Read Komrem MATTHEW 27 Bible Online

MATTHEW 27 - Komrem bible

MATTHEW 27

¹Jîngkâr hmatak thempu kalen rakip leh upahei seng in Jesu thatna sik lungthim antlo jo.

²Anmani’n ama thirhrui vâng ankhit a ankeia Roman ram vaikarôn, Pilate kut a anvapek jo.

³Akapek sōt Judas khan, Jesu masetna antapek kha ahong manhret jo pha insir joa dangka 30 kha thempu kalenhei leh Sehmang-pachonghei hneng avapek male jo hei.

⁴“Ṭhena kaneimak inkhat thatna sik a mikut a kapek sōt hi ke’n kaṭhe jo!” ati. Anmani’n anmasôn, “Khavakha keini’n heimo kantamanlo sik? Khavakha nabing ṭōn jo kae!”

⁵Judas in sêr kha bek-inn shunga khan avahlon mathlâk a adahlon jo; kasesōt a abinga va-inkhei hlon jo.

⁶Thempu Kalenhei khan sêr kha anloa, “Hivahi thisen sêr achang jâra bek-inn sêr manbukna shunga dasa sik hi Dân changmak,” anti.

⁷Anmani inbe heia khava sêr kha, khōhme kalôn hei inhrena thlân hmun sik a, Be-kakhengpa Hlei kha anrachôkna jo.

⁸Khava jâra khava hlei kha tuning katlung hin “Thisen Hlei” intia kae.

⁹Khana khan sânkathem Jeremiah taleihri kha hui leikatlung jo: “Israel mihe’n ama pek sik a inhnōmna dangka 30 kha anmani’n anleilo,

¹⁰khana Rōngpu’n ṭong apek eng kapōa khava sêr vâng khan be-kakhengpa hlei rachôkna anhmang jo,” ati.

¹¹Roman ram vaikarôn hma a Jesu kha kangira ṭong aleider, “Nang Jehudihei reng che mo?” Jesu’n amasôn, “Khanga nang in nati jo.”

¹²Tâk thempu kalenhei leh Sehmang-Pachong he’n ama anmasetna chunga ama’n heite masôn mak hei.

¹³Khava jâra Pilate in ahnenga ati, “Nachunga masetna antanei rakip hei hi theimak che mo?”

¹⁴Tâk Jesu’n inkhatbek masôn sik leihnōm mak; khava jâra ram vaikarôn khan adet-hla hêr joa kae.

¹⁵Rakan Kût pha rakip a Roman ram vaikarôn khan mipui tamadu mi inkhat kurkhum a inphut masōpek sik kha angai leikae.

¹⁶Khava lai khan rahming inthang Jesu Barabbas inti kha kurkhum a le’nkhuma kae.

¹⁷Khava jâra mipui anhong intûp jo pha, Pilate in anhnenga, “Tu mo kamasōpek sik cheia nanta madu, Jesu Barabbas mo, a-emak leh Jesu Messiah inti kha mo?” ati.

¹⁸Jehudi hlamkakei he’n ahnenga Jesu anta heipek sōt hi achunga anthang set jâra kae ti hi amanhret joa kae.

¹⁹Pilate kha ṭong tanna den shunga a’n-onglai, anuhmei in, “Tuning karahmanga ama jâra khōdeng theina hingja kaleinei, khava jâra ṭhena kaneimak mi kha heite manlomak roh,” tia ṭong ahei manrôna kae.

²⁰Thempu kalenhei leh Sehmang-pachonghei khan Pilate hneng Barabbas kha masōna sik khana Jesu kha thatna sik akader sik a mipuihei kha anmathok jo hei.

²¹Tâk Pilate in mipuihei kha ader hei, “Hihei 2 kâra tu kha mo nangni sik a kamasōpek sik chei?” “Barabbas!” tia anmasôn.

²²Pilate in anhnenga ader hei, “Khan chu, Messiah inti Jesu hi heimo kamanlo sik?” Ankhengpet a anmasôn, “Thingrakea makhei roh!”

²³Tâk Pilate in ader hei, “Ama’n akadik mak heimo atlo jo?” Khan chu anmani’n kare inhnaktak a ông anphut a, “Thingrakea that roh!” anti.

²⁴Pilate in aṭong der hei kha ahnemna om mak jo, mipui inchok inhângna kasōkbei sik jo ti kha ahmu pha, tui ajing aloa mipui hmaikunga akut asôp a, “Hiva mipa thina chunga kei chu mô rônmak ning! Hivahi nanbinga nantatlo kae!” ati hei.

²⁵Mipuihei khan anmasôn, “Athina mô hi keini chunga leh kansahei chunga tlung rasoh!”

²⁶Khava pha Pilate in Barabbas amasō pek jo hei; khana Jesu khachu amanjem hei sōa thingrakea makhei hlon sik a apek sōt jo hei.

²⁷Pilate remi he’n Jesu kha ram vaikarônpa innpuiting anṭhōi manhlut a akahong seng kha intûp jo hei.

²⁸Apōnsi kha anhlikpek a pōn sendup anmansi jo.

²⁹Khana rahling lukhu ansyempek a anmankhua, khōnghre achangting anmanchoia, khana ahmai kunga inkun heia anmanuisō. “Jehudihei Rengpa nahringsei sôt rasoh!” anti.

³⁰Khana anmani’n anmachi thlōn khana sung anloa alua anleivōk pek.

³¹Khanga manuisōna kha a’nchaia, apōn anhlikpek a, ama pōn kha anmansi male jo. Khana thingrakea that sik a anṭhōisōt jo.

³²Anmani khanga anhei sōksōt lai Cyrenea pase inkhat arahming Simon inti anhmua, sepei he’n Jesu thingrake kha rumhrat a anmandoma kae.

