Read Komrem MATTHEW 6 Bible Online

MATTHEW 6 - Komrem bible

MATTHEW 6

¹“Nangni bekṭōn kha mihei tahmu sik a mipui kâra akatlo hnâm nanchang makna sik intluk nger ruh. Mipui hmaikunga nantatlo achang inchu marvâna nanpa a inphut tloman inkhatbek chenmak tin chei.

²“Achang jâra akaneimak inkhat hneng nanpek pha, a’nṭhatsak he’n kamukna inna leh hlampui heia kalentak a malârna antatlo kapōa tlomak ruh. Mihei manpâkna chenna sik khanga antatlo kae. Kahri manchên pek chei kae, anmani tloman inpesō jo hei.

³Tâk nangni’n akaneimak mi nanpek pha, naṭhōn inhnai puipen kha’num amanhret makna sik tlo ruh.

⁴Khavakha mi manhret lo ṭōn akae sik kae. Khana nanṭōn tlo marûk a akahmu nanpa khan tloman apek male sik chei kae.

⁵“Nangni’n nander pha, a’nṭhatsak hei kapōa changmak ruh! Ajârchu anmani’n mihmuna sik a kamukna innheia leh hlampui rakir heia kangir heia kae. Kahri manchên pek chei kae, anmani tloman inpekdek jo hei.

⁶Tâk nangni’n nander pha, innden a hlut ruh, kot inkamsi ruh, hmit a a’nhmu mak nanpa hneng rirûk a der ruh. Khana marûk a naṭōntlo akahmu nanpa khan tloman kha apek sik chei.

⁷“Nangni’n nander pha, khōvelhei derna kaseitak kha an-pathen he’n anthei sik tia anmandonna kapōa ajâr kase ṭong katamtak hmangmak ruh.

⁸Anmani angmak ruh. Nander mak hma nanta rangei seng kha nanpa’n amanhret sōa kae.

⁹Achang jâra nangni’n hinga nantader sik kae: ‘Marvâna ka-om kan-Pa: Narahming kaja om rasoh;

¹⁰narengram jōng tlung rasoh; marvâna nalungdo a’ntlo kapōa raleichunga’m intlo rasoh.

¹¹Tuning kani kankatluk sik sâk leh in apek roh.

¹²Keini’n kanchunga akaṭhe hei kantarangei mandam kapōa kanṭhena arangei mandam roh.

¹³Mathlemna aṭhōimak roh, tâk-kha Akaṭhamak Inkhat a inphut ahuksōt roh. Ajârchu rengram, rathahrat, khana lûrna ahei tik a nata kae. Amen.’

¹⁴“Mi’n nanchunga antaṭhe hei kha nanrangei mandam he’nchu, marvâna nan-Pa’num nangni ṭhenahei kha arangei mandam sik chei.

¹⁵Tâk nangni’n mihei nanrangei mandam mak inchu, nan-Pa’num nangni ṭhenahei kha rangei mandam mak chei ning.

¹⁶“Nangni’n bu nanhngōi pha, a’nṭhat hlemsak-hei kapōa akachâm hmaisō malârmak ruh. Bu anhngōi tia mihe’n anmanhretna sik a anhmaisō khachu donmak hei. Kahri manchên pek chei kae, anmani tloman kha inpesō jo hei.

¹⁷Nangni’n bu nanhngōi pha, nanhmai inphet una, nanlu inkhui kaṭha ruh,

¹⁸khang’khan nanbu hngōi kha mihe’n anmanhret makna sik, hmit hmulo nan-Pa rōk in amanhretna sik a tlo ruh. Khana marûk a nantatlo akahmu sōt nan-Pa khan tloman kha apek sik chei.

¹⁹“Ra-nge leh thîr-ek tasâk manhmangthei, khana inru’n asuk khōia amarûkthei hmun raleichunga nankarōi manbuk mak ruh.

²⁰Khava kanek a, ra-nge leh thîr-ek tasâk manhmangthei makna hmun leh inru’n asuk khōia amarûk tor makna marvâna nankarōi manbuk ruh.

²¹Ajârchu nankarōi omna a khan nanmalung um ka-om sik.

²²“Hmit-hei hi taksa sik a thaihmei kapō hei kae. Nahmit-hei kha aṭhat inchu nataksa pumpui kha kavârpet sik;

²³tâk nahmit kha aṭhatmak inchu, nataksa pumpui kha a’nthim sik kae. Achang jâra nashunga vâr kha a’nthim jo’nchu, a’nthim kha heituk a a’nhnak sik jo mo!

²⁴“Tûte inkhat in akapu 2 sōk chang tor mak; inkhat a-enkada sik a kha inkhat alungset sik; inkhat arazen sik a kha inkhat donmak ning. Nangni’n Pathen leh karōi kha razensap tor mak chei.

²⁵“Hiva jâra kahri pek chei kae, nanhringna sik a nanta rangei sâk leh in hei chunga, a-emak leh nantaksa sik a pōnsi derkeihei chunga nanmalung manrim mak ruh. Hei-achang inum bu kanek a hringkhō man akatam jôk changmak mo? Khana pōnsi derkei kanek a taksa man akatam jôk changmak mo?

²⁶Vahei so en hei ruh: hmuchi vormak hei, khôm mantûp mak hei khana sasōr a’m manbuk mak hei; kha’num marvâna nan-Pa’n a-ensui hei! Vahei kanek a nangni mankatam jôk changmak chei mo?

²⁷Nanmalung inrim jâra nankâra tu mo ahringkhō bongkhat amanseisa tor?

²⁸“Khana pōnsi derkei sik a heisa mo a’nrim chei? Ram reipâr heiso en hei ruh: anbinga sik a ṭōn um tlomak hei, pōn um khôngmak hei.

²⁹Tâk ke’n kahri pek chei kae, nei leh hao rakip leh ret kasi Solomon Reng kapha’num hiva reipâr inkhat ṭhatna phator mak.

³⁰Tuning hin ka-oma jîng leh chu ratap shunga ro manhlut sik hei, ram thōia phihei ret kasyem kha Pathen kae. Akakhe chet a amanret ngermak sik chei mo? Heituk taksenna katlôm jo chei mo!

³¹“Khava jâra hing’hin: ‘Khona inphut busâk, tui in sik a-emak leh pōnsi derkei akahong sik?’ tia malung dongna neimak ruh.

³²(Khōvel he’n ahei tik a châmna antanei kha khavahei chungchânga kae.) Hihei rakip hi nangni’n nanrangei ti hi marvâna nanpa’n amanhret.

³³Khava kanek a heirakip chungchôna Pathen Rengram leh adikna kha jong ruh, khan chu khavahei seng kha apeksa sik chei.

³⁴Khava jâra jîng kani sik malung manrim mak ruh; jîng kania malung inrimpui akatluk hrep leika-om sik. Ani kataia inrimna chunga khan hapsa sik rangei mak.