihring Sapa jōng sik kha Noah phalai aleikasōk kapō kha ka-ang sik.

³⁸Tuishâng alen mak hma Noah kha rakōnga ahlut ning katlung, mihei kha ansâk an-in, nuhmei-pase lu-inhông heia leika-om hei;

³⁹tuishâng ahong lena, ahong tlenhlon mak hei kârseng anmani’n leimanhret mak hei. Khang’khan Mihring Sapa ajōng sik kha’m akachang sik kae.

⁴⁰Khava pha hleia ṭōnkatlo 2 leika-om sik hei: inkhat inlo sik inkhat indahlon sik.

⁴¹Nuhmei 2 suma sâng anleisuk sik: inkhat inlo sik inkhat indahlon sik.

⁴²“Khava jâra inrin ruh, ajârchu heikania nan-Rōngpu akajōng sik manhret mak chei.

⁴³Inn kapu khan inru heitik pha ahong sik kha amanhret inchu, ama inrin ṭhak sik a kha a-inna manhlut mak ning ti hi nangni’n nanmanhret.

⁴⁴Kha achang inchu, nangni’m a’nrinṭhak sik chei kasōk, ajârchu nangni’n nanhlamrin mak phatak a khan Mihring Sapa kha akajōng sik kae.

⁴⁵“Khan chu, tu hmen , taksen ka-om leh akasing sōk kha? Khava khachu arōngpu pa’n sōk alak-hei ka-ensuia leh aphahrep a anbu kapek sik a amanṭangpa kha kae.

⁴⁶Akapupa inna ajōng pha khanga aleikatlo sōk kha heituk a mikahōi mo!

⁴⁷Kadik, hi kahri pek chei kae, akapu khan khava mi kha anei rakip chunga vaikarôn amanchang sik a kae.

⁴⁸Tâk sōk kaṭhamak achang inchu, alungria akapu kha lahong vakmak ning atia,

⁴⁹ju-inruihei leh an-in, ansâk a asōk changpui hei kha vōk aleiphut sik jo.

⁵⁰Khan chu khava sōk kapu kha ni khat asōkpa’n ataksen mak phatak a leh amanhret mak kani ning tak kajōng sik jo.

⁵¹Akapu khan ama kha abong-bonga atan sik khana a’nṭhat hlemsak-hei vângchen kha ama’m amanchen sik. Khana khan kapenga aha akarôt sik jo.