³³Anmani Golgotha inti hmun ti chu “Lurōk Hmun” a kahong jo hei.

³⁴Khana khan anmani’n ju leh akakha anmanchôma Jesu anleipek, tâk ama’n amantem pha lei-in mak jo.

³⁵Thingrake chunga anmakheia, anmani’n apōn kha vâng-enna insem hei.

³⁶Khava sōa anmani khana khan in-ong heia anlei ena kae.

³⁷Alu chungdet a, “Ama hi Jehudihei Reng, Jesu,” tia amasetna malârna anmazet a antâra kae.

³⁸Khava sōa inru 2, inkhat achangting, inkhat aveiting Jesu leh thingrakea anlei makheisa hei.

³⁹Khava hnenga akapetan he’n anlu ankachuk a Jesu inzakna anleipek a kae:

⁴⁰“Nang chu Bek-inn naṭhet a ni 3 shunga nasaksōt sik kae! Pathen Sapa nachang inchu nabinga inhuksōt roh! Thingrakea inphut jōng ṭum roh,” antia kae.

⁴¹Khava kapōtak a thempu kalenhei leh Dân ojahei leh upa he’num anmanuisōa anhri:

⁴²“Ama’n milak chu ahuksōt, abinga chu inhuksōt tor mak! Ama hi Israelhei rengpa changmak mo? Thingrakea inphut ajōng ṭum inchu, khanba eini’n nitaksen sik!

⁴³Ama’n Pathen ataksen khana Pathen sapa eng kae atia kae. Kaṭha jo, en jo rih, Pathen in ahuk hnōm sik mo!”

⁴⁴Ama leh antamakhei sap inruhei kapha’num khang’khan inzak anleipek a kae.

⁴⁵Sûnṭimtak a inphut ram pumpui chunga pung 3 Kahlut a khō inthim jo.

⁴⁶Khōhlei pung 3 radona rasa inhnaktak a Jesu ka-ônga, “Eli, Eli, lema sabakhthani?” ati; khava tina chu “Ka-Pathen, ka-Pathen, heisa mo nadahlon eng?”

⁴⁷Khava hmun a akangir ṭhahrep he’n kha anthei pha, “Ama’n Elijah abek jo!” anti.

⁴⁸Ankâra inkhat khava phatak a katlâna tuipompōn inkhat aloa ju kasep a amachea khōnghre inkhat a akathia man-inna sik a aleipek.

⁴⁹Alakseng in, “Hngâk hi rih, Elijah akajōnga ahuksōt sik mo enrih!” anti.

⁵⁰Jesu rasa inhnaktak a ka-ông nôk a achaina kaphuk amasō jo.

⁵¹Khava sōa Bek-inna pinden pōn kha achunga inphut thōi katlung bit a her hnia inhler jo. Lingnu innok a, hlungpuihei kakik-khōi,

⁵²thlânhei inhlanga Pathen mi aleikathi hei katamtak kathōisōt heia kae.

⁵³Thlânhei kha andahlon jo hei, khana Jesu’n thia inphut athōisōtsō pha, anmani Khōpui Inthenga kahlut hei, khana khan mi katamtak in anhmu heia kae.

⁵⁴Rehlam kakeipa leh a-ompui sepei, Jesu kahngâk-hei khan lingnu innok leh omchen kasōk rakip kha anhmu pha kaṭihêr jo heia, “Kadiktak a hiva mipa hi Pathen Sapa kae!” anti.

⁵⁵Khana khan nupui katamtak leika-om hei, Galileea inphut ama aheikajui leh a’nthōpuihei, kahlajap a inphut anlei ena kae.

⁵⁶Anmani kâra khan Mary Magdalene, James leh Joseph nu Mary, khana Zebedi nuhmei le’nvei hei.

⁵⁷Khōhlei pha, Arimathea khōa mikahao inkhat heikatlung; arahming Joseph inti, Ama’m Jesu sonle inkhat kae.

⁵⁸Ama’n Pilate hneng kasea Jesu kalōng kha avader. Pilate in Jesu kalōng kha Joseph hneng pek sōtna sik ṭong amasō jo.

⁵⁹Joseph in akalōng kha aloa hruipōn innem neng inkhat vâng akatōm,

⁶⁰ama’n hlung kâra ama sik a a’nkhōrbi thlân shunga ahre jo. Khana thlânkot a khan hlungpheng kalentak inkhat anmakhusia kase jo hei.

⁶¹Thlân hmai kahnget a, Mary Magdalene leh alak Mary khana khan le’n ong hei.

⁶²Abân kania, Châmhngat kani ning, thempu kalenhei leh Pharisee he’n Pilate anlei inhmupuia,

⁶³“Apu, mimalei kaseipa khan ahring lai hinga, ‘Ni 3 sōa akathōisōt sik eng kae,’ aleiti kha keini’n kanmandonsōt.

⁶⁴Khava jâra ni 3 tlukmak kârseng thlân kha kaṭha anhngâkna sik ṭong pe hei roh, achangmak inchu asonle he’n kase sik heia kha akalōng kha anmarûk sik, khana mi hnenga ama thina inphut kathōi jo anti sik a kae. Hiva a’nchaina maleisei hin hma-inkei kanek a akaṭhamak chet sik kae,” anti.

⁶⁵Pilate in anhnenga, “Nangni’n akahngâk sik mi inṭhōi ruh, se ruh thlân kha nantorchena hrungna sik tlo ruh,” ati hei.

⁶⁶Khan chu anmani kase heia hlung antakamna chunga achîkna ankatat a thlân kha antôn makna sik ansyem jo khana akahngâk he’n anhrungna sik a andahlon jo hei.