Read Komrem MATTHEW 25 Bible Online

MATTHEW 25 - Komrem bible

MATTHEW 25

¹“Khava pha a marvân rengram kha hiva kapō kachang sik. Pha khat a nuhngâk 10 he’n anthaihmei anchoia hmōipa intōpui sik a leikasesōt hei.

²Ankâra 5 chu kamohei, khana alak 5 chu kasinghei.

³Akamohei khan anthaihmei anchoi, tâk thaitui chu leisun mak hei,

⁴akasinghei khan chu anthaihmeia thaitui kasip a an-inchoia kae.

⁵Hmōipa hong sik kha apha kasôt a kahlut jo, khava jâra nuhngâk-hei kha anhmit kahmua inngui jo hei.

⁶“Ṭhangṭim jo kae mi ka-ông rasa inthei, ‘Hmōipa kha kahong jo! Hong ruh va’nhmupui jo ruh!’

⁷Khava pha nuhngâk 10 hei kathōi heia anthaihmei andet manphut jo.

⁸Akamohei khan akasinghei hneng khan, ‘Nanthaitui ajing apek ruh ajârchu kanthai hmei kathi sik jo,’ anti.

⁹Tâk akasinghei khan anmasôn hei, ‘Changthei hêrmak ning, keini sik leh nangni sik tlukmak ning. Akajōrhei hneng se una, va’nchôk ruh.’

¹⁰Khan chu akamo nuhmeihei kha thaitui inchôk kase jo hei; khanga anselai, hmōipa kha jōng katlung jo. Khana 5 a’ntlukdek hei kha ama leh inṭhōia revei hmun a kahlut jo hei, khana kot kha ankir joa kae.

¹¹“Hnunga alak nuhngâk-hei kha hong katlung jo hei. ‘Apu, apu! amanhlut roh!’ antia ka-ông hei.

¹²Hmōipa khan amasôn hei, ‘Changthei hêrmak ning! Ke’n manhret mak chei eng.’”

¹³Jesu’n achaina ahri, “Khava jâra insing thei ruh, ajârchu nangni’n akani leh apha kha manhret mak chei.”

¹⁴“Khava pha khan marvân Rengram kha hiva kapō kachang sik. Pha khat a ram kahlatak a khōhmea akase sik pase inkhat leika-om; asōk-hei abek heia akarōi chunga aleinganse hei.

¹⁵Antlo torna dungjui et a aleisempek hei: inkhat hneng sêr 5,000 apek, ahlop inkhat hneng 2,000 apek, khana ahlop inkhat hneng 1,000 apek. Khana ama khōhme kase jo.

¹⁶Sêr 5,000 kachenpa khan inrangtak a kasea inveina atloa 5,000 amanpungsa jo.

¹⁷Kha leh in-anghrep a sêr 2,000 kachenpa sōkpa kha’num 2 amanpungsa jo.

¹⁸Tâk sêr 1,000 kachenpa sōk khan kasea ralei khur achoa, akapu sêr kha avûma athup jo.

¹⁹“Pha kasôttak sōa khava sōk-hei ankapu kha kahonga anmani leh enmantōkna antlo jo.

²⁰Sêr 5,000 kachen sōk kha akakhe 5,000 leh inṭhōia heikahlut a avapek jo. ‘Apu, nang in sêr 5,000 nanganse eng kae. Enroh! Sêr 5,000 kaman pungsa a kae,’ ati.

²¹Akapu khan ahnenga, ‘Kaṭha natlo jo, mikaṭha leh taksen ka-om sōk! Nang aja katlômtek chunga taksenthei kachang che, akatamtak chunga kamanngan sik che kae. Hong roh kei inpâkna hin chen vanei jo roh!’ ati.

²²“Sêr 2,000 kachenpa kha’m kahonga, ‘Apu, sêr 2,000 nanganse eng kae. Enroh! 2,000 kaman pungsa,’ ati.

²³Akapu khan ahnenga, ‘Kaṭha a natlo jo, mikaṭha leh taksen ka-om sōk! Nang aja katlômtek chunga taksenthei kachang che, akatamtak chunga kamanngan sik che kae. Hong roh kei inpâkna hin chen vanei jo roh!’ ati.

²⁴“Khava sōa sêr 1,000 kachenpa sōk kha’m kahonga, ‘Apu, nang mi kakhôktak inkhat nachang kamanhret che; hmuchi navor makna hmun a na-ât, khan chu nakathek makna hmun a nakhôm mantûp a kae.

²⁵Ke’n kalei ṭit chea, nasêr kha kase enga ralei thōia kathup a kae. Enroh! Nata kha hi kae,’ ati.

²⁶“Akapu’n amasôn, ‘Mikaṭhamak leh ratha kase sōk!’ Ke’n kavor makna hmun a ka-ât leh kakathek makna hmun a kakhôm mantûp namanhret mo?

²⁷Chu achang inchu, kaser kha sêr dana bank a naleida sik kae, khana kei kahong pha kata kha asêrthōi leh kahmu sik kae.

²⁸Tûnchu, ahnenga sêr kha losōt una sêr 10,000 kaneipa hneng pesa ruh.

²⁹Ajârchu tu achang inum ṭhahrep akanei kha, akakhea inpeksa sik, ama akatamtak anei sik jo; tâk heite kaneimak kha, anei tete kha kasut sik kae.

³⁰Akahnem mak sōk khachu, vânga khō inthima hlonsōt ruh; khana khan akapenga aha akarôt sik kae.’

³¹“Mihring Sapa kha Reng kapōa marvân ngevahei leh inṭhōia ajōng pha, alen in-ongna chunga in-ong sik,

³²khana ahmai kunga jât rakip intûp sik hei. Kemōng kakhem inkhat in kemōng leh kehei aṭhen kapōa, anmani kha rup hnia aṭhen sik hei.

³³Ama’n mikadik-hei kha changting ada sik hei khana alak-hei khan veiting ada sik hei.

³⁴Khava pha Rengpa khan achang tinga hei hneng, ‘Hong ruh, kapa mahâmṭhat pek hei! Vânhnōi insyembia inphut nangni sik a mantluksa rengram kha hongchen jo ruh.

³⁵Ajârchu kei leikaṭâm enga bu nanpek eng, kei katui leikahrea in sik nanpek eng; khōhme inkhat a kahong enga nanmathlung eng,

³⁶kakarōksaia leika-om enga pōn nanmansi eng; leikana enga nanhong en eng, kurkhum a ankhum enga nanhong phâk enga kae,’ ati.

³⁷Khava pha mikadik-hei khan anmasôn sik, ‘Rōngpu, heitik a mo aleikaṭâm chea bu kantapek che, khan chu natui aleikahrea in sik kantapek che?

³⁸Heitik khan mo khōhme inkhat a akalôn chea kan-inna kanta mathlung che, khan chu nakarōkpet a aleika-om chea pōn kantamansi che?

³⁹Heitik khan mo nanatna kantahmu chea a-emak leh kurkhum a aleika-om chea kantavaphâk che?’

⁴⁰Rengpa khan amasôn sik hei, ‘Kadiktak a kahri pek chei kae, hiva ka-innshung mihei kâra akasin pena a’ntei inkhat hneng nanta leitlo kha, kei hneng nantatlo kae!’

⁴¹“Khana veitinga aka-om hei hneng khan ama’n ati sik, ‘Pathen hâksêr kachen hei, kahnenga inphut sesōt ruh! Seitan leh angevahei sik a mantluksa kumsôt hmeikhura sik sesōt ruh!

⁴²Kei kavon leikaṭâma bu apek mak chei, katui leikahrea in sik aleipek mak chei;

⁴³khōhme inkhat leikachang enga nan-inna amathlung mak chei, karōksaia leika-om enga pōn amansi mak chei; leikana enga khana kurkhum a ka-om enga ahong enmak chei,’ ati hei.

⁴⁴“Khava pha anmani’n anti, ‘Rōngpu, heitik khan mo navon aleikaṭâm, natui akahre, khōhme aleikachang che, pōn silo che, kurkhum a aleika-om che, khan chu aleikana chea kantaleihmu chea, kantalei razen mak che?’ tia anmasôn sik.

⁴⁵Rengpa’n amasôn sik hei, ‘Kahri pek chei kae, hihei kâra akasinpen inkhat chunga inthōpui sik akada chei kha, kei inthōpui akada chei kae.’

⁴⁶Khan chu, anmani are-rea karâkna kachen sik a atir sik jo hei, tâk mikadik-hei khachu kumsôt hringna kase sik jo hei.”